1 Jean 3

1'Booyki, Raa Bubu se jejeki dɛna naan̰ daŋjeki k'gɛnin̰ge ɔɔ ɗeer ɗeer, k'tɛɗkiga gɛnin̰ge! Jee do naaŋ ki jaay ɔŋ jeeljeki naajege k'gaan Raage ey se, taa naaɗe ɔŋ jeel te Raa eyo. 2Jee maak‑jemge, ɓɔrse se naajege k'gaan Raage; naɓo nakŋ kɛn tɛɗga num Raa utu ajeki tɛɗ se, Raa taaɗjeki te mɛtin̰ ey ɓɔrtɔ. Anum nakŋ naajege k'jeel se, ɓii kɛn naan̰ aɗe teecn̰ pirsil se, naajege j'utu j'an̰ki tec naan̰a, taa j'utu j'an̰ki kaakŋ naan̰ mala ute kaamjege. 3Debm jaay ɔnd don̰ do naan̰ ki se, tɛɗ ron̰ debm salal aan gɔɔ Isan kɛn salal se. 4Debm daayum tiŋg tɛɗ kusin̰ se, naan̰ uum aal Ko Taar kɛn Raa ɛɗo se ɓo naaŋ ki; ɗeere debm tɛɗ kusin̰ se naan̰ uum aal Ko Taar kɛn Raa ɛɗo se ɓo naaŋ ki. 5Gaŋ naase 'jeelki Isa ɓaaɗo do naaŋ ki se, taa kɔɔɗn kusin̰ jeege. Ey num naan̰ lɛ ɔk kusin̰ eyo. 6Taa naan̰ se ɓo debm iŋg dɔɔk ute naan̰ se lee tɛɗ kusin̰ eyo. Num gaŋ debm lee tɛɗ kusin̰ se, naan̰ se jeelin̰ eyo ɔɔ aakin̰ te te eyo. 7Gɛnumgen sɛɛmɛ, ɔn̰te 'kɔn̰ki nam asen kaan̰ dala. Debm tɛɗ nakge ute ɗoobin̰ se, naan̰ debm daan ki aan gɔɔ Isan debm daan ki se. 8Gaŋ debm tiŋg tɛɗ kusin̰ se, naan̰ debm Ɓubm sitange. Taa Bubm sitange se, naan̰ baago tɛɗn kusin̰a se kaaɗ kɛn Raa utu aalo kaal do naaŋa. Taa naan̰ se ɓo Goon Raa ɓaaɗo se, taa tujn̰ naabm Bubm sitange se. 9Debm tɛɗga Goon Raa se, naan̰ iŋg maakŋ kusin̰ ki eyo. Taa Nirl Raa se utu iŋg maakin̰ ki se, naan̰ 'kɔŋ tɛɗn kusin̰ eyo taa naan̰ se tɛɗga goon Raa. 10Debm tɛɗ nakgen ute ɗoobin̰ eyo ɔɔ je gɛnaan̰ ey se, naan̰ se debm Raa eyo. Ute naan̰ se ɓo, k'jeelki kɛse gaan Raage ɔɔ kɛse gaan Bubm sitangege. 11Kɛse ɓo taar naase 'booykiro do kuun mɛt ki kɛn ɗeek ɔɔ: k'jeki naapa. 12J'ɔn̰te 'tɛɗki aan gɔɔ Kayn, naan̰ se mɛtn bubm jee kusin̰ge. Naan̰ se ɓo debm kɛn tɔɔlɔ gɛnaan̰a. Taa ɗi kɛn naan̰ tɔɔlin̰a? Taa Kayn se nakŋ naan̰ tɛɗ se jig eyo, num gaŋ nakŋ gɛnaan̰ tɛɗ se ɓo, kɛn ute ɗoobin̰a. 13Gɛnaamge, kɛn jee do naaŋ ki jaay ɔɔɗ und se num, naase ɔn̰te 'kaakin̰ki aan gɔɔ nakŋ deel dose. 14K'jeelki naajege se k'teeckiga maakŋ yo ki ɔɔ ɓɔrse j'ɔŋkiga kaaja taa naajege k'jeki naapa. Debm jaay je gɛnaan̰ge ey se, naan̰ se utu iŋg kiŋg maakŋ yo ki. 15Debm jaay ɔɔɗ und gɛnaan̰ se, naan̰ se debm tɔɔl jeege ɔɔ 'jeelki debm tɔɔl jeege se ɔk kaajn̰ gɛn daayum eyo. 16'Ɓooyki, Isa se ɓaaɗo ɛɗ ron̰ taa naajege se: ute naan̰ se jaay naajege k'jeelki naan̰ se taaɗjeki ɗoobm j'an̰ki je gɛnaajege. Bin se naajege kic ɓo j'aki kɛɗn rojege taa gɛnaajege. 17Kɛn debm jaay ɔk ɗim ɔɔ aak gɛnaan̰ ɔk ɗim ey jaay ɛɛjin̰ don̰ ki ey se, debm bin se kɛn naan̰ ɔɔ je Raa kic ɓo jen̰ eyo. 18Taa naan̰ se ɓo gɛnumgen sɛɛmɛ, j'ɔn̰te 'jeki naapa ute taarjege sum, num k'tɛɗki nakgen kɛn taaɗ ɔɔ naajege se k'jeki naapa mala mala. 19Bin se jaay j'aki 'jeele naajege se k'tɛɗkiga gaan Raagen ɗeere. Taa naan̰ se ɓo nirljege ajeki kaay naanin̰ ki eyo. 20Bin se, naajege k'jeelki te maakjege kɛn naajege k'tujkiga ɗim jaay nirljege aayjeki kic num, Raa se naan̰ magala ɔɔ jeel naŋ nakŋ maakjege tu paac. 21Jee maak‑jemge, kɛn nirljege jaay aayjeki ey se, k'ɓaakiga naanin̰ ki gɛn keemin̰ kic ɓo j'aki ɓeer ey paac paac. 22Nakgen paac naajege k'tɔndki mɛta gɔtin̰ ki se, naan̰ ɛɗjeki, taa naajege k'lee k'tɛɗki nakgen kɛn naan̰ lee taaɗjeki gɛn tɛɗa ɔɔ k'tɛɗki nakŋ kɛn tɔɔlin̰ naan̰ ki. 23'Booyki, kɛse ɓo nakŋ kɛn naan̰ taaɗ ɔɔ gɛn tɛɗa: nakŋ naan̰ je se, j'aki kaal maakjege do Goonin̰ Isa al‑Masi ki, ɔɔ tɛr j'aki je naapa aan gɔɔ kɛn Raa taaɗjeki ɔɔ j'aki tɛɗ se. 24Debm kɛn iŋg do nakge tun kɛn Raa taaɗ ɔɔ gɛn tɛɗa se, naan̰ se iŋg dɔɔk ute Raa ɔɔ Raa kic iŋg dɔɔk utu naan̰a. Ute naan̰ se jaay naajege k'jeelki Raa se iŋg dɔɔk ute naajege, ute ɗoobm Nirl kɛn naan̰ ɛɗjeki se.

will be added

X\