1 Jean 5

1Debm kɛn jaay took ɔɔ Isa se naan̰ ɓo al‑Masi se, debm bin se naan̰ se ɓo goon Raa. Debm jaay je bubin̰ se, 'je gɛnaan̰gen gaan bubin̰ge se kici. 2Kɛn naajege jaay k'jeki Raa ɔɔ k'tɛɗki nakŋ kɛn naan̰ taaɗjeki gɛn tɛɗa se, bin se naajege k'jeelki naajege se k'jeki gaan Raage. 3'Booyki, kɛn naajege jaay k'jeki Raa ɗeer num, nakgen naan̰ taaɗjeki ɔɔ gɛn tɛɗa se, j'aki kiŋg do ki. Ɔɔ nakgen naan̰ taaɗjeki gɛn tɛɗa se lɛ, ɔɔn̰ eyo. 4Taa debm tɛɗga goon Raa se, naan̰ tɔɔg cir nakgen kusin̰ do duni ki se. Ɔɔ kɛn tɛɗjeki jaay k'tɔɔgki cirki nakgen kusin̰ do duni ki se, taa naaje j'aalkiga kaal maakjege do al‑Masi ki. 5Naŋa jaay tɔɔg cir nakgen kusin̰ do duni ki se? Debm tɔɔg cir nakgen kusin̰ do duni ki se, debm kɛn took ute maakin̰ paac ɔɔ Isa al‑Masi se Goon Raa. 6Isa al‑Masi ese ɓo kɛn ɓaaɗo do naaŋ ki se, k'batizin̰ maan ɔɔ ɔn̰ ron̰ sɛrkɛ ɔɔ moosin̰ ɔɔyo. Naan̰ ɓaaɗo se k'batizin̰ maan sum eyo, num ɔn̰ moosin̰ ɔɔyga kici. Nirl Raa mala kic ɓo taaɗjekiga saaɗin̰a, taa Nirl Raa se taaɗ taar mɛt ki. 7Naaɗen mɔtɔ se ɓo kɛn saaɗge: 8Nirl Raa, maan k'batizn Isa ɔɔ moosn Isa, naaɗen mɔtɔ se paac taaɗ mɛtn saaɗn kalaŋ sum. 9K'jeelki kɛn jeege jaay ɓaaɗo taaɗjeki saaɗɗege se, naajege k'lee k'tookki; bin num saaɗn gɛn Raa se, mɛt ki cir daala. 'Ɓooyki, kɛse saaɗn gɛn Raa ɔɔ: naan̰ se ɓo taaɗjeki saaɗn gɛn Goonin̰ se. 10Debm jaay aal maakin̰ do Goon Raa ki se, naan̰ took do saaɗn Raa ki se. Debm jaay baate kaal maakin̰ do Raa ki se, naan̰ tɛɗ Raa ɓo debm taar‑kɔɔɓɔ. Taa naan̰ baate tookŋ do saaɗ kɛn Raa taaɗo ro Goonin̰ ki se. 11Kɛse ɓo saaɗn kɛn Raa taaɗjeki: Raa se ɛɗjekiga kaajn̰ gɛn daayum, ɔɔ kaajn̰ gɛn daayum ese se naan̰ ɛɗjesin̰ki ute ɗoobm Goonin̰a. 12Debm jaay iŋg dɔɔk ute Goon Raa kalaŋ se, naan̰ ɔŋga kaaja; ɔɔ debm jaay iŋg dɔɔk ute Goon Raa kalaŋ ey se, naan̰ ɔk kaaj eyo. 13Maam m'raaŋseno nakgen se paac se, taa naase jee aalkiga kaal maakse do Goon Raa ki se, aki jeele naase se ɔŋkiga kaajn̰ gɛn daayum. 14Naan Raa ki se naajege k'ɓeerki ɗim ki ey paac paac, taa kɛn k'tɔndkiga mɛtn ɗim kɛn naan̰ maakin̰ jen ro ki se, naan̰ lee booyjeki booyo. 15K'jeelki nakŋ kɛn naajege k'tɔndkiga mɛtn ɗim gɔtin̰ ki ɓo, naan̰ lee booyjeki booy ɗey se, bin se nakŋ jaay kɛn k'tɔndkiga mɛta gɔtin̰ ki se, k'jeelin̰ki maakjege tu aan gɔɔ k'j'ɔŋin̰kiga. 16Kɛn debm jaay aak gɛnaan̰ tɛɗ tɛɗ kusin̰ se ɔɔ kusin̰ naan̰ tɛɗ tɛɗ se jaay an̰ kɔlin̰ gɔtn kut ki ey num, n̰'tɔnd mɛtn Raa taa gɛnaan̰ se, ɔɔ Raa utu an̰ kɛɗn kaaja; kɛn kusin̰ gɛnaa tɛɗ tɛɗ se jaay an̰ kɔl gɔtn kut ki ey se, taa kusin̰ kalaŋ se, debm tɛɗin̰ga num ɔlin̰ gɔtn kut ki. Maam m'taaɗsen m'ɔɔ aki tɔnd mɛtn Raa se, taa debm kɛn tɛɗ kusin̰ an̰ kɔl gɔtn kut ki se eyo. 17Nakgen k'tɛɗki ute ɗoobin̰ ey paac se, naaɗe se kusin̰a naan Raa ki. Naɓo kusin̰a paac se ɔŋ ɔl deba gɔtn kut ki eyo. 18Naajege k'jeelki debm tɛɗga goon Raa se, naan̰ lee tɛɗ kusin̰ eyo, taa Goon Raa se bɔɔbin̰a, ɔɔ Bubm jee kusin̰ge se, ɔk tɔɔgɔ don̰ ki eyo. 19K'jeelki naajege se k'tɛɗkiga jee Raage, num gaŋ jee do naaŋ ki paac se naaɗe se kaam ji Bubm jee kusin̰ge. 20Naajege k'jeelki Goon Raa ɓaaɗo do naaŋ ki se ɔɔ ɛɗjekiga jeele kɛn j'anki jeel Raa ɗeere. Ute Goonin̰ Isa al‑Masi se, naajege k'dɔɔkkiga kalaŋ ute Raa ɗeer se. Naan̰ se ɓo Raa kɛn ɗeer ɗeer ɔɔ kɛn ɛɗ kaaja daayum jeege tu. 21Gɛnumgen sɛɛmɛ, ɔɔɗki dose dɔkɔ ro maragge tu.

will be added

X\