1 Corinthiens 8

1Ɓɔrse, maam m'je m'asen tɛrl do mɛtn taar daa maragge tu. Aan gɔɔ naase ɔɔki: Ɗeere, naajege paacki se k'j'ɔkki jeele. Naɓo jeel nakŋ kɛn debkilimi ɔk se, oopin̰ don̰a. Num gaŋ maak‑je do naapge tu se, noogjeki gɛn ziiɗn ɓaa ute naanjege. 2Kɛn nam jaay saap ɔɔ naan̰ ɔk jeele se, kɛse naan̰ utu jeel te ɗim ey ɓɔrtɔ. 3Num gaŋ debm jaay je Raa se, Raa jeelin̰a. 4Naase ɔɔki: daa maragge se, naajege j'ɔkki ɗoobo gɛn kɔsɔ lɔɓu gɛn kɔs ey lɛ? K'jeelki, maraggen do duni ki se, nakŋ rɛn̰ cɛrɛ ɔɔ Raa lɛ naan̰ kalaŋ lak, Raa kuuy se, gɔtɔ. 5Ɗeere, jee mɛtin̰ge taaɗ ɔɔ raagen kuuy utu maakŋ raa ki ɔɔ do naaŋ ki kici. Jee bin se ɔk raage ute mɛlge dɛna kɛn naaɗe lee ɛrg naanɗege tu ɔɔ eemɗe. 6Num gaŋ naajege se, k'jeelki Raa se, naan̰ kalaŋ lak. Naan̰ ɓo Bubjege ɔɔ nakge paac iin̰o gɔtn naan̰ ki ɔɔ kɛn naajege j'utu j'iŋgki se kic ɓo, ute naan̰a. Ɔɔ Mɛljege kic ɓo kalaŋ sum, naan̰ ɓo Isa al‑Masi ɔɔ ute naan̰ se ɓo, nakge paac utu tiŋg gɔtɗe ki ɔɔ naajege kic ɓo kiŋgjege kaam ji naan̰a. 7Num gaŋ taar mɛt kɛn ese se, jeege paac jeel ɔk te mɛtin̰ eyo. Jee mɛtin̰ge se, deelga deel ute maragge ɔɔ ɓɔrse kic ɓo kɛn naaɗe ɔs kɔs daa maragge num, aakin̰ aan gɔɔ daa se gɛn maragge. Anum ute saapɗen kɛn ɔŋ jeel ɔk mɛtn nakge mɛc ey se, naaɗe saap ɔɔ kɛse tujɗenga naan Raa ki. 8K'jeelki, nakŋ kɔsɔ se, ajeki kɔŋ naakŋ naan Raa ki eyo. Kɛn j'ɔskiga lɛ, ajeki ziiɗn ɗim eyo ɔɔ kɛn j'ɔski te ey kic lɛ, ɗimjegen 'kut tap ɓo gɔtɔ. 9Naase se ɔkki ɗoobo kɛn kɔsn nakge paac, naɓo ɔndki kɔndɔ, ɔn̰te 'kɔlki jeegen ɔk tɔɔgɔ naan Raa ki ey se, 'koocn̰ ɗoobm Raa ki. 10Aan gɔɔ naai kɛn 'jeel nakŋ mɛt ki jaay, iŋg ɓee marag ki ɔɔ iŋg ɔs kɔs daa maraga se, gɛnaai kɛn saapin̰ ɔŋ jeel ɔk te mɛtn nakŋ mɛc ey se jaay aakki naai iŋg ɔs kɔs se, naai an̰ kɔlin̰ naan̰ kic ɓo 'kɔsn daa maraga se. 11Bin ɓo ute jeeli kɛn naai ɔk se, gɛnaa kɛn saapin̰ jeel ɔk te mɛtn nakŋ mɛc ey se, naai an̰ kɔlin̰ naan̰ 'kutu, ey num gɛnaa ese ɓo kɛn al‑Masi ooy taarin̰ se. 12Kɛn naai 'tɛɗ bin se, kɛse naai 'tɛɗ kusin̰ gɛnaaige tun saapɗe ɔŋ jeel ɔk te mɛtn nakge mɛc ey se ɔɔ 'tujɗe maakɗe. Bin se naai 'tɛɗ kusin̰ ɓo al‑Masi ki. 13Taa naan̰ se ɓo, kɛn taa kɔsɔ sum ɓo 'kɔl gɛnaam koocn̰ ɗoobm Raa ki se, mɔɔtn maam m'kɔsn daa eyo taa gɛnaam se 'koocn̰ ɗoobm Raa ki eyo.

will be added

X\