1 Pierre 2

1Taa naan̰ se, ɔn̰te 'tɛɗki kusin̰a, ɔn̰te 'kaan̰ki jeege dala, ɔn̰te 'tɛɗki rose aan gɔɔ jee kɛn taaɗ taar mɛt ki te naapa, ɔn̰te 'tɛɗki maak‑kilimi te naapa ɔɔ ɔn̰te 'kɔɔɗki naapa. 2Aan gɔɔ gaangen k'taacege je si kɛn̰ɗege dɛn se, naase kic taar Raa kɛn salal se 'jen̰ki dɛn bin kici. Ute naan̰ se naase aki teepe ɔɔ utu aki kɔŋ kaaja. 3Ɗeere, bɛɛ Mɛljege se lɛ, naase 'naam ɔkin̰kiga jiga. 4'Ɓaakiro gɔtn Mɛljege tu Isa ki, naan̰ ɓo ko kɛn ɛɗ kaaja. Naan̰ ɓo ko kɛn jikilimge ɔɔɗ undin̰a, naɓo Mɛljege Raa bɛɛr ɔɔɗin̰a ɔɔ naan̰ se ɓo kɛn aakin̰ bɛɛ kaamin̰ ki. 5Naase kic aan gɔɔ kogen ɔŋga kɔŋ kaaja, 'tookki ɔn̰ki rose Raa an kiin̰ ɓee kɛn Nirlin̰ utu 'kiŋg maak ki se. Ɔɔ maakŋ ɓee kɛn se, naase aki tɛɗn jee tɛɗn sɛrkgen salal ɔɔ ute ɗoobm Isa al‑Masi se, naase an̰ki tɛɗn sɛrkŋ kɛn tɔɔlin̰ naan̰ ki. 6Anum 'booyki taar kɛn Raa taaɗ maakŋ Kitap ki kɛn ɔɔ: Aakki! Maam m'bɛɛr m'ɔŋga ko kɛn aak bɛɛ kaamum ki Ɔɔ maam m'utu m'an̰ kɔnd maakŋ gɛgɛr kɛn Sion ki Ɔɔ naan̰ ɓo ko kɛn utu 'gakŋ ɓea kɛn j'utu j'an̰ kiin̰in̰ se. Debm kɛn aal maakin̰ do naan̰ ki se, 'kɔŋ kɛnd maakŋ sɔkɔn̰ ki eyo. 7Naasen kɛn aalkiga kaal maakse don̰ ki se, ko se jigsen aak eyo. Num gaŋ jee kɛn baate kaal maakɗe don̰ ki se, taar kɛn Kitap taaɗ se aanga gɔɔin̰ ki kɛn ɔɔ: Ko kɛn jee kiin̰ ɓeege ɔɔɗ undin̰ naatn se, Naan̰ ɓo ko mɛc kɛn cir kogen j'iin̰ ɓee se paac. 8Ɔɔ gɔt kuuy kic Kitap taaɗga taaɗ ɔɔ: Ko se ɓo kɛn rɔɔk jeege Ɔɔ kɛse ɓo liŋ kɛn tund jeege. Naaɗe jaay rɔɔkŋ tooc se, taa naaɗe baate kaal maakɗe do Taar Raa ki. Kɛse nakŋ kɛn Raa uunoga kuun doa do dɔkin̰ se ɓo utu kaan doɗe ki. 9Anum naase se, mɛtjil jee kɛn Raa bɛɛr tɔɔɗsenga tɔɔɗo, naase se jee tɛɗn sɛrkŋ gɛn gaarin̰ge, naase se jee naan̰ge ɔɔ naan̰ ɓo debm kɛn dugsenga dose. Naan̰ daŋ ɔɔɗseno maakŋ gɔt kɛn ɔɔɗɔ ɔɔ ɓaanseno maakŋ gɔtin̰ kɛn wɔɔr jiga se, taa naase aki wɔɔkŋ Taar Raa se jeege tu, do nakge tun magal magal kɛn naan̰ tɛɗin̰ se. 10Do dɔkin̰ se naase jee Raage eyo, num ɓɔrse se, naase 'tɛɗkiga jee naan̰ge. Do dɔkin̰ se naan̰ ɛɛjo te dose ki eyo, num ɓɔrse se, naan̰ ɛɛjsenga dose ki. 11Jee maak‑jemge, maam m'dɛjse, do naaŋ ki ara se naase aan gɔɔ mɛrtge ɔɔ aan gɔɔ cɛkge. Bin num ɔn̰te 'dɔŋki nakŋ kɛn daa rose ɓo jea; ɓɛrɛ, nakgen daa rose ɓo je se lee tɛɗ bɔɔrɔ ute kose. 12Maakŋ jeege tun jeel Raa mal ey se, iŋgki aak bɛɛ naan Raa ki. Ɔɔ kɛn naaɗe jaay baagga taaɗ taargen iŋg kus rose ki aan gɔɔ naase jee tɛɗ kusin̰ jeege tu kic ɓo, ute naabsen naase 'tɛɗin̰ jiga se, ɓii kɛn Raa aɗe ɓaa se, jeegen jeel Raa mal ey se, an̰ nooko. 