1 Corinthiens 7

1Ɓɔrse maam m'je m'asen tɛrlɛ do taar kɛn naase 'raaŋumkiro maakŋ maktubse ki se. Kɛn 'tɛɗn jiga num gaaba ɔn̰te kɔkŋ mɛnda. 2Naɓo, taa aki lee kɛɛsn naapge rɛn̰ rɛn̰ ey se, gaabm gay gay kic ɓo, n̰'ɔk mɛnda ɔɔ mɛnd gay gay kic lɛ n̰'ɔk gaaba. 3Gaaba jaay je mɛndin̰ se, mɛnda ɔn̰te gaasin̰ ron̰a. Ɔɔ kɛn mɛnda ɓo je gaabin̰ kic lɛ, gaabin̰ ɔn̰te gaasin̰ ron̰a. 4Taa gaaba se, ɔk tɔɔgɔ do ron̰ ki eyo, ron̰ se tɛɗga gɛn mɛndin̰a ɔɔ mɛnda kic lɛ, ɔk tɔɔgɔ do ron̰ ki eyo, ron̰ se tɛɗga gɛn gaabin̰a. 5Kɛn naase jaay 'jeki 'gaasn rose taa aki tɔnd mɛtn Raa se, do naan̰ ki se 'taaɗ tɔɔlin̰ki ute naapa; ɔɔ kaaɗ kɛn naase 'gaaski rose naapge tu se, ɔn̰te 'kiŋgki do ki daanin̰ tɛɗn dɔkɔ, num 'tɛrl iŋgki aan gɔɔ kɛn do dɔkin̰ naase 'tiŋgkiro se. Ey num kɛn ɔŋ aasin̰ki te do rose ki ey se, sɔm Ɓubm sitange 'kɔŋ ɗoobo asen naama. 6Kɛn ɔlum jaay m'taaɗ bin se, kɛse maam m'undsen kund ɓo kul eyo, num maam m'taaɗsen taaɗ ɓo ɗoobo sum. 7Maam m'je se, jeege paac 'kiŋg aan gɔɔ maama kɛn m'ɔk te mɛnd ey se. Naɓo naŋa naŋa kic ɓo Raa ɛɗin̰ naabin̰ gɛn don̰ don̰a. Deb kalaŋ Raa ɔɔɗin̰ ɗoobo gɛn kɔkŋ mɛnda ɔɔ deb kuuy se lɛ, Raa tɛɗin̰ gɛn 'tiŋg arbiya. 8Arbige ute mɛnd‑daayge se, m'taaɗɗen m'ɔɔ: kɛn aɗen 'tɛɗn jiga se num k'j'iŋg aan gɔɔ maam kɛn m'ɔk mɛnd ey se. 9Anum kɛn naaɗe jaay an̰ kaasn do roɗege tu ey se, mɛndge lɛ k'tɔkŋ gaabge ɔɔ gaabge kic lɛ k'tɔkŋ mɛndge. Taa debm jaay ɔk kɔk se, bɛɛ cir debm kɛn ɔk te eyo ɔɔ aakga mɛndge num lee dɔŋɗe ute maakin̰ se. 10Ɓɔrse m'je taaɗn ute jeegen tɔkga tɔk naapa ɗoobm al‑Masi ki. Taar se maam ɓo m'taaɗin̰ eyo num Mɛljege ɓo taaɗin̰a: mɛnd jaay ɔkga gaaba se, ɔn̰te rɛsn ute gaabin̰a. 11Kɛn naan̰ rɛsŋga ute gaabin̰ lɛ, n̰'ɔn̰te kɔkŋ gaabm kuuy. Ɔɔ kɛn naan̰ ɓo jega gaaba lɛ, n̰'tɛrlo ro gaabin̰ ki. Anum gaaba kic n̰'ɔn̰te piir ute mɛndin̰a. 12Jeege tun kuuy se, kɛse maam ɓo m'taaɗɗen ey num Mɛljege eyo, m'ɔɔ: gɛnaa ɗoobm al‑Masi ki jaay mɛnd naan̰ iŋg ɓee se jaay aal te maakin̰ do al‑Masi ki ey se, ɔɔ mɛnd se jaay took je kiŋg ute naan̰ num, n̰'ɔn̰te piirin̰a. 13Ɔɔ mɛnd ɗoobm al‑Masi ki jaay, gaabm naan̰ iŋg ɓee ute naan̰ se jaay aal te maakin̰ do al‑Masi ki ey se, kɛn gaabm se jaay took je kiŋg ute naan̰ num, mɛnd se n̰'ɔn̰te 'rɛsin̰a. 14Taa gaabm jaay aal te maakin̰ do Isa ki eyo ɔɔ ɔk mɛnd kɛn aalga kaal maakin̰ do Isa ki se, taa mɛnd naan̰ ɔk se tɛɗin̰ naan̰ tɛɗga gɔɔr ute Raa. Mɛnd