1 Thessaloniciens 1

1Kɛn ara maam Pɔl ɓo m'raaŋsen maktubm se ute Silban ɔɔ Timote, naase jee egliz kɛn maakŋ gɛgɛr kɛn Tɛsalonik ki, kɛn 'tɛɗkiga gɛn Bubjege Raa ɔɔ gɛn Mɛljege Isa al‑Masi. Ɔn̰ Raa asen tɛɗn bɛɛn̰a ɔɔ asen kɛɗn lapia. 2Daayum naaje k'tɔɔm Raa ɔɔ k'tɔnd mɛtin̰ k'j'ɔn̰ ey kici taa naase paac. 3Naan Bubjege Raa ki se, daayum naaje k'saap do kaal maakŋ naase, kɛn naase aalki do Isa al‑Masi ki jaay ɔlsen 'tɛɗki nakgen jiga se. Ute maak‑je naase ɔkki do Isa ki se ɔlsen naase 'tɛɗki naaba jiga ɔɔ aayki kaamse ɔndki dose do Mɛljege tu Isa al‑Masi ki. 4Gɛnaa maakjemge, naaje k'jeele Raa se naan̰ jese ɔɔ naan̰ ɓo bɛɛr tɔɔɗseno taa aki tɛɗn jee naan̰ge. 5'Booyki, Labar Jigan gɛn Isa al‑Masi se naaje k'taaɗseno se ute taarje sum eyo, num ute tɔɔgŋ Nirl Salal ɔɔ naaje k'jeel maakje ki taar naaje k'taaɗseno se taar mɛt ki. Naase kic 'jeelki kaaɗ kɛn naaje j'iŋgkiro tɛl se, nakgen naaje k'tɛɗo paac se, k'tɛɗɗeno taa asen noogo. 6Ɔɔ nakŋ kɛn Mɛljege tɛɗo jaay naaje k'tɛɗ se ɓo, naase 'tɛɗki aan gɔɔ gɛn naaje se kici. Ɗeere, jeege dabarsenoga dɛna naɓo ute naan̰ se kic ɓo, naase 'took uunkiro taar Raa maakse ki se ute maak‑raapm kɛn Nirl Salal ɛɗsesin̰ se. 7Bin ɓo naase 'taaɗkiga ɗoobo jee Raage tun paacn̰ taa naaŋ Masedoan ki ute kɛngen taa naaŋ Akayi ki. 8Ɗeere, taar Raa se iin̰o gɔtse ki se bini aanga taa naaŋ Masedoan ki ute taa naaŋ Akayi ki sum eyo, num gɔtɔ ɓaa se paac, jeege booyga kɛn naase aalkiga maakse do Raa ki se. Taa naan̰ se, naaje j'kɔŋ kɔɔsn maanin̰ ey sum, 9taa jeege paac ɔɔs maanse gɛn kɛn naase 'dɔɔɗ ɔkjekiro jiga kaaɗ kɛn naaje j'iŋgo gɔtn naase ki se. Ɔɔ naaɗe ɔɔs maanse taa naase raagen ɗeer ey se, naase rɛs ɔn̰ɗenkiga naata ɔɔ 'tɛrlkiga maakse gɛn tɛɗn naaba Raa kɛn zɛɛrɛ ɔɔ kɛn mɛt ki. 10Ɓɔrse, naase iŋg aakki kaak kaam Goon Raa aɗe ɓaa maakŋ raa ki, goonin̰ se ɓo, naan̰ durin̰o daan yoge tu ɔɔ naan̰ ɓo Isan kɛn ɔɔɗjeki dojege taa maak‑taar Raa bɔɔy dojege tu eyo ɓii kɛn naan̰ an kɔjn̰ bɔɔrɔ do jeege tu se.

will be added

X\