1 Timothée 1

1Maktubm se maam Pɔl ɓo m'raaŋin̰a, maam kɛn Isa al‑Masi kɛn j'ɔndki dojege don̰ ki ute Raa Mɛl Kaajjege se ɓo tɛɗum m'tɛɗga debm kaan̰ naabm Isa al‑Masi se. 2Maktubm se maam m'raaŋin̰ naai Timote ki. Naai se aan gɔɔ goonum mala taa naai aalga maaki do Isa al‑Masi ki kici. Ɔn̰ Raa Bubu ute Mɛljege Isa al‑Masi ai tɛɗn bɛɛɗe ai kɛɛjn̰ doi ki ɔɔ ai kɛɗn lapia. 3Maam m'je naai se 'kɔɔpm kiŋg Ɛpɛz ki aan gɔɔ kaaɗ kɛn maam m'ɓaa ɓaa Masedoan ki jaay m'taaɗio m'ɔɔ ɔɔp iŋg gɔtn ese se. Taa naai 'gaasn jee mɛtin̰gen lee dooy jeege do taarge tun mɛt ki ey se. 4'Taaɗɗen kici j'ɔn̰te kiŋg dɔɔkŋ taara gɛn taaɗn k'tusugen bubɗege lee taaɗɗen se ɔɔ j'ɔn̰te tuun mɛtjil bubɗegen naŋ ey se. Kɛse ɓaano ute naajn̰ taara maakɗe ki cɛrɛ, ɔɔ ɔŋ noogjeki eyo gɛn tɛɗn nakŋ kɛn Raa uuno doa jaay naajege k'j'aalki maakjege do ki se. 5Naaje k'taaɗɗen bin se k'je taa naaɗe 'je jeege. Ɔɔ jeegen naaɗe aɗe je se, aɗe je ute maakŋ kalaŋ kɛn ɔk kusin̰ eyo, ute maak‑saapm jiga ɔɔ kaal maakɗen kɛn aal do Raa ki se tɛɗn ɗeer ɗeer. 6Taa jee mɛtin̰ge se ɔn̰ga gɛn tɛɗn nakgen ese se ɔɔ nakgen k'dooyɗeno se kic ɓo, naaɗe rɛsŋga naatn, ɔɔpɗen gɛn kiŋg taaɗn taargen rɛn̰ rɛn̰ sum. 7Naaɗe je tɛɗn jee magalgen jee jeel taaɗn tɔɔkŋ mɛtn Ko Taar Raa jeege tu, Ko Taar Raa se ɗeere naaɗe taaɗin̰ ute maakɗe paac, naɓo taar naaɗe taaɗ jeege tu ɔɔ dooyɗe se, naaɗe jeel mɛtin̰ eyo. 8K'jeelki Ko Taar kɛn Raa ɛɗo Musa ki se naan̰ jiga, kɛn naajege jaay ɓo k'tɛɗki aan gɔɔ kɛn naan̰ lee taaɗjeki se. 9K'jeel j'ɔkki mɛtin̰ jiga jaayo taa jeegen tɛɗn nakŋ ute ɗoobin̰ ɓo Raa taaɗo Ko Taarin̰ eyo, num gaŋ naan̰ taaɗ Ko Taarin̰ jeege tun lee tuj ɗoobin̰a, jee kɛn tookin̰ taarin̰ eyo, ɔɔ jee kɛn ɓeerin̰ eyo, jee kusin̰ge, jee tɛɗ nakgen kɛn naan̰ je eyo, jee aalin̰ maak ki eyo, jee tɔɔl bubɗege ute kɛn̰ɗege ɔɔ jee kɛn tɔɔl jeege. 