kɛn aal te maakin̰ do Isa al‑Masi ki ey jaay, ɔk gaabm kɛn aalga kaal maakin̰ do Isa ki se, taa gaabm naan̰ ɔk se tɛɗin̰ naan̰ tɛɗga gɔɔr ute Raa kici. Kɛn bin ey num, gɛnɗege se 'tɛɗn dɔk te Raa, num gaŋ ɗeer ɗeer, naaɗe se gɔɔr ute Raa. 15Kɛn deba aal te maakin̰ do Isa al‑Masi ki ey jaay je an piir ute mɛndin̰ kɛn aalga kaal maakin̰ do al‑Masi ki se, ɔn̰ɗeki kɛn naaɗe jaay je piiri num, k'piiri. Kɛn 'tɛɗn gaaba ey lɛ mɛnda ɗim jaay aɗen tum ute debm kɛn aal te maakin̰ do Isa ki ey se, gɔtɔ. Taa Raa daŋseno se, taa aki kiŋg ute lapia. 16Anum naai mɛnd ɗoobm Isa al‑Masi ki se, 'jeelin̰ gaabi se an̰ kɔŋ kaasn gɛn tɔɔɗn kɔl gɔtn kaaj ki la? Ɔɔ naai gaabm ɗoobm Isa al‑Masi ki se kic, 'jeelin̰ mɛndi se an̰ kɔŋ kaasn gɛn tɔɔɗn kɔl gɔtn kaaj ki la? 17Taar kɛn kuuy kɛn m'je m'asen taaɗ se, naŋa naŋa kic ɓo, iŋg gɔt kɛn Mɛljege ɔndin̰ ro ki ɔɔ gɔtn kiŋgin̰ kɛn ese ɓo Raa daŋin̰o. Anum taargen se ɓo kɛn maam m'lee m'dooy eglizge paac. 18Kɛn Raa daŋi ɓo naai ɔjga kɔj pɔndɔ lɛ, ɔn̰te kɔyin̰a, num iŋg ute kɔjn̰ pɔndi se. Ɔɔ kɛn Raa daŋi jaay naai utu ɔj te pɔndɔ ey lɛ, ɔn̰te kɔjn̰ pɔndɔ. 19Debm ɔjga pɔndɔ ɔɔ debm kɛn ɔj te eyo, paac ɓo tɛɗ ɗim eyo. Num nakŋ jiga cir paac se, debm tɛɗn nakgen kɛn Raa ɔɔ k'tɛɗin̰ se. 20Anum naŋa naŋa kic ɓo, ɔn̰ 'kiŋg gɔtn kiŋgin̰ kɛn Raa daŋin̰o ro ki se. 21Kɛn Raa daŋio se, naai 'ɓul lɛ? Ɔn̰te kuun nirli, num gaŋ kɛn naai jaay ɔk ɗoobo gɛn kɔɔɗn doi maakŋ ɓul ki se lɛ, kɛse ɓo nakŋ jiga. 22Ɓul jaay Mɛljege Raa daŋin̰oga se, naan̰ ɔŋga don̰ gɔtn Mɛljege tu; bin ɓo debm ɓul ey jaay Mɛljege Raa daŋin̰ga se, naan̰ tɛɗga ɓul gɛn al‑Masi. 23Naase se Raa dugsega dose ute zo ɔɔn̰ɔ; bin num naase se ɔn̰te 'tɛɗki ɓulu gɛn jikilimge. 24Gɛnaamge, naŋa naŋa kic ɓo iŋg gɔtn kiŋgin̰ kɛn do dɔkin̰ gɔtn kɛn Raa daŋin̰o ro ki se. 25Ɓɔrse maam m'je m'asen tɛrlɛ do mɛtn taar jeege tun kɛn tɔk te gaabge ute mɛndge eyo. Ɔɔ taar se Mɛljege ɓo undum te kul eyo, num maam ɓo m'saapa ɔɔ m'je m'asesin̰ taaɗa; ɔɔ naase 'jeelumki maam se Mɛljege tɛɗumga bɛɛ ɔɔ taar kɛn maam m'taaɗ se naase 'tookki do ki taa maam se m'tuj ɔrmum eyo. 26Ute dubar kɛn j'aakin̰ki ɓɔrse se, m'saap m'ɔɔ: kɛn 'tɛɗn jiga se gaaba ey lɛ mɛnda se n̰'kiŋg bini. 27Kɛn ɔk mɛnda lɛ, ɔn̰te piirin̰a. Ɔɔ kɛn ɔk te ey lɛ, ɔn̰te kɔkɔ. 28Num gaŋ kɛn ɔkga mɛnda kic num, naai 'tɛɗ te kusin̰ eyo. Ɔɔ kɛn goon mɛnda ɓo ɔkga gaaba kic num, tɛɗ te kusin̰ ey kici. 