1 Thessaloniciens 2

1Gɛnaamge, naase mala 'jeelin̰ki, kɛn naaje jaay j'iŋgo gɔtse ki jaay naase 'dɔɔɗ ɔkjekiro jiga se, cɛr eyo. 2Num naase kic 'jeelki naaje se k'dabarjenoga ɔɔ k'naajenoga maakŋ gɛgɛr kɛn Pilip ki, jaay ɓo k'j'iin̰ k'ɓaaɗo gɔtse ki. Ey num jee wɔɔyjege se tap ɓo paac paac ɔn̰jen ɗoob eyo, naɓo Raa se, ɛɗjenga kaay kaama taa j'asen taaɗn Labar Jiga gɛn Isa al‑Masi. 3Taa taar Raa kɛn naaje k'ɓaa k'taaɗsen se, ɔk taar‑kɔɔɓ eyo. Ɔɔ naaje lɛ k'j'ɔk saapm jaay jig ey se do nam ki eyo ɔɔ k'je kaan̰ nam dal eyo. 4Gaŋ Raa se naan̰ aakje naaje j'an̰ kɔŋ kaas se jaay ɓo, naan̰ ɛɗjeno Labar Jiga gɛn Isa se kaam jije gɛn ɓaa taaɗn jeege tu. Anum naaje k'je k'taaɗ se k'je ɓo k'tɛɗn nakŋ kɛn tɔɔl jikilimge tu eyo, num kɛn tɔɔl Raa ki, naan̰ kɛn jeel naŋ saapm maakjege tu paac. 5Taa naase 'jeelki, naaje k'j'ɔŋ k'taaɗ te taar gɛn kaan̰ nam dal eyo ɔɔ k'je te ɗoobm tam eyo ɔɔ Raa kic ɓo jeele. 6Ɔɔ naaje se k'jeɗo te ɗoobm naase ɓo ajeki tɔɔm eyo ɔɔ k'je jee kuuy ɓo aje tɔɔm ey kici. 7Ey num naaje k'jee kaan̰ naabm al‑Masige se, naaje ɓo kɛn k'jee magalsegen kɛn j'ɔk ɗoobo ajekiga tɛɗn naaba, gaŋ naaje k'j'ɔŋ k'tɛɗin̰o te naan̰ se eyo. Num naaje j'iŋgo maakse ki se k'tɛɗo jeegen ɔn̰ roɗe urlu aan gɔɔ ko gaangen kɛn aak do gɛnɗege tu. 8Taa maak‑je naaje k'j'ɔk dose ki se, k'je ɓo j'aseno taaɗn Labar Jigan gɛn Raa se sum eyo, num j'ɔn̰ roje paac ɓo taa naase, taa naase 'tɛɗkiga jee kɔɔn̰ maakjege. 9Ɗeere gɛnaamge, naase utu 'saapki do dubarje ki ɔɔ do naab kɛn naaje k'tɛɗ jaay ɔɔr naŋjeno tak tak se. Naaje k'tɛɗo naaba nɔɔrɔ katara, taa maakse ki se naaje k'je k'kɔɔpm kaam ji nam eyo ɔɔ ute naan̰ se ɓo, naaje k'taaɗseno Labar Jigan gɛn Raa se. 10Naase kic ɓo saaɗjege ɔɔ Raa kic ɓo saaɗje: naaje j'iŋgo daan naase jeege tun aalkiga kaal maakse do Isa al‑Masi ki se, kiŋgje se, kiŋg salal ute ɗoobin̰a ɔɔ nakŋ jaay akiro kɔŋ aak kus roje ki se gɔtɔ. 11Naase 'jeelki, maakse ki se, naŋa kic naaje j'aakin̰o don̰ ki aan gɔɔ bubm kɛn aak do gɛnin̰ge tu se. 12Naaje k'dɛjseno ɔɔ k'j'ɛɗseno kaay kaama ɔɔ k'taaɗseno k'je aki kiŋg aan gɔɔ kɛn Raa maakin̰ jen ro ki, naan̰ kɛn daŋseno taa aki kɛnd maakŋ gaarin̰ ki ɔɔ maakŋ nookin̰ ki. 13Taa naan̰ se ɓo naaje k'tiŋg k'tɔɔm Raa taa naase booy uunkiroga taar Raa kɛn naaje k'taaɗseno se, naase 'tookkiga do ki ɔɔ 'jeelin̰ki taargen se gɛn jikilimge eyo num taar Raa. Ɔɔ ɗeere, naan̰ se taar Raa mala. Ɗeere, taar se utu tɛɗn naaba maakŋ naase kɛn aalkiga maakse do Isa al‑Masi ki se kici. 14Bin num gɛnaamge, naase kic 'tɛɗkiga aan gɔɔ jee eglizgen taa naaŋ Jude ki kɛn tɛɗga jee Isa al‑Masige se. Naaɗe se, taasɗe Yaudgen mɛtin̰ge lee dabarɗeno ɔɔ ɓɔrse se, naase kic taassege lee dabarse bin kici. 15Naaɗe Yaudge se ɓo kɛn tɔɔlo Mɛljege Isa ute jee kɛn taaɗ taar teeco taar Raa ki, ɔɔ naaɗe se ɓo kɛn lee dabarjeno naaje kici. Ɔɔ nakgen Yaudge tɛɗ se tɔɔl Raa ki eyo ɔɔ naaɗe se tɛɗga jee wɔɔy jikilimge paac. 16Naaɗe Yaudgen ese se ɓo, gaasjen gɛn taaɗn taar Raa jeege tun Yaudge eyo taa naaɗe 'kɔŋ kaaj eyo. Kɛn naaɗe tɛɗ bin se naaɗe lee ziiɗ kusin̰ɗege do kusin̰ɗe kɛn naaɗe lee tɛɗ se. Ɔɔ ɓɔrse se kusin̰ɗe se deelga gɔtin̰a. Num do taar tɔɔlin̰ ki se, maak‑taar Raa se, bɔɔyoga doɗe ki. 17Gɛnaamge, gɔtn k'j'iin̰ k'j'ɔn̰seno sum se, daanin̰ dɔkga k'j'ɔŋ k'j'aakki te daan‑kaam naapge eyo. Ute naan̰ se kic ɓo, naaje j'utu k'saap dose ki. Bin num, ute ɗoobm gay kic ɓo naaje k'je j'asen ɓaa kaakŋ daala. Taa naaje se k'j'ɔk maak‑je dose ki dɛn aak eyo. 18Taa naaje k'je k'kɔkŋ tɛrl j'asen ɓaa kaaka, kɛn tap ki se maam Pɔl ɓo m'taaɗ m'ɗɔɔlga ɗɔɔlɔ gɛn ɓaa kaak se, naɓo Ɓubm sitange se gaasjen ɗoobo. 19Gɛnaamge, 'jeelki, naase ɓo jee kɛn naaje k'j'ɔnd doje dose ki, ɔɔ ɛɗjen maak‑raapo ɓii kɛn Mɛljege Isa aɗe ɓaa se taa naase se naaje doje tɛɗn raan. Taa naase ɓo kɛn 'taaɗki jeege tu paac ɔɔki naabje se, naabm jiga. 20Ɗeer ɗeer, naaje se maakje raapm dose ki ɔɔ naaje k'nook Raa taa naase.

will be added

X\