1 Timothée 4

1Gaŋ Nirl Raa taaɗ jeege tu tal ɔɔ kaaɗ kɛn jaay dunia ɔɔpga gɔɔrɔ an naŋ se, jee mɛtin̰ge se utu kɔn̰ gɛn kal maakɗe do taar kɛn naaje k'j'aalki maakjege do ki se. Ɔɔ kuun taar sitangen lee dɛrl jeege ɔɔ tookŋ taar kɛn jig eyo kɛn sitange ɔl jeege jaay lee dooy jeege se ɓo ɔɔn̰ɔ. 2Naaɗe se utu kɔn̰ roɗe jeege tun tɛɗ roɗe aan gɔɔ jee taaɗ taar mɛt ki kɛn jee taar‑kɔɔɓge se ɔɔ jee se ɓo kɛn maak‑saapɗe tec aan gɔɔ k'tɔɔcin̰ga tɔɔc ute pooɗo, naaɗe se ɓo kɛn utu aɗen kaan̰ dala. 3Naaɗe dooy jeege ɔɔ j'ɔn̰te tɔkŋ naapa, tɛr naaɗe taaɗ jeege tu ɔɔ nakŋ kɔsgen mɛtin̰ge se kic ɓo j'ɔn̰te kɔsɔ. Ey num, nakgen se Raa aalɗeno se taa jeegen aalga maakɗe do Isa al‑Masi ki ɔɔ jeel‑taar Raa mɛt ki se 'kɔsɔ, ɔɔ 'tɔɔm Raa taa nakŋ kɔsgen ese se. 4Taa nakgen Raa aalo paac se, jiga. Nakŋ jaay j'an̰ kɔɔɗn kund naatn tap ɓo gɔtɔ. Kɛn j'ɔŋin̰ga num, k'tɔɔm Raa. 5Kɛn tɛɗin̰ nakge jaay tɛɗ salal se taar Raa, ute tɔnd mɛtn Raa kɛn k'lee k'tɔndki mɛtin̰ se. 6Nakgen se 'dooy gɛnaagen ɗoobm al‑Masi ki, bin se naai 'tɛɗn debm tɛɗn naabm Isa al‑Masi kɛn mɛc. Taar Raa kɛn j'aalki maakjege do ki ute taargen jigan k'dooyio se 'taaɗn jeege tu ɔɔ naai se utu iŋg do ki jiga. 7Ɔn̰te booy mɛtn taar k'tusugen jig eyo ute taar kɛn mɛndgen magalge lee taaɗ rɛn̰ rɛn̰ se. Num gaŋ aay kaami taar Raa se ɔkin̰ ɔɔn̰ɔ. 8Debm lee tɔɔj ron̰ se ron̰ wɔrgɔ ɔɔ kɛse tɛɗin̰ jiga naɓo cɔkɔ sum. Num gaŋ debm kɛn ɔk taar Raa ɔɔn̰ se, taar se noogin̰ dɛn cir nakgen ɓaa se paac. Taa naan̰ jeele taar se an̰ kɛɗn kaaja ɓɔrse ɔɔ daayum daayum. 9Taar se taar mɛt ki, bɛɛki se, taar se jeege paac an̰ tookŋ kɔkŋ ute maakɗe paac. 10Kɛn naaje jaay k'dabar roje ɔɔ k'j'aay kaamje k'tɛɗ naaba se, taa naaje j'ɔndga kɔnd doje do Raa kɛn iŋg daayum zɛɛrɛ. Naan̰ ɓo Mɛl Kaajn̰ jeege paac, naan̰ aaj tap se jee kɛn aalga kaal maakɗe do Isa al‑Masi ki. 11Taargen se ɓo 'taaɗin̰ jeege tu ɔɔ 'dooyɗe. 12Ɔn̰te kɔn̰ jeege ai kaal maak ki eyo taa naai 'goon cɔkɔ se. Gaŋ naai ɓo 'taaɗ ɗoobo jee Raage tu ute taar taari ki ute kiŋgi ute maak‑je kɛn naai 'jenɗe, ute kaal maakŋ kɛn naai aal do Raa ki, ɔɔ ute lei kɛn aak bɛɛ naan Raa ki. 13Kɔr maam m'ai kɔŋ se taar Raa se daayum aay kaami 'lee 'dooyin̰ naan jeege tu 'dɛjn̰ jeege ɔɔ 'lee dooyɗe ute taar se. 14Tɔɔgŋ kɛn Raa ɛɗio ɔɔ an tɛɗn naabin̰ se, ɔn̰te kaakin̰ aan gɔɔ nakŋ cɛrɛ. Raa ɛɗin̰sin̰ se kaaɗ kɛn Raa ɔlo jeege taaɗo roi ki ɔɔ naan̰ kɛn se ɓo, jee naan jee eglizge tɔndio jiɗe doi ki. 15Nakgen se ɓo kɛn naai aɗen kɔkŋ ɔɔn̰ɔ, 'tɛɗɗen ute maaki paac, bin se jeege paac ai kaaki naai, naan Raa ki se, 'tɛɗ bɛɛ ɓaa ɓaa ute naani naan jeege tu. 16Ɔnd kɔnd do roi ki, ɔɔ ɔnd kɔnd ute taar kɛn naai 'lee dooy jeege se. Daayum aay kaami 'tɛɗ naan̰ se. Kɛn naai jaay 'tɛɗ naan̰ se num, bin se naai 'kɔŋ kaajn̰ roi ɔɔ 'kɔŋ kaajn̰ jeegen lee booy taari se kici.

will be added

X\