1 Timothée 3

1Taar kɛn maam m'je taaɗn ese se taar kɛn mɛt ki, debm je tɛɗn naan jee Raage se, naabm naan̰ je tɛɗa se naabm jiga aak eyo. 2Naɓo debm je tɛɗn naana se, 'tɛɗn debm kɛn ɔk taar ɗim ron̰ ki gɔtɔ, ɔk mɛnda kalaŋ sum, debm bɔɔb ɔk ron̰a, debm saap tɛɗ naka ute ɗoobin̰a, tɛɗ nakŋ jeege tɔɔmin̰a, debm kɔkŋ mɛrtge, ɔɔ debm jeel dooy jeege. 3'Tɛɗn debm aay tɔtɔ deel te gɔtin̰ eyo, debm je kɔnd naapa ute jeege eyo, gaŋ 'tɛɗn debm maakin̰ deere ɔɔ debm je taar eyo, debm maakin̰ tama eyo. 4Bɛɛki se, 'tɛɗn debm jeel kiŋg ute mɛndin̰a ɔɔ ute gɛnin̰ge ɔɔ gɛnin̰ge kic sookin̰ ɔɔ taarin̰ naan̰ taaɗɗen paac se, naaɗe uunu. 5Taa debm jaay jeel kiŋg ute mɛndin̰ te gɛnin̰ge ey se, naan̰ 'tɔɔɗn eglizn gɛn Raa se ɔɔ ɗio? 6Kɛn naase jaay 'je aki kɔnd nam naan jee Raage num, ɔn̰te 'kɔndki debm utu aal kaal maakin̰ do Isa al‑Masi ki. Ey num, naan̰ 'magal ron̰a ɔɔ Raa utu an̰ kɔjn̰ bɔɔrɔ don̰ ki aan gɔɔ kɛn naan̰ ɔjo do Ɓubm sitange tu se. 7Debm kiŋg naan jee Raage se, bɛɛki se, jee kɛn ɗoobm Raa ki ey kic ɓo an̰ kaal maak ki. Kɛn bin ey num, naan̰ kɛnd maakŋ sɔkɔn̰ ki ɔɔ naan̰ kɛnd maakŋ sɛɛ Bubm sitange tu. 8Jee tɛɗn naabgen daan jee Raage tu se, bɛɛki se, naaɗe se kic 'tɛɗn jee jeege aalɗe maak ki, jee taaɗ taarɗege di di eyo, jee aay tɔtɔ dɛn eyo ɔɔ jee je gursn jeege cɛr eyo. 9Naaɗe k'kaal maakɗe do taar kɛn do dɔkin̰ k'jeel mɛtin̰ ey jaay ɓɔrse k'jeelga mɛtin̰ se ute maak‑saapm jiga. 10Kɛn naase jaay 'je aki tɔnd jee 'tɛɗn naaba daan jee Raage tu se, aak ɔkki naabɗege jaayo ɔɔ kɛn ɔŋki te taar ɗim roɗe ki ey jaay ɓo, 'tɔndɗeki 'tɛɗn naaba daan jee Raage tu. 11Mɛndgen 'tɛɗn naaba daan jee Raage tu kic se 'tɛɗn mɛndgen jeege aalɗe maak ki, j'ɔn̰te tɛɗn mɛnd kɔɔɗn jeege, k'bɔɔb j'ɔk roɗe, ɔɔ do nakge tu paac se j'ɔn̰ten tujn̰ ɔrmɗe. 12Jee tɛɗn naabgen daan jee Raage tu se, 'tɛɗn gaabgen mɛndge kalaŋ kalaŋ sum, ɔɔ jeel dɛjn̰ gɛnɗege ɔɔ jeel kiŋg ute jee maakŋ ɓeeɗege tu. 13Jee tɛɗn naabgen daan jee Raage tu se jaay tɛɗ naabgen jiga se, kɔl jeege paac aɗen kaal maak ki. Ɔɔ kɛn baagga dooy jeege do taar Isa al‑Masi kɛn naaje k'j'aalki maakjege do ki se kic ɓo, 'taaɗn ɓeer eyo. 14Maam m'raaŋi maktubm se taa ɔɔpga baata m'saap m'utu m'ai ɓaa kɔŋɔ, 15naɓo kɛn m'aan te yɔkɔɗ ey kic ɓo, maktubm se ai taaɗa mɛtn taar kiŋg jee Raage ute naapa. Jee se ɓo eglizn gɛn Raa zɛɛrɛ. Naaɗe se ɓo jee ɔk taar mɛt ki se tɔɔgɔ aan gɔɔ duliy kɛn gak ɓee tɔɔg se. 16Taar mɛt kɛn k'jeelki mɛtin̰ eyo, jaay Raa taaɗjeki mɛtin̰ se kɛn taaɗjeki kiŋg ɗoobm Raa ki ɔɔ j'aalki maakjege do ki. Taar se magal dɛn dɛna nam an̰ kɔŋ naaj eyo. Taar ese ɓo kɛn taaɗ ɔɔ: Al‑Masi ɓaaɗo tɛɗ ron̰ tɛɗ debkilimi se, Nirl Raa taaɗ jeege tu ɔɔ naan̰ se ɓo debm kɛn tɛɗ nakŋ ute ɗoobin̰a. Kɔɗn Raage kic aakin̰ga ute kaamɗe. Jeege taaɗɗega taarin̰ jeege tun Yaudge eyo. Jeegen do naaŋ kɛn gɔtn ɓaa se paac aalga maakɗe don̰ ki, ɔɔ Raa uun ɓaansin̰ maakŋ raa ki ɔɔ nookin̰ga.

will be added

X\