1 Pierre 1

1Kɛn ara maam m'Piɛr, kɛn debm kaan̰ naabm Isa al‑Masi ɓo m'raaŋsen maktubm se, naase kɛn Raa bɛɛr tɔɔɗsenoga tɔɔɗo ɔɔ iŋgki aan gɔɔ cɛkge ɔɔ wɔɔkkiga maakŋ naaŋge tun Pɔŋ ki, Galat ki, Kapados ki, Azi ki ɔɔ Bitini ki se. 2Naase se Raa Bubu bɛɛr tɔɔɗsenoga tɔɔɗo do dɔkin̰a, kaaɗ kɛn naan̰ uuno doa aan gɔɔ kɛn naan̰ maakin̰ jen ro ki. Ɔɔ ute Nirl Salal se, naan̰ tɛɗsenga 'tɛɗkiga jee naan̰ge gɛn tookŋ taar Isa al‑Masi taa naan̰ asen tugŋ ɗaapm ute moosin̰a. Ɔn̰ Raa asen tɛɗn bɛɛn̰a ɔɔ asen kɛɗn lapin̰ se te maraadin̰a. 3K'tɔɔmki Raa, naan̰ Bubm Mɛljege Isa al‑Masi! Naan̰ se ɛɛjjeki dojege tu ɔɔ oojjenkiga koojn̰ kiji ute ɗoobm Isan kɛn naan̰ durin̰o daan yoge tu se. Taa naan̰ se ɓo, daayum naajege k'j'ɔndki dojege gɛn kɔŋ kaaja, 4ɔɔ j'aakki kaama gɛn nakgen bɛɛ bɛɛ kɛn Raa utu bɔɔbin̰ jeen̰ge tu maakŋ raa ki. Ɔɔ nakgen bɛɛ bɛɛ ese se, tuj eyo, ruum eyo ɔɔ ɔŋ tɛɗ koono eyo. 5Taa kaal maaksen naase aalki do Raa ki se, Raa mala asen bɔɔbm te tɔɔgin̰a bini ɓii kɛn kaam mɔɔtn; ɓii kɛn se, naan̰ asen taaɗn tal ɔɔ naan̰ aajsega. 6Taa kaajn̰ naase ɔŋki se, naase 'maakse raap sakan̰. Ɔɔ kɛn napar dubargen aan dose ki se jaay asen kɛɗn maak‑tuju kic ɓo, cɔkɔ sum ɓo dubargen se utu 'deele. 7Daab se naan̰ kɔŋ tuju, ute naan̰ se kic ɓo j'ɔɔyin̰ pooɗn jaay tɛɗ daabm mɛc. Kaal maakse kic Raa tɛɗin̰ tec bini, taa kaal maaksen do Raa ki se, naan̰ cir daab. Aan gɔɔ daab k'j'ɔɔyin̰ga pooɗn jaay tɛɗ daabm mɛc se, kaal maakjege kic ɓo ute dubargen aan dojege tu se, ute naan̰ se jaay ɓo kaal maakjegen do Raa ki se 'tɛɗn tɔɔgɔ ɔɔ j'ansin̰ kaakŋ jeele. Taa naan̰ se ɓo, ɓii kɛn Isa al‑Masi aɗe ɓaa se, Raa utu asen tɔɔmɔ, asen nooko ɔɔ asen magala. 8Ey num Isa se, naase aakin̰ki te eyo naɓo naase 'jen̰ki. Ɓɔrse kic naase aakin̰ki te eyo, naɓo naase aalki maakse don̰ ki. Ute naan̰ se kic ɓo, naase maakse raap sakan̰ don̰ ki ɔɔ maak‑raapm naase se maak‑raapm taaɗ eyo. 9Taa naase 'jeelki, ute kaal maaksen naase aalki don̰ ki se ɓo, naase utu aki kaajn̰ kosege. 