1 Jean 1

1Naaje k'taaɗsen ute debm k'daŋin̰ Taara kɛn ɛɗ kaaja se. Kɛn Raa aalo te duni ey ɓɔrt se, debm kɛn k'daŋin̰ Taara se utu tap. Naaje k'booyoga taarin̰ kɛn naan̰ taaɗ se, ɔɔ j'aakin̰ga ute kaamje mala kici. Naaje j'aak j'ɔkin̰ga ɔɔ k'naamin̰ga ute jije. 2Kɛn debm ɛɗ kaaja jaay ɓaaɗo se, naaje j'aakin̰ga ute kaamje ɔɔ naaje se k'saaɗin̰ge. Ɔɔ naaje k'taaɗsen se ro taar debm kɛn ɛɗ kaajn̰ gɛn daayum. Do dɔkin̰ se naan̰ tiŋgo ute Raa Bubu, ɔɔ ɓɔrse Raa taaɗjenkiga mɛtin̰ naajege tu. 3Nakgen naaje mala j'aako ute kaamje ɔɔ k'booyo ute bije se ɓo, k'taaɗsesin̰ naase ki kici, taa naase kic ɓo aki tum kalaŋ ute naaje. Ɔɔ tum kɛn j'aki tum kalaŋ se, j'aki tum ute Raa Bubu ɔɔ ute Goonin̰ Isa al‑Masi. 4Naaje k'raaŋ j'ɔlsen taargen se taa maak‑raapjege se, 'tɛɗn maak‑raapm maraadin̰ ki. 5'Booyki kɛse ɓo taar kɛn naaje k'booyo gɔtn Goonin̰ ki ɔɔ k'taaɗsesin̰a: Raa se naan̰ gɔtn wɔɔrɔ ɔɔ gɔtn ɔɔɗ se gɔtn naan̰ ki gɔtɔ. 6Kɛn naajege jaay k'taaɗki j'ɔɔki naajege j'utuki Raa se, k'tum k'tɛɗkiga kalaŋ se, ɔɔ jaay k'leeki maakŋ gɔt kɛn ɔɔɗ num, kɛse naajege ɓo k'jee taar‑kɔɔɓge ɔɔ k'tɛɗki nakŋ kɛn mɛt ki eyo. 7Num gaŋ kɛn k'leeki maakŋ gɔt kɛn wɔɔrɔ, aan gɔɔ Raa mala kic iŋg gɔt kɛn wɔɔr se, bin se naajege k'tum k'tɛɗkiga kalaŋ ute naapa ɔɔ moosn Goonin̰ Isa se ajeki tugŋ kusin̰jege. 8Kɛn naajege jaay k'ɗeekki j'ɔɔki naajege k'tɛɗki te kusin̰ ey se, kɛse j'an̰ki ro naaje malin̰ge ɓo daala ɔɔ taar Raa mɛt ki se, maakjege tu gɔtɔ. 9Anum kɛn naajege jaay k'taaɗki kusin̰jege se, kɛn bin se Raa utu ajeki tɔɔl kusin̰jege, ɔɔ naan̰ ajeki tugŋ ɗaapm naanin̰ ki ɔɔ kusin̰jege se naan̰ an̰ kɔɔɗn naatn. Taa Raa se naan̰ debm daan ki ɔɔ tuj ɔrmin̰ eyo. 10Kɛn naajege jaay k'ɗeekki j'ɔɔki naajege k'tɛɗki kusin̰ ey se, kɛn bin se naaje k'tɛɗki Raa ɓo debm taar‑kɔɔɓɔ ɔɔ taar naan̰ taaɗjeki se naaje j'ɔkin̰ki maakjege tu eyo.

will be added

X\