1 Pierre 5

1Ɓɔrse maam m'taaɗ ute naan eglizgen utu maakse ki se. 'Booyki, maam kic naan eglizge tun aan gɔɔ naase se kici. Kɛn al‑Masi dabaro se, maam m'aakin̰oga te kaamuma ɔɔ ɓii kɛn naan̰ aɗe ɓaa maakŋ nookin̰ ki se, maam kic m'ɔk bɛɗɛ te naan̰ kici: 2Aakki do jee Raage tun kɛn Raa ɛɗsesin̰ kaam jise se, aan gɔɔ debm gaam kɛn aak do baatin̰ge tu se. Naabm se ɔn̰te 'tɛɗin̰ki aan gɔɔ j'ɔlsen taa tɔɔgɔ, gaŋ 'tɛɗin̰ki aan gɔɔ kɛn Raa ɓo jea. Ɔn̰te 'tɛɗki gɛn jee maala, gaŋ 'tɛɗin̰ki ute maakŋ kalaŋ. 3Jee Raage se, ɔn̰te 'tɛɗɗeki taa tɔɔgɔ, gaŋ ute kiŋgse se, 'taaɗɗeki ɗoobo taa naaɗe kic kiŋg aan gɔɔ naase kici. 4Kɛn naase jaay 'tɛɗki bin num, ɓiin kɛn Debm Gaam Magal aɗe teecn̰ pirsil se, naan̰ utu asen kɛɗn laatn tɔɔmɔ kɛn nookin̰ paac 'kɔŋ deel eyo. 5Gaan kɔɗge naase kic, jee naan jee Raage se, 'booy uunɗeki taarɗe. 'Booyki m'asen taaɗa: Maakŋ kiŋgse kɛn ute naapa se, naŋa naŋa kic ɓo tɛɗ ron̰ ɔɔp baata, taa Kitap taaɗga taaɗ ɔɔ: Jee magal roɗe se, Raa ute naaɗe eyo. Gaŋ naan̰ se tɛɗn bɛɛn̰ do jeege tun tɛɗ roɗe ɔɔp baata. 6Anum, ɔn̰ki rose kaam ji Raa tɔɔgɔ ɔɔ 'tɛɗki rose ɔɔp baata jaay ɓo kaaɗ kɛn Raa jen ro ki se, naan̰ asen kuun rose raan. 7Nakgen tɛɗsen jaay uunki nirlse ro ki se, ɔn̰ɗeki paac kaam ji Raa. Taa Raa se, naan̰ ɓo debm kɛn lee aaksen dose ki. 8Bin num 'bɔɔbki rose, ɔɔ iŋgki zɛɛrɛ, taa debm wɔɔyse, Ɓubm sitange se, lee jese aan gɔɔ tupiyu kɛn lee tɔɔy je daa kɛn 'kɔkŋ kɔsɔ. 9Aayki kaamse, 'ɗaarki tɔɔgɔ ɔɔ aalki maakse do Raa ki. 'Jeelki do naaŋ ki ara paac se, gɛnaasegen ɗoobm Isa al‑Masi ki se utu dabar aan gɔɔ naase kici. 10Naɓo dubarse se, utu 'ɗaar duuku. Taa Raa kɛn lee tɛɗ bɛɛn̰ jeege tu se, naan̰ ɓo debm daŋseno taa aki kɛnd maakŋ gaarin̰ kɛn gɛn daayum kɛn kaam ji al‑Masi. Naan̰ asen tɛɗn naase aki tɛɗn jee tɔɔgɔ ɔɔ jee mɛcn̰ kɛn aasin̰ do nakge tu paac. 11Naan̰ ɓo debm ɔk tɔɔgŋ gɛn daayum daayum! Amin! 12Silban ɓo noogum jaay maam m'raaŋ m'ɔlsen maktubm duuk se. Maam m'jeelin̰ naan̰ se gɛnaa kɛn tuj ɔrmin̰ eyo. Maam m'raaŋsen se, m'je m'asen kɛɗn kaay kaama ɔɔ m'je m'asen taaɗn m'ɔɔ kɛse ɓo bɛɛ Raa mala mala. Ɔɔ bɛɛ ese se ɓo, naase se ɔkin̰ki ɔɔn̰ɔ. 13Jee Raagen Babilon kɛn ara se, kɛn Raa bɛɛr tɔɔɗɗenoga aan gɔɔ naase se, tɛɗsen tɔɔsɛ. Ɔɔ goonum Mark kic ɓo tɛɗsen tɔɔsɛ. 14'Tɛɗki tɔɔsɛ te naapa ɔɔ 'baam 'tɔkki naapa ute maak‑jea, aayki ciil naapge aan gɔɔ gɛnaa naapge. Naasen paacn̰ kɛn 'ɗoobm al‑Masi ki se, ɔn̰ tɔɔsn Raa 'kiŋg ute naase.

will be added

X\