10Kaajn̰ ese se, jee taaɗ taar teeco taar Raa ki do dɔkin̰ se, jeɗoga mɛtin̰ dɛn aak eyo. Naaɗe taaɗoga jeege tu taa bɛɛ kɛn Raa taaɗoga taaɗa ɔɔ utu asesin̰ tɛɗ se. 11Nirl al‑Masi kɛn maakɗe ki se, taaɗɗen ɔɔ al‑Masi se utu 'dabara jaay ɓo utu 'kɔŋ nooko. Taa naan̰ se ɓo, jee taaɗ taar teeco taar Raa ki jeɗo mɛtin̰a ɔɔ jeɗo jeel kaaɗn kɛn nakgen se tap ɓo utu 'deel ɔɔ ɗi. 12Anum taar kɛn Raa taaɗo jee taaɗ taar teeco taar Raa ki do dɔkin̰ se, taar se taaɗ te naaɗe eyo num taaɗ te naase. Ɓɔrse jee taaɗ Labar Jigan gɛn Isa al‑Masi ute Nirl Salal kɛn Raa ɔlin̰o maakŋ raa ki ɓaaɗo taaɗsen mɛtn taar se mala naase ki kici. Ɔɔ taar se, kɔɗn Raage kic ɓo, je ɗoobm 'jeel kɔkŋ mɛtin̰a. 13Kɛn bin num, 'ɗaapki rose gɛn tɛɗn naaba, iŋgki do mɛtɛkse ki ɔɔ aakki kaama do bɛɛ kɛn Isa al‑Masi ɓaaɗoga num utu asen tɛɗ se. 14'Tookki taar Bubse Raa ɔɔ ɔn̰te 'tɛɗki nakŋ kɛn daa rose ɓo jea aan gɔɔ kaaɗ kɛn naase utu 'jeelki te Raa ey ɓɔrt se. 15Aan gɔɔ Raa kɛn daŋse naan̰ debm salal se, naase kic maakŋ kiŋgse ki se, 'tɛɗki jeegen salal kici; 16taa Kitap se taaɗga taaɗ ɔɔ: «'Tɛɗki jeegen salal taa maam se m'debm salal.» 17Raa kɛn naase 'daŋin̰ki Bubse se, naan̰ ɓo kɛn aak jeege paac aas kaasa ɔɔ naŋa kic naan̰ ɔjin̰ bɔɔrɔ te kɛn mɛt ki do nakge tun naan̰ lee tɛɗ se. Bin num, kaaɗ kɛn naase utu 'tiŋgki tiŋg do naaŋ ki se, Raa se 'ɓeerin̰ki. 18Ute kiŋgsen aan gɔɔ gɛn bubsegen do dɔkin̰ se ɔs aay eyo. Taa naan̰ se 'jeelki, Raa se dugsega dose ute zo ɔɔn̰ɔ. Naan̰ dugse dose se, ute nakgen aan gɔɔ daab ute pudda eyo taa naaɗe se utu 'tuju; 19num gaŋ naan̰ dugseno dose ute moosn al‑Masi, aan gɔɔ Goon Baatn sal sal kɛn ɔk tuju ron̰ ki eyo jaay ɛɗ ron̰ sɛrkɛ se. 20Naan̰ se Raa ɓo bɛɛr ɔɔɗin̰o taa kaajn̰ jeege, kaaɗ kɛn naan̰ utu aalo te duni ey ɓɔrtɔ. Ɔɔ naan̰ ɓaaɗo maakŋ ɓiige tun kaam mɔɔtn taa naase. 21Ute ɗoobm al‑Masi se ɓo, naase aalki maakse do Raa kɛn durin̰o daan yoge tu ɔɔ nookin̰ se. Ute naan̰ se ɓo, naase aalki maakse ɔɔ ɔndki dose do Raa ki. 22Taa naase 'tookkiga do taar kɛn mɛt ki se, naase 'tɛɗkiga jeegen salal. Kɛn bin num 'jeki naapa aan gɔɔ gɛnaage. Ɔkki naapa ɔɔn̰ɔ ɔɔ 'jeki naapa ute maakŋ kalaŋ. 23Taar Raa se, naan̰ aan gɔɔ kupm kɛn ruum eyo ɔɔ tuj eyo, num naan̰ tiŋg gɛn daayum daayum ɔɔ ute taar Raa aan gɔɔ kupu se, naan̰ ɔlsen j'oojsenga koojn̰ kiji. 24Taa Kitap taaɗga taaɗ ɔɔ: Jikilimge paac aan gɔɔ mu zɛɛrɛ ɔɔ kaakŋ bɛɛɗe lɛ aan gɔɔ pɔɔn̰ kaaga. Kɛn kaaɗin̰ aanga se, mu se 'tuutu ɔɔ pɔɔn̰in̰ lɛ 'sia. 25Num gaŋ taar Raa se, naan̰ tiŋg gɛn daayum. Ɔɔ taar se ɓo, Labar Jigan gɛn Isa al‑Masi kɛn k'ɓaaɗo k'taaɗsesin̰ se.

will be added

X\