1 Corinthiens 9

1Anum, maam se nakŋ ɔk tɔɔgɔ dom ki utu la? Maam se, m'debm kaan̰ naabm Isa ey la? Ɔɔ Mɛljege Isa se, maam m'aakin̰oga ute kaamum ey la? Naase se, maam ɓo m'ɓaanseno ɗoobm Mɛljege tu ey la? 2Kɛn jee kuuy jaay ɔɔ maam se m'debm kaan̰ naabm Isa al‑Masi ey kic ɓo, naase se 'jeelki maam m'debm kaan̰ naabm Isa al‑Masi. Aan gɔɔ naase 'dɔɔkkiga ute Mɛljege se ute naase se ɓo, jeege jeele maam se m'debm kaan̰ naabm Isa. 3Jee kɛn ɔkum mindum se, kɛse ɓo taar kɛn maam m'ɔko kɛn m'je m'aɗen tɛrlɛ: 4taa naabm kɛn naaje k'tɛɗ se, naaje j'ɔk ɗoobo kɛn naase ajeki kɛɗn kɔsɔ ute kaaye ey ne? 5Naaje se j'ɔk ɗoobo gɛn tɔkŋ mɛndgen ɗoobm al‑Masi ki ɔɔ gɛn lee ute mɛndjege aan gɔɔ jee kaan̰ naabm Isa al‑Masigen kuuy ute gɛnaa Mɛljege Isa ɔɔ aan gɔɔ Piɛr se ey la? 6Lɔɓu maam m'ute Barnabas kaljeki sum ɓo, k'tɛɗn naaba ute jije jaay j'an kɔsn ne? 7Naase 'booykiga la kɛn deba uunga asgar jaay, naan̰ malin̰ ɓo ɓaa jeɗo gurs taa an kɔgŋ ro naan̰ malin̰ se, utu ne? Ɓii kalaŋ jaay deba naab maakŋ gɔtin̰ jaay 'kɔŋ kɔsn nakŋ maakŋ gɔtin̰ ki ey se, utu ne? Lɔ debm gaama jaay aay si maalin̰ge ey se, utu ne? 8Anum nakŋ kɛn maam m'taaɗsen se, jikilimge ɓo lee tɛɗin̰ sum eyo, num Ko Taar kɛn Raa ɛɗo Musa ki kic ɓo taaɗin̰ga taaɗa. 9Taa Ko Taar kɛn Raa ɛɗo Musa ki se k'raaŋ j'ɔɔ: Maraŋ tiiko nakŋ tɔnd gɛmɛ se, j'ɔn̰te kɔlin̰ ɗim taarin̰ ki kɛn an̰ gaasn kɔsɔ. Bin num gɔtn ese se Raa taaɗ ute maraŋge la? 10Naan̰ taaɗ ute naajge ey ne? Ɗeer ɗeer, taar se k'raaŋin̰ taa naajege. Taa naan̰ se ɓo debm naabm maakŋ gɔtin̰a ɔɔ debm tɔnd gɛmin̰ se naŋa naŋa kic ɓo ɔnd don̰ do nak kɛn naan̰ utu 'kɔŋ se. 11Naaje jaay k'ɓaa k'taaɗsen taar Raa aan gɔɔ debm kɛn ɔɔc maakŋ gɔtin̰a ɔɔ kɛn k'tɔndga mɛtse j'ɔɔ k'je ɗim gɔtse ki se kɛn bin num k'tɔndga mɛtse k'deelga utu gɔtin̰ dɛn dɛn la? 12Kɛn jee kuuy jaay ɔk ɗoobo gɛn kuun ɗim gɔtse ki num, naaje se mɛt kando j'ɔk ɗoobo k'cirɗen naaɗe se daal ey la? Ute naan̰ se kic ɓo naaje se j'uun te ɗim gɔtse ki eyo. Anum dubargen jaay an doje ki paac se, naaje j'aasin̰a, taa Labar Jigan gɛn al‑Masi se naaje k'je k'tɛɗn nakŋ jaay 'gaasn jeege gɛn booy 'kuun taar se eyo. 13'Jeelki, jee kɛn tɛɗn naaba maakŋ Ɓee Raa ki se, kɔsɗe se naaɗe ɔŋ maakŋ nakge tun jeege ɓaano sɛrkɛ maakŋ Ɓee Raa ki se. Ɔɔ jee kɛn tɛɗn naaba gɔt kɛn k'lee k'tɔjn̰ mooso Raa ki se lɛ, naaɗe se kic ɔŋ bɛɗɗe gɔtn ese. 14Bin ɓo Mɛljege taaɗ ɔɔ: jee kɛn lee taaɗ Labar Jiga gɛn al‑Masi jeege tu se, ɔn̰ jeegen k'lee k'taaɗɗen se aɗen kɛɗn nakŋ kɛn 'kaasn gɛn tiŋgɗe. 