1 Corinthiens 6

1Kɛn maakse ki jaay deb kalaŋ ɔk taara ute gɛnaan̰ num, naase, ɔn̰ki jee Raage ɔɔ 'sakakin̰ki gɔtn jeege tun jeel Raa mal ey se gɛn ɗi? 2'Jeelki jee Raage ɓo utu kɔjn̰ bɔɔrɔ do jeege tun do duni ki se. Num kɛn jee duni ki jaay naase ɓo utu aɗeki kɔjn̰ bɔɔrɔ num, taargen sɛɛm sɛɛm daanse ki se, naase ɔŋ aaski gɛn tɔɔlin̰ ey ne? 3Naajege ɓo j'utu j'aki kɔjn̰ bɔɔrɔ do kɔɗn Raage tu se, naase tap ɓo 'jeelki ey la? Kɛn bin num, mɛt kando naajege j'an̰ki kaasn gɛn taaɗn tɔɔl taargen do duni ki se! 4Naɓo kɛn naase jaay ɔkki taara daanse ki se, naase 'ɓaaki gɔtn jee kɔjn̰ bɔɔrge tun egliz aalɗen maak ki eyo. 5Maam m'taaɗsen taa sɔkɔn̰ asen tɔɔlɔ. Maakse ki se, gɛnaa kɛn jeel‑taar kɛn asen kaakŋ mɛtn taarse se tap ɓo, gɔtn ne? 6Num gaŋ j'aak gɛnaa kɛn ɗoobm Isa al‑Masi ki kɛn ɔk taara ute gɛnaan̰ kɛn ɗoobm al‑Masi kic se ɔɔ ɓaa sakakin̰ naan jeege tun ɗoobm al‑Masi ki eyo. 7Anum kɛn ɔkki taara ute naapa jaay 'sakakki naapa se, kɛse naase oockiga ɗoobm Raa ki. Kɛn deba jaay tujsega se naase ɔŋ aasin̰ki ey ne? Kɛn deba jaay 'ɓoogga ne ɗimse se naase ɔŋ aasin̰ki ey ne? Kɛn naase ɔŋ aasin̰kiga se, bɛɛ cir kɛn naase aɗeki ɓaa sakak se. 8Num gaŋ naase ɓo 'lee 'tujki jeege tu ɔɔ 'lee ɓoogki nakŋ jeege. Ɔɔ jee kɛn naase 'lee 'tɛɗɗeki nakŋ se doɗe ki se, naaɗe se ɓo gɛnaasegen ɗoobm Isa al‑Masi ki. 9Naase 'jeelki, jeegen kɛn tɛɗn nakge ute ɗoobin̰ ey se, 'kɔŋ kɛnd maakŋ Gaar Raa ki eyo. Ɔn̰te 'kaan̰ki rose dala: jee lee ɛɛs naapa rɛn̰ rɛn̰, jee maragge, gaabgen lee ɛɛs mɛnd jeege ute mɛndgen lee ɛɛs gaabm jeege, gaabgen paacn̰ kɛn lee ɛɛs naapa, 10jee ɓoogge, jee tamage, jee aay tɔtɔ deel te gɔtin̰a, jee kɔɔɗn jeege, jee tujn̰ nakŋ jeege, naaɗe se paac 'kɔŋ kɛnd maakŋ Gaar Raa ki eyo. 11Bin ɓo do dɔkin̰ maakse ki se, jee mɛtin̰ge tɛɗo nakgen se, num gaŋ ute ro Mɛljege Isa al‑Masi ɔɔ ute Nirlin̰ se, Raa tug ɗaapsega, tɛɗsenga 'tɛɗkiga jee naan̰ge ɔɔ aakkiga bɛɛ naanin̰ ki. 12Nam taaɗ ɔɔ: Maam se, m'ɔk ɗoobo gɛn tɛɗn nakge paac. Ɗeere, maam se m'ɔk ɗoobo gɛn tɛɗn nakge paac naɓo, nakge paac maakin̰ se, ɔŋ tɔɔlum sɛr eyo. Ɗeere, maam se m'ɔk ɗoobo gɛn tɛɗn nakge paac, naɓo maam se m'kɔŋ kɔn̰ rom gɛn tɛɗn ɓul ne ɗim eyo. 13Tɛr nam taaɗ ɔɔ: Nakŋ‑kɔsɔ se, k'tɛɗin̰ taa maaka, ɔɔ maaka se lɛ gɛn nakŋ‑kɔsɔ. Ɗeere, num nakŋ‑kɔsɔ ute maaka se Raa utu aɗen tɛɗn 'tɛɗn gɔtɔ. Num gaŋ ro se, Raa tɛɗin̰ gɛn kɛɛsn naapm rɛn̰ rɛn̰ eyo, taa rojege se naan̰ gɛn Mɛljege, ɔɔ Mɛljege se lɛ naan̰ ɓo Mɛl rojege. 14Ɔɔ Raa kɛn duro Mɛljege daan yoge tu se, ute tɔɔgin̰ se, naan̰ utu ajeki 'dur naajege kici. 15Naase 'jeelki naŋa naŋa kic ɓo maakŋ ro al‑Masi ki se, naan̰ tɛɗga ron̰ kaam kalaŋ. Bin se, maam se m'kɔŋ kuun ro al‑Masi kaam kalaŋ jaay m'an̰ tum ute ro mɛnd kɛɛsn gaaba la? Kɛse gɔtɔ. 16'Jeelki, deba jaay tooɗ ute mɛnd kɛɛsn gaaba se, naaɗe tum tɛɗga ro kalaŋ. Taa Kitap taaɗga taaɗ ɔɔ: Naaɗen di se tum tɛɗ daa ro kalaŋ. 17Num gaŋ debm dɔɔk ute Mɛljege se, naan̰ tum tɛɗga kalaŋ ute naan̰a. 18'Booyki, kɛɛsn naapm rɛn̰ rɛn̰ se, ɔɔɗki dose naatn dɔkɔ ro ki! Kusin̰ paacn̰ kɛn debkilimi lee tɛɗ se, ɔŋ tuj ron̰ aan gɔɔ kɛɛsn mɛndgen rɛn̰ rɛn̰ se eyo, num gaŋ debm jaay ɛɛs mɛndge rɛn̰ rɛn̰ se, naan̰ ɔl ron̰ paac maakŋ kusin̰ ki. 19Naase 'jeelki rosege se tɛɗga ɓee gɛn Nirl Salal kɛn Raa ɛɗsesin̰o ɔɔ ɓɔrse, naan̰ utu maakse ki. Bin num rosege se, tɛɗga gɛn naase 'malin̰ge eyo. 20Taa Raa se, dugsega dose ute zo ɔɔn̰ɔ. Kɛn bin num, ɔn̰ki rose se 'nookŋ Raa.

will be added

X\