1 Jean 4

1Jee maak‑jemge, kɛn jeegen jaay ɓaaɗo taaɗsen ɔɔ naaɗe ɔk Nirl Raa se, naase ɔn̰te 'naar 'tookki mɛtn taarɗe, num gaŋ aak ɔkɗeki jiga jaayo. Ute naan̰ se jaay ɓo, naase aki jeele kɛn naaɗe se jee Raage ɗeer num. Taa jee kɛn tɛɗ roɗe aan gɔɔ jee taaɗ taar teeco taar Raa ki se, ɓaaɗoga dɛna ɔɔ wɔɔkga do naaŋ ki. 2Ute naan̰ se jaay ɓo naase aki 'jeel debm ɔk Nirl Raa se: debm kɛn taaɗ ɔɔ Isa al‑Masi ɓaaɗo do naaŋ ki ɔɔ tɛɗga debkilimi se, naan̰ se ɓo debm ɔk Nirl Raa. 3Gaŋ debm jaay baate tookŋ ɔɔ Isa al‑Masi tɛɗ te debkilimi do naaŋ ki ey se, debm bin se ɔk Nirl Raa eyo. Maak‑saapm naan̰ se iin̰o gɔtn debm kɛn gɛc Isa al‑Masi. Naan̰ se ɓo kɛn naase 'booykiga ɔɔ utu ɓaaɗo ɔɔ ɓɔrse se naan̰ utu do duni ki. 4Num naase gɛnumgen sɛɛmɛ, naase se jee Raage ɔɔ naase se 'cirkiga jeegen tɛɗ roɗe aan gɔɔ jee taaɗ taar teeco taar Raa kɛn ese se, taa debm utu iŋg ute naase maakse ki se, naan̰ tɔɔg cir debm utu iŋg do duni ki se. 5Jeegen tɛɗ roɗe aan gɔɔ jee taaɗ taar teeco taar Raa ki se, naaɗe se jee do duni ki. Taa naan̰ se ɓo, naaɗe taaɗ te nakgen gɛn do dunia ɔɔ jee do duni ki se, booy uunɗen taarɗe. 6Gaŋ naajege se k'jee Raage. Debm jeel Raa se, booyjeki taarjege ɔɔ debm kɛn gɛn Raa ey lɛ, booyjeki taarjege eyo. Ute naan̰ se ɓo, naajege j'aki jeele debm ɔk Nirl Raa maakin̰ ki se taaɗ taar mɛt ki, ɔɔ debm ɔk Nirl Raa maakin̰ ki ey se lɛ, taaɗ taar‑kɔɔɓɔ. 7Jee maak‑jemge, k'jeki naapa, taa maak‑je se iin̰o gɔtn Raa ki ɔɔ debm je jeege se, naan̰ se goon Raa ɔɔ naan̰ jeel Raa. 8Debm jaay je jeege ey se, naan̰ se jeel Raa eyo, taa Raa se naan̰ Debm maak‑jea. 9'Booyki, Raa se ɔlo Goonin̰ kalaŋ lak do naaŋ ki, taa j'aki kɔŋ kaaja ute ɗoobm naan̰a. Naan̰ tɛɗn naan̰ se taa ajeki taaɗn ɔɔ naan̰ jejeki aak eyo. 10'Booyki, kɛse ɓo maak‑je kɛn Raa taaɗni: Raa se, naajege ɓo k'jen̰kiro deet eyo, anum naan̰ ɓo debm jejekiro deete ɔɔ naan̰ ɔlo Goonin̰a ɓaaɗo ɛɗ ron̰ sɛrkɛ taa ajeki tɔɔl kusin̰jege. 11Jee maak‑jemge, aan gɔɔ Raa jejeki bin se, bɛɛki num naajege kic ɓo j'aki je naapa. 12Raa se ɓii kalaŋ nam aakin̰ te eyo, kɛn naajege jaay k'jeki naapa se, Raa kic iŋg dɔɔk ute naajege. Maak‑je kɛn naan̰ jejeki se ɓo, ɔljeki naajege kic k'jeki jeege se. 13Ute naan̰ se ɓo, naajege k'jeelki, naajege se j'iŋg k'dɔɔkki ute naan̰a ɔɔ naan̰ kic iŋg dɔɔk ute naajege, taa naan̰ ɛɗjekiga Nirlin̰ mala. 14Raa Bubu ɔlo Goonin̰ do naaŋ ki se, naaje mala j'aakin̰oga ute kaamje naan̰ ɓo Debm Kaajn̰ jeegen do naaŋ ki. Kɛse ɓo saaɗn kɛn naaje k'lee k'taaɗin̰ jeege tu. 15Debm taaɗ ɔɔ Isa naan̰ Goon Raa se, debm bin se Raa iŋg dɔɔk ute naan̰a ɔɔ naan̰ kic ɓo iŋg dɔɔk ute Raa. 16Naaje k'jeelki Raa se jejeki, ɔɔ naajege j'aalkiga maakjege do Raa kɛn jejeki se, taa Raa se naan̰ Debm maak‑jea ɔɔ debm jaay je jeege daayum se, naan̰ iŋg dɔɔk ute Raa ɔɔ Raa kic iŋg dɔɔk ute naan̰a. 17Taa naan̰ se ɓo maak‑je kɛn naan̰ jejeki jaay, ɔljeki naajege kic k'jeki jeege se, taa ɓii kɛn jaay Raa utu kɔjn̰ bɔɔrɔ do jeege tu paac se, naajege j'aki kɔŋ ɓeere ey paac paac. Taa kiŋgjegen do naaŋ ki se tecga aan gɔɔ gɛn Isan kɛn tiŋgno do naaŋ ki se kici. 18Debm kɛn jeel maakin̰ ki Raa jen̰ se iŋg kic ɓo, maakin̰ ɓeer eyo. Je kɛn Raa jejeki se tɛɗjeki naajege se maakjege ɓeer eyo. Taa debm maakin̰ ɓeer se, naan̰ iŋg booy nakŋ ɔɔn̰ utu kaan don̰ ki. Taa debm kɛn iŋg jaay maakin̰ ɓeer se, je kɛn Raa jen̰ se kic ɓo, ɔŋ tɛɗin̰ ɗim eyo. 19Kɛn ɔljeki jaay k'jeki Raa ɔɔ k'jeki jeege se, taa Raa ɓo jejekiroga deete. 20Kɛn debm jaay ɗeek ɔɔ naan̰ je Raa ɔɔ ɔɔɗ und gɛnaan̰ se, debm bin se naan̰ debm taar‑kɔɔɓɔ. Ɗeere, debm kɛn gɛnaan̰ kɛn naan̰ aak ute kaamin̰ jaay jen̰ ey se, Raa kɛn naan̰ aakin̰ ute kaamin̰ ey se, naan̰ an̰ kɔŋ je ey kici. 21'Booyki, kɛse ɓo nakŋ kɛn Raa taaɗjekiro gɛn tɛɗa: debm je Raa se 'je gɛnaan̰ kici.

will be added

X\