1 Corinthiens 4

1Tap ki num, aakjeki, naaje se lɛ, k'jee tɛɗn naabm al‑Masige ɔɔ nakŋ Raa kɛn ɔyin̰ga kɔyɔ kɛn jeege jeel mɛtin̰ ey se, Raa ɛɗjesin̰ga kaam jije taa j'an̰ taaɗin̰ jeege tu. 2Anum debm j'ɛɗin̰ga naka kaam jin̰ se, n̰'ɔn̰te tujn̰ ɔrmin̰ do ki. 3Maam se ɔlum eyo kɛn naase ɓo amki kɔjn̰ bɔɔrɔ dom ki, ey lɛ kɛn jee kɔjn̰ bɔɔrge ɓo am kɔjn̰ bɔɔrɔ dom ki. Ɔɔ maam mala kic ɓo, m'kɔjn̰ bɔɔrɔ dom ki eyo. 4Ɗeere, maakum ki se, m'jeele maam se m'tuj te ɗim eyo. Naɓo kɛse am kɔŋ ɗaapm taarum eyo. Anum debm kɛn am kɔjn̰ bɔɔrɔ dom ki se, Mɛljege. 5Taa naan̰ se ɓo kɛn kaaɗin̰ j'ɔndin̰ jaay aan te ey se, ɔn̰te 'kɔjki bɔɔrɔ do nam ki, anum 'booyki Mɛljege aɗe ɓaa jaayo. Naan̰ ɓo nakŋ kɛn j'ɔyin̰ga kɔy maakŋ gɔt kɛn ɔɔɗ se, naan̰ utu an̰ kɔɔɗn 'tooɗn tal. Ɔɔ taar kɛn maakŋ jikilimge tu se, naan̰ utu an̰ kɔɔɗn 'tooɗn tal kici. Jaay ɓo, naŋa naŋa kic j'an̰ tɔɔmin̰ do naabin̰ kɛn naan̰ tɛɗa. 6Taa naan̰ se ɓo gɛnaamge, kɛn ɔlum jaay m'taaɗ taa Apɔlɔs ute maam mala se, taa ute nakgen naaje k'tɛɗ se ɓo asen dooyo ɔɔ bin se naase aki kɔŋ deel do taar kɛn Kitap taaɗ se eyo. Bin se naŋa naŋa kic ɓo ɔn̰te magal ron̰ gɛn bɛɛr kuun deb kalaŋ ɔɔ deb kuuy se naan̰ an̰ kɔɔɗn kundu. 7Anum naai tap ɓo 'tɛɗ roi jukuɗum se gɛn ɗi? Nakŋ naai ɔk se lɛ, Raa ɓo ɛɗi. Ɔɔ nakŋ kɛn jaay j'ɛɗisin̰ kɛɗ sum se, gɛn ɗi jaay naai 'magal roi aan gɔɔ Raa ɓo ɛɗisin̰ ey se? 8Naase 'saapki ɔɔki nakŋ maakse je paac ɓo, ɔŋin̰kiga ɔɔ naase ɓo 'tɛɗkiga jee nak dɛnge ɔɔ naase ɓo 'tɛɗkiga gaarin̰ge ɔɔ naaje lɛ, k'gaarin̰ge eyo! Maam m'je se kɛn naase ɓo gaarin̰ge ɗeer num, ɔɔ ute naan̰ se naaje kic j'kɔsn gaara ɓɔrse ute naase. 9Maam m'saapm m'ɔɔ naajen jee kaan̰ naabm Isage se, Raa tɛɗjen k'tɛɗga mɛtn jeege tu aan gɔɔ jee kɛn k'tɔkɗe gɛn ɓaa tɔɔlɔ. Aan gɔɔ naaɗe se Raa ɔn̰je naaje kic do duni ki se j'aakjen mɛtje naan kɔɗn Raage tu ɔɔ naan jikilimge tu. 10Taa al‑Masi se, naaje j'aakje aan gɔɔ jee dɛrlge, num gaŋ naasen kɛn 'dɔɔkkiga ute al‑Masi se lɛ, jeege aaksen naase se 'tɛɗkiga jee jeel‑taarge! Naaje se j'aakjen aan gɔɔ jee ɔk tɔɔg eyo ɔɔ naase lɛ, jeege aakse naase se jee ɔk tɔɔgɔ! Naase se jeege aalsen maak ki, naɓo naaje se lɛ, nam tap ɓo aaljen maak ki eyo! 11Bini ɓɔrse kic ɓoa ute maane utu tɔɔljen tɔɔl rɔk. Kal tuusje kic ɓo utu daayjen daaye ɔɔ jeege utu 'lee dabarjen dabara ɔɔ naaje j'utu k'lee lee wari rɔk. 12Naaje k'dabar k'tɛɗn naaba ute jije jaay ɓo k'j'ɔsɔ. Jeege naajje ɔɔ naaje k'j'ɔɔɗɗen ɓooro. K'dabarje kic ɓo naaje k'j'aay kaamje k'j'aasin̰a. 13Naaje se, jeege lee taaɗjen taar iŋg kus roje ki ɔɔ naaje k'taaɗ jeege tun se ute taar nijim kɛn ɛɗɗen kaay kaama. Bini ɓɔrse kic ɓo jikilimgen duni ki se, aakjen naaje se aan gɔɔ iɗikŋ roa ɔɔ aan gɔɔ nakŋ do danos ki. 14Kɛn ɔlum jaay maam m'raaŋsen taargen se, taa m'asen kɔl maakŋ sɔkɔn̰ ki eyo, num aan gɔɔ naase gaan maakjemge se, m'je ɓo m'asen kaal bisi ki. 15Anum kɛn ɗoobm al‑Masi ki jaay ɔkki jee dooyge dupu‑sik kic num, bubse se kalaŋ sum. Ɔɔ maam kɛn m'taaɗsen Labar Jigan gɛn al‑Masi se, ɗoobm Isa al‑Masi ki se, maam sum ɓo m'tɛɗga bubse. 16Bin ɓo maam m'dɛjsen m'ɔɔ: uunki bɔlɔtn maama. 17Taa naan̰ se ɓo, maam m'ɔlsen Timote kɛn goon kɔɔn̰ maakuma ɔɔ debm tuj ɔrmin̰ eyo ɗoobm Mɛljege tu. Kɛn naan̰ jaay ɓaa ɔŋsega se, naan̰ asen taaɗn ɗoobm kɛn maam m'leen ɗoobm Isa al‑Masi ki se. Ɔɔ gɔtɔ ɓaa se paac, maam m'dooy jeegen eglizge tu paac ute ɗoobm se. 18Jee mɛtin̰ge maakse ki se, magal roɗe. Naaɗe saap ɔɔ maam m'kɔŋ tɛrl ɓaa gɔtse ki eyo. 19Kɛn Mɛljege je num, sɔm m'utu m'ɓaa gɔtse ki, ɔɔ kɛn maam m'aanga num, m'ɓaa booy mɛtn taar jee kɛn magal roɗe se sum eyo, num m'kaakŋ nakŋ kɛn naaɗe lee tɛɗa. 20Kɛn jeegen jaay Raa ɔs gaar doɗe ki se, naaɗe taaɗin̰ ute taarɗe sum eyo, num maakŋ kiŋgɗe ki se, naaɗe taaɗ tɔɔgŋ Raa. 21Naase tap ɓo 'jeki ɗi? M'asen ɓaa kɔŋ ute taar urlu ɔɔ ute maak‑je lɔɓu 'jeki m'asen ɓaa kɔŋ ute sirɗi lɛ?

will be added

X\