15Ey num maam se m'ɔk ɗoobo, naɓo m'uun te nakŋ nam eyo ɔɔ kɛn m'raaŋsen maktub se kic ɓo, ɔn̰te 'saapki ɔɔki maam se m'je ɗim gɔtse ki. Maam se kɛn m'kooy kic num bɛɛ cir kɛn m'tɔnd mɛtn ɗim gɔtse ki se ɔɔ nakŋ maam m'tɔɔm rom do ki se m'je nam amsin̰ kɔɔɗ eyo. 16Gɛn taaɗn Labar Jiga gɛn al‑Masi se, maam m'ɔk ɗoobm kɛn m'an tɔɔm rom eyo taa taar se lɛ Mɛljege ɓo ɛɗumsin̰o ɔɔ m'an̰ taaɗin̰ jeege tu tak. Ɔɔ kɛn maam jaay m'taaɗ Labarin̰ Jiga te ey lɛ, naan̰ se am tɛɗn ɔɔn̰ aak eyo. 17Kɛn naabm se jaay maam m'tɛɗin̰ ute maraadum sum num, naan̰ se maam m'ɔk ɗoobo kɛn j'am kɔgŋ dal dubaruma. Num bin eyo! Naabm se lɛ, Raa ɓo ɛɗumsin̰ kaam jima ɔɔ m'an̰ tɛɗn tak. 18Maam tap ɓo j'am kɔgŋ ɗi? Labar Jiga gɛn Isa al‑Masi kɛn maam lee taaɗ jeege tu cɛrɛ se ɓo, 'tɛɗga bɛɗuma. Ey num maam se m'ɔk ɗoobo taa Labar Jigan maam m'lee m'taaɗ se j'amga kɔgŋ ɗim, naɓo maam malin̰ ɓo baate. 19Ɗeere, maam se m'ɓul nam eyo. Num gaŋ m'tɛɗn rom aan gɔɔ ɓulu se taa jeege paac, taa m'tɛɗn jeege dɛna aɗe ɓaa ɗoobm al‑Masi ki. 20Ute Yaudge se, maam m'tɛɗ rom kɔɗ Yaud, taa m'ano ɓaa ute Yaudge ɗoobm al‑Masi ki. Ɔɔ kɛn ute jeegen iŋg do Ko Taar kɛn Raa ɛɗo Musa ki lɛ, maam kic m'tɛɗ rom aan gɔɔ maam kic m'iŋg do Ko Taar kɛn Raa ɛɗo Musa ki. Ɔɔ kɛn ɗeere num, maam m'iŋg do Ko Taar kɛn Raa ɛɗo Musa ki ey sum. Kɛn ɔlum jaay maam m'tɛɗ naan̰ se, taa m'je jee kɛn iŋg do Ko Taar kɛn Raa ɛɗo Musa ki se, aɗe ɓaa ɗoobm al‑Masi ki. 21Ute jeegen jeel Ko Taar kɛn Raa ɛɗo Musa ki ey se, maam kic m'tɛɗ rom aan gɔɔ m'jeel Ko Taar kɛn Raa ɛɗo Musa ki eyo. Ey num, ɗeere, maam se m'jeel Ko Taar kɛn Raa ɛɗo Musa ki ɔɔ Ko Taar maam se, naan̰ Ko Taar gɛn Labar Jiga gɛn al‑Masi. Kɛn maam jaay m'tɛɗ rom bin se, taa m'aɗen tɛɗn naaɗe aɗe ɓaa ɗoobm al‑Masi ki. 22Kɛn maam jaay m'ute jeegen ɔk tɔɔgɔ naan Raa ki ey se, maam m'iŋg aan gɔɔ naaɗe taa m'anɗeno ɓaa ɗoobm al‑Masi ki. Ɔɔ maam m'tɛɗ ute jeege paac ute ɗoobm gay gay kic ɓo taa m'kaajn̰ jee mɛtin̰gen maakɗe ki se. 23Nakgen paac jaay maam m'tɛɗin̰ se, taa Labar Jigan gɛn Isa al‑Masi se 'wɔɔkŋ ɓaa ute naanin̰a. Ɔɔ maam kic ɓo m'kɔŋ bɛɗuma maakŋ bɛɛ Raa kɛn utu 'tɛɗn jeen̰ge tu se. 24'Jeelki, jee paacn̰ j'ɔmbɗe gɛn naŋ naŋ deete ki se, jee paacn̰ aan̰ se, deb kalaŋ aan̰ deel se ɓo j'aalin̰ aace ɔɔ j'ɛɗin̰ bɛɗin̰a. Bin num naase kic aan̰ki aan gɔɔ gɛn debm aan̰ deel se taa j'asen kaal aace ɔɔ aki kɔŋ bɛɗse kici. 25Jee paacn̰ kɛn lee aan̰ gɔtn k'lee k'taan̰ naŋ naŋ deete se, naaɗe lee dabar roɗe dɛn aak eyo. Naaɗe tɛɗin̰ se taa j'aɗen kaal aace ɔɔ kɔŋ bɛɗɗe. Naɓo kaal aacn̰ k'lee k'j'aalɗen naaɗe ki se, tɛɗga sum ɓo gɔtin̰ utu 'deele. Num gaŋ kaal aacn̰ kɛn j'aaljeki naajege tu se gɔtin̰ 'deel eyo, naan̰ se 'tiŋg gɛn daayum. 26Taa naan̰ se ɓo maam kic m'aan̰ gɔtn rɛn̰ eyo, gaŋ m'aan̰ ute ɗoobin̰a taa m'kaan gɔtn kaan ki. Ɔɔ maam se m'tec aan gɔɔ debm deelga deel gɛn cɛɛpm gɛn tɔnd naapa, naɓo gɔtn tɔndki se m'ɔnd gɔtn rɛn̰ eyo. 27Maam m'dabar rom dɛna, taa m'an̰ bɔɔbm kɔkɔ. Ey num maam kɛn m'taaɗo taar gɛn Isa al‑Masi jeege tu se, sɔm m'kutn naaŋa cɛrɛ.

will be added

X\