'Jeelki jee iŋg kiŋg ɓee se kiŋgɗe utu aɗen tɛɗn ɔɔn̰ɔ. Taa naan̰ se ɓo maam m'je nakgen se 'kaan dose ki eyo. 29'Booyki m'asen taaɗa gɛnaamge: ɓɛrɛ, kaaɗn kɛn Raa gaaŋin̰ se ɔɔpga baata. Bin num naan ki se, gaabgen kɛn ɔk mɛndge se, k'tɛɗn naaba Raa ki aan gɔɔ jee kɛn tɔk te mɛndge eyo; 30jee kɛn eem keem se, k'tɛɗn naaba Raa ki aan gɔɔ jee kɛn eem keem eyo, ɔɔ jee kɛn maakɗe raap se lɛ, k'tɛɗn naaba Raa ki aan gɔɔ jee kɛn maakɗe raap eyo, jee kɛn lee dugŋ nakge se lɛ, k'tɛɗn naaba Raa ki aan gɔɔ jee ɔk ɗim eyo, 31ɔɔ jee kɛn tɛɗn naaba ute nakgen naaɗe ɔk do duni ki se lɛ, j'ɔn̰te kɔnd saapɗe do nakge tun se, taa duni ara se utu 'deele. 32Maam m'je naase aki kuun nirlse eyo. Taa naan̰ se ɓo debm jaay ɔk te mɛnd ey se, naan̰ saapm do naabm Mɛljege tu ɔɔ naan̰ je ɗoobm nakŋ kɛn 'tɔɔl Mɛljege tu. 33Num gaŋ debm jaay ɔk mɛnda se, naan̰ uun nirlin̰ taa nakgen do duni ki ɔɔ naan̰ se saap ɓo je ɗoobm nakŋ kɛn 'tɔɔl mɛndin̰ ki. 34Debm bin se, saapin̰ tɛɗn kaam dio. Anum mɛnd ɔk te gaab ey se, ey lɛ goon mɛnda se, naaɗe se saap do naabm Mɛljege tu ɔɔ maakɗe ute roɗe paac, naaɗe ɔn̰in̰ Mɛljege tu. Num gaŋ mɛnd ute gaabin̰ se, naan̰ uun nirlin̰ taa nakgen do duni ki ɔɔ naan̰ se je ɗoobm nakŋ kɛn 'tɔɔl gaabin̰ ki. 35Maam m'taaɗsen bin se, taa asen tɛɗn bɛɛ, ey num maam se m'je m'asen gaasn ɗoob eyo. Nakŋ maam m'je naase aki tɛɗ se, nakŋ kɛn bɛɛ cir daala ɔɔ aki tɛɗn naabm Mɛljege se ute maakŋ kalaŋ. 36Kɛn goon kɔɗɔ saap ɔɔ mɛnd kɛɛsin̰ se jaay naan̰ ɔkin̰ te ey num, an̰ tuj maakin̰ se ɔɔ kɛn naan̰ jaay je mɛnd kɛɛsin̰ se deel te gɔtin̰, aakin̰ bɛɛki num, an̰ kɔk se, ɔn̰ ɔkin̰a. Kɛn naan̰ ɔkin̰ga kic ɓo, tɛɗ te kusin̰ eyo. 37Num gaŋ kɛn goon kɔɗɔ ɔk mɛnd kɛɛsɛ, ɔɔ kɛn naan̰ jaay aasin̰ do ron̰ ki, ɔɔ naan̰ mala ɓo uun doa, nam ɓo gaasin̰ gɛn kɔkin̰ ey se, ɔɔ saap ɔɔ an̰ kɔŋ kɔk ey se, ɔɔ kɛn naan̰ jaay ɔŋ aasin̰ do ron̰ ki ɔŋ ɓaa te ron̰ ki ey se, naan̰ tɛɗga jiga naan Raa ki. 38Bin ɓo debm ɔk mɛnd kɛɛsɛ jaay ɔkin̰ga num jiga, num debm jaay ɔkin̰ te ey se, tɛr tɛɗga jiga cir daala. 39Kɛn mɛnda jaay gaabin̰ utu ooy te ey se, naan̰ ɔk ɗoobm an̰ rɛs eyo. Anum kɛn gaabin̰ ooyga jaay ɓo, naan̰ ɔk ɗoobo gɛn kɔkŋ gaabm kuuy kɛn naan̰ maakin̰ jea. Naɓo gaabin̰ se 'tɛɗn debm ɗoobm al‑Masi ki jaayo. 40Jiga se n̰'ɔn̰te kɔkŋ gaabm kuuy. Bin se naan̰ 'kiŋg ute maak‑raapo cir daala. Kɛse ɓo saapm maama ɔɔ maam m'jeele maam kic m'ɔk Nirl Raa maakum ki.

will be added

X\