10Ɔɔ Ko Taar kɛn Raa ɛɗo Musa ki se kic taaɗ jeege tun tɛɗn nakŋ sɔkɔn̰ge ɔɔ gaabgen ɛɛs naapge, jeegen dug jeege ɓulu, jee taar‑kɔɔɓge, jee kɛn uun taar mɛt ki eyo sum ɓo tɔl do jeege tu. Raa taaɗo ɗoobin̰ se gɛn nakgen jig eyo paacn̰ kɛn jeege lee tɛɗ jaay tujin̰ taarin̰ jiga kɛn k'lee dooy jeege se. 11Taar kɛn maam m'taaɗ se kɛse ɓo Labar Jiga kɛn gɛn Isa al‑Masi kɛn taaɗ nookŋ Raa. Kɛse naan̰ Raa kɛn bɛɛki num jeege an̰ tɔɔm se ɓo ɛɗumo Labar Jiga se kaam jima. 12Maam tɔɔm Mɛljege Isa al‑Masi kɛn ɛɗum tɔɔgɔ gɛn tɛɗn naabin̰a. Maam tɔɔmin̰ se taa naan̰ aakum maam se debm m'aasin̰ gɛn tɛɗn naabin̰ jaay naan̰ ɛɗumsin̰ kaam jima. 13Ey num, do dɔkin̰ se, maam m'taaɗo taargen jig eyo ron̰ ki m'dabaro jeen̰ge ɔɔ m'naajin̰o kici. Gaŋ Isa al‑Masi se ɛɛjumga dom ki, taa nakgen maam m'tɛɗin̰o se m'jeel te mɛtin̰ eyo taa kaaɗ kɛn se maam m'aal te maakum don̰ ki ey ɓɔrtɔ. 14Mɛljege se tɛɗumga bɛɛ dɛn aak eyo, taa naan̰ se ɓo maam m'aal maakum don̰ ki ɔɔ m'jen̰a taa naaje ute Isa al‑Masi se k'tɛɗga kalaŋ. 15Taar kɛn maam m'je taaɗn ese se taar kɛn mɛt ki, ɔɔ bɛɛki se jeege paac 'tookŋ taar se ute maakɗe paac: Isa al‑Masi ɓaaɗo do naaŋ ki se taa kaajn̰ jee kusin̰ge. Ɔɔ maakŋ jee kusin̰ge tu paac se maam ɓo debm kusin̰ kɛn cirɗe paac. 16Gaŋ Raa se ɛɛjumoga dom ki, ey num maam ɓo debm kusin̰ kɛn cir jeege paac se. Bin se naan̰ je taaɗn jeege tu ute ɗoobm maam se ɔɔ Isa al‑Masi se naan̰ debm maakin̰ deer bɛɛ eyo. Naan̰ tɛɗ bin se taa 'taaɗn jeege tun utu kaal maakɗe don̰ ki jaay kɔŋ kaajn̰ gɛn daayum se. 17Ɔn̰ jeege paac nookŋ Raa ɔɔ an̰ tɔɔm gɛn daayum, taa Raa se naan̰ Gaarge gɛn daayum. Raa se naan̰ tiŋg daayum zɛɛrɛ, kɛn nam ɔŋ aakin̰ eyo, naan̰ ɓo Raa kalaŋ lak, daayum 'tɔɔmin̰ki. Amin. 18Timote, goonuma, kɛse ɓo taargen maam m'ɔn̰isin̰ kaam jii ɔɔ aan gɔɔ taar kɛn jee taaɗ taar teeco taar Raa ki taaɗo deete roi ki se, 'saap do taarge tun naaɗe taaɗo roi ki se, taa naai 'ɗo 'tɛɗn naabm jiga. 19Bin se naai aal maaki do Raa ki ɔɔ iŋg te maak‑saapm jiga. Maak‑saapm jigan se ɓo jee mɛtin̰ge rɛsŋga naatn, ɔɔ taa naan̰ se ɓo kaal maakŋ naaɗe aalo do Raa ki se naaɗe rɛsŋga naatn. 20Maakŋ jeege tun ese se ɓo Imɛnɛ ute Alekzandɛr. Ɔɔ naaɗe se maam m'ɔn̰ɗega kaam ji Ɓubm sitange, maam m'tɛɗin̰ naan̰ se taa nakŋ se aɗen dɛjɛ ɔɔ bin se, naaɗe kɔŋ naajn̰ ro Raa ey sum.

will be added

X\