1 Pierre 4

1Taa naan̰ se ɓo 'jeelki, al‑Masi ɓaaɗo do naaŋ ki se dabarga. Bin num naase kic 'ɗaapki rose gɛn dabar aan gɔɔ naan̰ kici. Ɔɔ debm jaay dabarga se, mɔɔtn 'kɔŋ kɔl don̰ maakŋ kusin̰ ki ey sum. 2Ɓiisen ɔɔpm kɛn anki tiŋg do naaŋ ki se, ɔn̰te 'tɛɗki nakŋ kɛn maakse ɓo jea, num 'tɛɗki nakŋ kɛn tɔɔl Raa ki. 3Ɗeere, maakŋ kiŋgse kɛn do dɔkin̰ se, naase 'tɛɗkiro nakgen jig ey dɛna aan gɔɔ jee jeel Raa mal eyo. Naase 'lee ɛɛskiro naapa, 'lee dɔŋkiro nakŋ jeege, 'lee aay oonkiro, 'lee 'jekiro kɔs bɛɛ salal, ɔŋkiga gɔtn kaaye lɛ aay 'deelkiro te gɔtin̰a ɔɔ 'lee 'tɛɗkiro maraggen Raa jeɗe eyo paac paac. 4Ɓɔrse jaay naase 'tɛɗki aan gɔɔ naaɗe ey se, naaɗe aaksen se paac ɓo ɔkɗen taaɗ eyo. Taa naan̰ se naaɗe lee naajse. 5Gaŋ ɓii kalaŋ Raa kɛn utu 'kɔjn̰ bɔɔrɔ do jeege tun ooyga kooyo ɔɔ do jeege tun zɛɛr se, utu 'tɔnd mɛtɗe do nakɗe kɛn jig ey naaɗe tɛɗ se. 6Jee ooyga kooy do dɔkin̰ se kic ɓo, Isa ɓaa taaɗɗenoga Labar Jiga se kici. Taa naan̰ se ɓo, naaɗe kic Raa ɔjɗenga bɔɔrɔ doɗe ki aan gɔɔ jikilimgen ɓaa se paac. Bin se ute Nirl Raa se, naaɗe 'kɔŋ 'kiŋg aan gɔɔ kɛn Raa jen ro ki. 7Duni se ɔɔpga baata 'naŋa. Taa naan̰ se iŋgki do mɛtɛkse ki ɔɔ 'ɗaapki rose taa aki keem Raa. 8Kɛn cir paac paac se, 'jeki naapa ute maakŋ kalaŋ, taa ute maak‑jese se, kɛn deba tɛɗi kusin̰a aan gɔɔ ɗi kic ɓo an̰ kɔŋ tɛɗn kalɗɛ. 9Jee kɛn ɓaaɗo gɔtse ki se, ɔkɗeki jiga ɔɔ ɔn̰te tɛɗɗeki bɛs. 10'Jeelki naŋa naŋa kic ɓo Raa ɛɗin̰ga naabin̰ naabin̰a. Bin se 'noogki naapa, taa naase se 'tɛɗkiga jee tɛɗn naabm Raage gɛn tɛɗn naabgen paacn̰ kɛn naan̰ ɛɗsesin̰ se, ute ɗoobin̰a. 11Debm jeel taaɗn taara se, n̰'taaɗ taar Raa jeege tu. Ɔɔ debm Raa ɛɗin̰ga maak‑je gɛn tɛɗn naaba jeege tu se, n̰'tɛɗin̰ ute tɔɔgŋ kɛn Raa ɛɗin̰ se. Ute naan̰ se jaay ɓo, jeege paac 'tɔɔm Raa ute ɗoobm Isa al‑Masi. Naan̰ ɓo debm magala ɔɔ tɔɔgɔ gɛn daayum daayum! Amin. 12Jee maak‑jemge, nakŋ ɔɔn̰ jaay aanga dose ki se, ɔn̰te kaakin̰ki aan gɔɔ nakŋ deel doa ɔɔ ɔksen taaɗ eyo. Num aakin̰ aan gɔɔ nakŋ kɛn lee aan kaan do jeege tu tap. 13Num kɛn naase jaay 'dabarki taa al‑Masi se, ɔn̰ki maakse 'raapo. Taa ɓiin naan̰ aɗe ɓaa maakŋ gaarin̰ ki se, naase kic utu aki kɔŋ maak‑raapm gɛn taaɗ eyo. 14Kɛn k'naajse taa Isa al‑Masi se, ɔn̰ki maakse 'raapo. Taa Nirl Salal kɛn ɔk nooko kɛn iin̰o gɔtn Raa se, 'tɛɗn ute naase. 15Anum maakse ki se, nam j'ɔn̰te dabarin̰ taa tɔɔl nam, taa ɓoogo, taa tɛɗn kusin̰a, ey lɛ taa ɔl don̰ maakŋ taar jeege tu. 16Num kɛn k'dabarin̰ taa al‑Masi se, sɔkɔn̰ɔ ɔn̰te tɔɔlin̰a naɓo n̰'tɔɔm Raa taa jeege daŋin̰ naan̰ debm al‑Masi. 17Kaaɗ kɛn Raa an kɔjn̰ bɔɔrɔ do jeege tu se, ɓɔrse aanga. Ɔɔ kɛn Raa jaay 'baagŋ kɔjn̰ bɔɔrɔ do jee naan̰ge tu ɓo deet se, bin num jee kɛn jaay baate tookŋ kaal maakɗe do Labar Jigan gɛn Raa ki se, 'tɛɗn ɔɔ ɗio? 18Taa Kitap taaɗ ɔɔ: Kɛn jee tɛɗn nakgen ute ɗoobin̰ kic ɓo, utu ɔɔn̰ jaay 'kɔŋ kaaja se, num jee aal Raa maak ki eyo ute jee kusin̰ge se tap ɓo k'tɛɗn roɗe j'ɔɔ ɗio? 19Bin ɓo, jee kɛn Raa je ɔɔ naaɗe 'dabar se, j'aay kaamɗe k'tɛɗ nakŋ bɛɛ. Taa Raa kɛn tuj ɔrmin̰ ey se, naan̰ ɓo Mɛl Kaalɗe ɔɔ j'ɔn̰ roɗe kaam jin̰a.

will be added

X\