1 Thessaloniciens 4

1Gɛnaamgen ɗoobm al‑Masi ki, ɓɔrse do taar tɔɔlin̰ ki se, naaje k'je j'asen taaɗa: taa naaje k'dooysenoga te ɗoobm jaay naase aki kiŋg num tɔɔl Raa ki se. Ɗeere, ɓɔrse se kiŋgse se tecga aan gɔɔ naan̰ se. Taa naan̰ se ɓo naaje k'tɔnd mɛtse ute ro Mɛljege Isa al‑Masi se, kiŋgsen bin se, ɔkin̰ki ɔɔn̰ɔ ɔɔ 'ɓaansin̰ki te naan se. 2Taa naase 'jeelki nakŋ kɛn naaje k'taaɗseno gɛn tɛɗa se, nakŋ se Mɛljege Isa ɓo taaɗ jeege tu gɛn tɛɗa. 3Nakŋ Raa maakin̰ jen ro ki se, naan̰ je naase aki kɔn̰ rose paac naan̰ ki ɔɔ naŋa kic ɓo bɔɔbm kɔkŋ ron̰a gɛn ɓaa je mɛnd jeege eyo ɔɔ gɛn ɓaa je gaabm jeege eyo. 4Ɔɔ maakse ki se, naŋa kic ɓo ɔn̰ kiŋgin̰ ute mɛndin̰ se tɛɗn aan gɔɔ kɛn Raa maakin̰ jen ro ki, ɔɔ bin se, jeege kic aɗen kaal maak ki; 5ɔɔ ɔn̰ten kɔn̰ki rose gɛn tɛɗn nakgen jig eyo kɛn maakse ɓo jea, aan gɔɔ gɛn jeegen jeel Raa mal eyo lee tɛɗ se. 6Ɔɔ nam ɔn̰ten tujn̰ ro gɛnaan̰ kɛn ɗoobm Isa al‑Masi ki ɔɔ ɔn̰ten 'kaan̰in̰ dala. 'Jeelki, jeegen jaay tɛɗ bin se, Mɛljege utu aɗen dabara ɔɔ taar se lɛ naaje k'taaɗ k'ɗɔɔlsenga ɗɔɔlɔ. 7Taa Raa daŋjekiro se taa j'aki kiŋg ɓo gɛn tɛɗn nakgen jig ey kɛn maakjege je se eyo, num gaŋ taa j'aki tɛɗn jee salal. 8Taa naan̰ se ɓo, debm kɛn jaay baate booy kuun taarse se, naan̰ ɔɔɗ und debkilim eyo, num naan̰ ɔɔɗ und Raa debm ɛɗsen Nirlin̰ Salal se. 9Gɛnaamge, gɛn maak‑je daanse ki ute naapa se, naaje j'asen kɔŋ raaŋ taarin̰ ey sum, taa Raa mala taaɗsenga maakse ki ɔɔ 'jeki naapa. 10Ɗeere, gɛnaagen Masedoan ki se, naase 'jeɗeki paac. Num naaje j'ɛɗsen kaay kaama, maak‑je ese se ɓaansin̰ki ute naanin̰a. 11Ɔɔ aayki kaamse taa aki kiŋg ute tɔɔsɛ ute naapa, ɔn̰ten kɔlki dose maakŋ taar jeege tun kuuy. 'Tɛɗki naaba ute jisege mala jaay ɓo aki kɔŋ ɗim anki tiŋgi, aan gɔɔ kɛn naaje k'dooyseno. 12Kɛn kiŋgse jaay tec bin se, jeegen jeel Raa mal ey jaay 'kaakŋ se, asen kaal maak ki. Ɔɔ naase kic ɓo 'jeki nam ɓo asen kul eyo. 13Gɛnaamge, naaje k'je naase aki jeele nakŋ kɛn utu 'kaan do jeege tun ooyga kooyo, taa naase aki kiŋg maakŋ maak‑tuj ki eyo, aan gɔɔ jeegen jaay nakŋ naaɗe an kɔnd doɗe ro ki gɔt se. 14Kɛn naajege jaay k'jeelki Isa se naan̰ ooyoga ɔɔ duroga daan yoge tu num, bin se, naajege kic k'jeelki jeegen aalga kaal maakɗe do Isa ki jaay ooyoga kooy se, ute ɗoobm Isa se, Raa utu aɗen duru daan yoge tu kici. 15'Booyki, kɛse ɓo taar Mɛljege dooyno jeege ɔɔ naaje k'je j'asesin̰ taaɗa: ɓii kɛn Mɛljege aɗe ɓaa se, naajegen j'utuki zɛɛrɛ do naaŋ ki se j'aki kɔŋ deel kɔn̰ jee kɛn ooyga kooy se eyo. 16Taa ɓii kɛn Mɛljege aɗe ɓaa se, naan̰ mala 'taaɗn makɔn̰ɔ, aɗe kund kulu magal kɔɗin̰ge tu ɔɔ naan̰ 'daŋ jeege. Naan̰ kɛn se, k'tuuy pul Raa ɔɔ Mɛljege mala aɗe bɔɔy maakŋ raa ki ɔɔ jee ooyoga kooy ɗoobm al‑Masi ki se, naaɗe se ɓo aɗe dur daan yoge tu deete. 17Jaay ɓo Raa ajeki tɔsn naajegen j'utuki k'zɛɛrki, j'aki tum ute naaɗe tɛlɛ ɔɔ j'an̰ki ɓaa dɔɔɗn Mɛljege raan maakŋ gapar ki, ɔɔ j'aki ɓaa tiŋg ute naan̰a gɛn daayum. 18Ute taargen se ɓo, ɛɗki 'kaay kaama naapge tu.

will be added

X\