1 Gɛnaamge, gɛn kaaɗin̰a ute ɓiin̰ kɛn Mɛljege aɗe ɓaa se, naase 'jeki j'asenga raaŋ jaay ey sum, 2 nakgen se naase mala kic ɓo 'jeelin̰ki jiga: ɓiin Mɛljege aɗe ɓaa se tecn̰ aan gɔɔ debm ɓoogŋ ɓaaɗo daan nɔɔr ki. 3 Kaaɗ kɛn jeege ɗeekŋ ɔɔ: «Naaje j'iŋgki ute tɔɔsɛ ɔɔ nakŋ ajenki tujn̰ maakjege lɛ gɔtɔga sum se,» kaaɗ kɛn se sum ɓo, gɔtɔ se naar tujn̰ kasak kasak, aan gɔɔ mɛnd mɛndkaama kɛn maakin̰ tuunin̰ gɛn koojo, ɔɔ ɓii kɛn se naaɗe 'kɔŋ kaan̰ kɔt eyo. 4 Num, naase gɛnaamge, naase lɛ iŋgki maakŋ gɔt kɛn ɔɔɗ ey se; taa naan̰ se ɓo, ɓii se kic asen kɔŋ kɔkŋ do jise ki aan gɔɔ debm ɓoog eyo. 5 Taa naase paac 'tɛɗkiga gaan gɔt kɛn wɔɔrɔ ɔɔ jee maakŋ katara ki; bin se naajege se jeegen lee maakŋ nɔɔr ki eyo ɔɔ maakŋ gɔt kɛn ɔɔɗ eyo. 6 Taa naan̰ se j'ɔn̰ten 'tooɗki bia aan gɔɔ jeegen kuuy ɓɔrse tooɗ tooɗ se, num j'iŋgki zɛɛrɛ ɔɔ k'bɔɔb k'j'ɔkki rojege. 7 Jee tooɗn bige se lɛ, lee tooɗ nɔɔr ɔɔ jee kaay koonge kic lɛ, lee taay toon nɔɔr. 8 Naajege se k'gaan katarge. Taa naan̰ se, k'bɔɔb k'j'ɔkki rojege, kaal maakjegen do Isa ki ɔɔ maak‑je kɛn k'j'ɔkki do jeege tu se j'aɗenki tuusn aan gɔɔ saapo. Naajege k'j'ɔndki dojege do Raa ki naan̰ ɓo debm ajeki kaaja, ɔɔ naan̰ se tec aan gɔɔ debm ɔnd baay maala ɓo don̰ ki. 9 'Jeelki, Raa daŋjekiro se taa j'aki kɔŋ kaaja ute ɗoobm Mɛljege Isa al‑Masi ɔɔ taa maak‑taarin̰ 'bɔɔy dojege tu eyo. 10 Isa al‑Masi se ooyga taa naajege, bin ɓo jeegen kɛn utu iŋg zɛɛrɛ, ey lɛ jeegen kɛn ooyga kooy se, naajege paac j'iŋg k'dɔɔkki ute naan̰a. 11 Bin num ɛɗki kaay kaama naapge tu ɔɔ 'tɔɔgki maakŋ naapge, aan gɔɔ kɛn naase lee 'tɛɗin̰ki tɛɗ se. 12 Gɛnaamge, k'ɗeekseni, naaje k'je jeegen jaay lee dabar tɛɗ naaba daanse ki se, aalɗeki maak ki. Taa naaɗe se, Mɛljege ɓo ɔlɗeno taa asen tɔɔɗɔ ɔɔ asen dɛjɛ. 13 Taa naabm naaɗe tɛɗ daanse ki se ɔkɗeki ɔɔn̰ɔ ɔɔ jeɗeki. Iŋgki ute tɔɔsɛ ute naapa. 14 Naaje k'ɗeekseni gɛnaamge, jee kaar‑naabge se 'mooyɗeki. Ɛɗki kaay kaama jeege tun maakɗe iŋg kaam kalaŋ eyo, ɔɔ jeege kɛn ɔk tɔɔg ey se 'noogɗeki ɔɔ ɔn̰ki maakse 'tɛɗn deere ute jeege paac. 15 Ɔndki kɔndɔ kɛn nam jaay tɛɗi kusin̰ se, ɔn̰te tɛrlin̰sin̰a, num daayum 'jeki gɛn tɛɗn bɛɛ ute naapa ɔɔ ute jeege paac. 16 Daayum iŋgki te maak‑raapo. 17 Daayum 'tɔndki mɛtn Raa. 18 Ɔɔ maakŋ nakge tun aan dose ki paac se, 'tɔɔmki Raa. Kɛse ɓo nakŋ kɛn Raa maakin̰ jen ro ki ɔɔ an̰ki tɛɗa, naasen kɛn ɗoobm Isa al‑Masi ki se. 19 Naabm Nirl Salal je tɛɗa se, ɔn̰ten 'gaasin̰ki; 20 jeegen jaay taaɗ taargen teeco taar Raa ki se, taar naaɗen taaɗ se ɔn̰te kuum kaalin̰ki naaŋ ki. 21 Num maakŋ nakge tu paac se, aak ɔkin̰ jiga jaay ɓo, kɛn bɛɛ maak ki se, uunki. 22 Napar kusin̰ge paac se ɔɔɗki dose ro ki. 23 Ɔn̰ Raa mala kɛn ɛɗjeki tɔɔsɛ se, asen tɛɗn aki tɛɗn jee salal mala mala ɔɔ rose, kose ɔɔ nirlse se ɔn̰ Raa an̰ bɔɔbm jiga ɔɔ bin se j'kɔŋ ne ɗim aak kus rose ki eyo ɓii kɛn Mɛljege Isa al‑Masi aɗe ɓaa se. 24 Raa daŋseno se, naan̰ 'kɔŋ tɛɗn nakŋ se, taa naan̰ se debm tuj ɔrmin̰ eyo. 25 Gɛnaamge, naase kic 'tɔndki mɛtn Raa taa naaje. 26 'Tɛɗki tɔɔsɛ gɛnaage tun paacn̰ ɗoobm al‑Masi ki ɔɔ baam 'tɔkki naapa ɔɔn̰ɔ aan gɔɔ gɛnaa naapge. 27 Maam m'ɗeekseni ute ro Mɛljege, kɛn maktubm se jaay ɔŋin̰kiga num, 'dooyin̰ki naan gɛnaage tu paac. 28 Ɔn̰ Mɛljege Isa al‑Masi 'tɛɗn ute naase ɔɔ asen tɛɗn bɛɛn̰a.
