1 Thessaloniciens 3

1Anum kɛn naaje jaay j'ɔŋ te labarse ey se, j'ɔŋ j'aasin̰ te eyo, naaje k'j'uuno doa gɛn kɔɔpm kiŋg maakŋ gɛgɛr kɛn Atɛn ki kalje ki, 2ɔɔ Timote se ɓo naaje k'j'ɔlin̰o gɔtse ki. Timote se naan̰ gɛnaaje ɔɔ naaje k'tɛɗ naabm Raa kalaŋ. Labar Jigan gɛn Isa al‑Masi se, naaje k'taaɗin̰ jeege tu tɛlɛ. Naaje k'j'ɔlin̰ gɔtse ki se taa asen noogo ɔɔ asen kɛɗn kaay kaama ɔɔ taa naase aki kiŋg tɔɔgɔ ɗoobm al‑Masi ki. 3Bin ɓo, dubargen aan ɓɔrse dose ki se asen kɔŋ kɔl naase anki rɛsn ute ɗoobm Raa eyo. Taa naase mala kic 'jeelin̰ki, dubargen bin se, utu 'kaan dojege tu. 4Kaaɗ kɛn naaje k'j'iŋgo gɔtse ki se, naaje k'taaɗsenoga j'ɔɔ naajege se j'utu j'ajenki dabara ɔɔ nakŋ se aanga dojege tu ɔɔ naan̰ ese se, naase kic 'jeelin̰ki. 5Taa naan̰ se ɓo, maam m'ɔŋ m'aasin̰ te gɛn kiŋg booy dɛn eyo, maam m'ɔlsen Timote, taa ɓaa gɔtse ki taa amo ɓaa ute labarse, naase utu iŋgki do kaal maakse ki se ɗey la? Maam m'ɓeer m'ɔɔ sɔm daan naane Ɓubm sitange naamsenga ɔɔ ute naan̰ se naabjen k'tɛɗ daanse ki se 'kutn cɛrɛ. 6Ɓɔrse, Timote kɛn iin̰o gɔtse ki se aan ɔŋjenga ɔɔ naan̰ ɓaanjenoga ute labar jiga gɛn kaal maaksen do Raa ki ɔɔ gɛn maak‑je kɛn naase ɔkki ute naapa. Naan̰ taaɗjen ɔɔ daayum naase utu 'saapki doje ki jiga, ɔɔ je ajeki kaaka aan gɔɔ naajen k'je j'asen kaak se kici. 7Bin num gɛnaamge, maakŋ nakge tun ɔɔn̰ɔ ute dubargen aan dojege tu paac se, naase ɛɗjekiga kaay kaama ute kaal maakŋ naasen aalki do Mɛljege tu se. 8Ɓɔrse naase utu iŋgki tɔɔg ɗoobm Mɛljege tu se, taa naan̰ se naaje kic kiŋgje tɛɗga jiga. 9Naaje j'ɔk taar kɛn 'kaasn jaay j'an tɔɔm Raa se tap ɓo gɔtɔ, taa maak‑raapm kɛn naaje j'ɔko taa naase naan Raa ki. 10Nɔɔrɔ katara naaje k'tɔnd mɛtin̰ te maakje paac, taa ajen kɔɔɗn ɗoobo tɛr j'asen ɓaa kaaka ɔɔ j'aseno dooy nakŋ kɛn naase 'jeelki te mɛtin̰ ey ɓɔrtɔ ɗoobm al‑Masi ki taa aki ɓaa ute naan se. 11Ɔn̰ Raa Bubjege mala ute Mɛljege Isa ajen kɔɔɗn ɗoobo k'ɓaa gɔtse ki. 12Maakje kɛn naase ɔkki do naapge tu ɔɔ do jeege tu paac se, ɔn̰ Mɛljege asesin̰ ziiɗn ɓaa ute naanin̰a, tecn̰ aan gɔɔ kɛn naaje k'jese naase se kici. 13Ɔɔ tɛr, ɔn̰ Mɛljege asen tɔɔgŋ maakse taa naan Bubjege tu Raa ki se naase aki tɛɗn jeegen salal ɔɔ nam 'kɔŋ ɗim aak kus rose ki eyo, ɓii kɛn Mɛljege Isa al‑Masi aɗe ɓaa ute jeen̰ge paac se.

will be added

X\