13'Sookki tɔɔgge tu taa Mɛljege Isa al‑Masi se, ɔɔ 'sookki gaar tu taa naan̰ ɓo debm do jeege tu paac, 14'sookki magalge tun gaarge tɔndɗe se. Naan̰ tɔndɗe se taa 'dabar jee kɛn lee tuj jeege tu ɔɔ 'tɔɔm jee kɛn lee tɛɗ bɛɛ. 15Taa Raa se, je naase aki tɛɗn nakgen jiga jiga ɔɔ bin ɓo jee dɛrlgen jeel ɗim ey se, 'kɔŋ taar taaɗ eyo. 16Iŋg aalki dose sɛn̰ aan gɔɔ jee kɛn ɔŋga kɔŋ doɗe. Naase se ɔŋkiga dose, naɓo kɔŋ dosen ɔŋki se, ɔn̰ten 'saapki ɔɔki ɔŋkiga ɗoobo gɛn tɛɗn kusin̰a. Num gaŋ naase se, iŋgki aan gɔɔ jee tɛɗn naabm Raage. 17Jikilimge paac aalɗeki maak ki, 'jeki gɛnaasegen ɗoobm Isa al‑Masi ki, 'ɓeerki Raa ki ɔɔ 'sookki gaar tu. 18Naase jeegen kɛn 'lee 'tɛɗki naaba gɔtn jeege tu se, 'booy uunki taar mɛlsege. Kɛn aki booy taar mɛlsege se, ɔn̰te 'booyki taar jee kɛn tɛɗsen bɛɛ ɔɔ jese sum eyo, num gaŋ 'booy uunki taar mɛlsegen kusin̰ kusin̰ se kici. 19Kɛn k'dabarse cɛrɛ se kic jaay naase aasin̰ki se, taa taar Raa sum ɓo naase ɔn̰ki rose k'dabarse se; kɛse ɓo nakŋ kɛn tɔɔl Raa ki. 20Kɛn 'tɛɗ kusin̰ jaay k'dabari se, bɛɛn̰ tap ɓo ɗi? Anum kɛn 'tɛɗki bɛɛ jaay ɔn̰ki rose k'dabarse se, kɛse nakŋ jiga aak eyo naan Raa ki. 21Raa daŋseno se taa naan̰ se, taa Isa al‑Masi se kic dabaroga taa naase ɔɔ naan̰ ɓo debm taaɗsen ɗoobo taa naase kic aki kuun bɔlɔtin̰a. 22Naan̰ se tɛɗ te kusin̰ eyo ɔɔ ɓii kalaŋ tap ɓo tɛɗ te taar‑kɔɔɓ eyo. 23Kɛn k'naajin̰ kic ɓo naan̰ tɛrl te taar iŋg kus nam ki eyo. K'dabarin̰ kic ɓo, naan̰ tɛɗ te kusin̰ nam ki eyo. Num nakge paac naan̰ ɔn̰in̰ kaam ji debm kɛn utu 'kɔjn̰ bɔɔrɔ te ɗoobin̰ se do jeege tu. 24Kɛn Isa ooy do kaag ki se, naan̰ uun kusin̰jege don̰ ki taa ajeki gaaŋ te kusin̰a ɔɔ j'aki kiŋg gɛn tɛɗn nakgen te ɗoobin̰a. Ɔɔ ute dubar kɛn naan̰ ɔŋ se ɓo, ɛɗjeki kaaja. 25Do dɔkin̰ se naase aan gɔɔ baatgen iigga kiigi, num ɓɔrse se naase ɔk 'tɛrlkiroga gɔtn debm gaam ki. Naan̰ ɓo debm bɔɔb kose.

will be added

X\