1 Timothée 2

1Nakŋ kɛn maam m'je deet deet se, m'je k'tɔnd mɛtn Raa k'j'eemin̰a, k'sɛlin̰ mɛtin̰a ɔɔ k'tɔɔmin̰a taa jeege paac. 2Ɔɔ 'tɔndki mɛtn Raa taa gaarin̰ge ute tɔɔgge, bin se taa naajege j'aki kɔŋ lapia ɔɔ j'aki kiŋg ute maraadjege ɔɔ j'aki kɔkŋ taarin̰ ɔɔn̰ɔ ɔɔ j'aki lee aak bɛɛ naan jeege tu. 3Kɛse nakŋ aak jiga kɛn tɔɔl Raa ki, naan̰ ɓo kɛn Mɛl Kaajege. 4Nakŋ kɛn tɔɔlin̰ se, taa naan̰ je jeege paac kɔŋ kaaja ɔɔ kɔŋ jeel‑taar kɛn mɛt ki. 5Taa Raa se naan̰ kalaŋ sum, ɔɔ debm daan Raa ute jeege se, naan̰ kic ɓo kalaŋ sum, naan̰ ɓo debkilim k'daŋin̰ Isa al‑Masi se. 6Naan̰ ɓaaɗo ɔn̰ ron̰ ooy taa dugŋ do jikilimge paac. Naan̰ tɛɗn naan̰ se je taaɗn ɔɔ kaaɗn se ɓo kɛn Raa ɔndin̰ ɔɔ je an kaajn̰ jeege. 7Taa naan̰ se ɓo Raa ɔndum ɓɔrse m'tɛɗga debm wɔɔkŋ taarin̰ jeege tu ɔɔ debm kaan̰ naabm Isa al‑Masi. Naan̰ ɔndum se taa m'dooy jeegen kɛn Yaudge ey kici ute taar Raa mɛt ki se, taa naaɗe kaal maakɗe don̰ ki. Taar maam m'taaɗ se taar‑kɔɔɓ eyo, num taar kɛn mɛt ki. 8Tɛr maam m'je se, kɛn gɔtn gay gay kic ɓo kɛn gaabge jaay ɓaa keem Raa se, j'uun jiɗege raan ɔɔ k'tɔnd mɛta ute maakŋ kalaŋ kɛn ɔk kusin̰ eyo. J'ɔn̰te tɛɗn maak‑taara ɔɔ j'ɔn̰te tɛɗn dɛkin̰ ute naapa. 9Ɔɔ m'je mɛndge se kic j'ɔn̰te tuusn kalgen gɛn koono kɛn 'kɔl jeege aɗen kaakŋ naaɗe sum se, num gaŋ k'tɛɗ roɗege miskinge. Ɔɔ j'ɔn̰te kɔgŋ doɗege gɛn koono. J'ɔn̰te tɔl kɔɗɔk bi gɛn daab, ɔɔ j'ɔn̰te tɔl meeɗgen ute roɗe ɔɔ j'ɔn̰te tuus kalgen ute roɗe. 10Num nakŋ jaay aɗe tɛɗn aak bɛɛ se, tamar ro eyo, num gaŋ k'tɛɗ nakgen jiga jiga. Kɛse ɓo mɛndgen ɔk taar Raa ɔɔn̰ se nakŋ kɛn dɔɔɗɗen naaɗe ki. 11Kɛn mɛndge jaay ɓaaga dooy gɔtn kɛn jee Raage tusn gɛn keem Raa se, j'iŋg kaam kalaŋ, k'booy taar debm kɛn iŋg dooyɗe se. 12Maam m'und te kulu mɛndge tu gɛn dooy gaabge eyo ɔɔ m'je mɛndge ɓo 'kiŋg do gaabge tu eyo, num mɛndge se k'j'iŋg kaam kalaŋ ɔɔ j'ɔn̰te kul taara. 13Taa do kupm mɛt kɛn deet se Raa ɔɓo Adum ɓo deete, jaay ɓo ɔɓo Awa. 14Adum ɓo ɔn̰ ron̰ k'dɛrlin̰o deet eyo, gaŋ mɛnda ɓo ɔn̰ ron̰ k'dɛrlin̰o deete ɔɔ naan̰ baate tooko taar Raa ɔɔ ɔlin̰ maakŋ kusin̰ ki. 15Naɓo mɛnda kic utu kɔŋ kaaja se, taa mɛtjil goonin̰ naan̰ utu kooj se, naɓo naan̰ n̰'aal maakin̰ do Raa ki, je jeege, tɛɗn ron̰ mɛnd salal naan Raa ki ɔɔ tɛɗn ron̰ miskini jaayo.

will be added

X\