1 Corinthiens 3

1Ɗeere gɛnaamge, maam m'ɔŋ m'aasin̰ te eyo kɛn m'taaɗsen taaɗn naase ki aan gɔɔ jee kɛn ɔk Nirl Raa. Naase se iŋgki aan gɔɔ jee do duni ki ɔɔ aan gɔɔ gaangen sɛɛmɛ kɛn ɗoobm al‑Masi ki, taa naan̰ se ɓo maam m'taaɗseni. 2Maam se m'ɛɗseno kɔsn deer eyo, naɓo m'ɛɗseno si sum. Taa kɔsn deer se, naase an̰ki kɔŋ kaas eyo. Ɔɔ ɓɔrse kic ɓo m'jeele, naase an̰ki kɔŋ kaasn gɛn kɔsn kɔsn kɛn deer se eyo, 3taa naase se iŋgki aan gɔɔ jee do duni ki. Taa naase ɔkki maak‑kilimi do naapge tu ɔɔ 'tɛɗki dɛkɛn̰ɛ ute naapa kɛse je taaɗn ɔɔ naase se iŋgki aan gɔɔ gɛn jee do duni ki, ɔɔ kiŋgse se tec aan gɔɔ gɛn jikilimgen ɓaa se paac ey ne? 4Kɛn naase jaay deb kalaŋ taaɗ ɔɔ: maam ara m'debm Pɔl ɔɔ deb kuuy taaɗ ɔɔ: maam ara lɛ m'debm Apɔlɔs, nakŋ naase iŋg 'tɛɗki se, kɛse tec gɛn jikilimgen ɓaa se paac ey ne? 5Apɔlɔs tap ɓo naŋa ɔɔ maam Pɔl ɓo naŋa? Naaje se k'jee tɛɗn naabm Raage sum ɔɔ ute ɗoobm naaje se ɓo, naase 'took aalkiga maakse do al‑Masi ki. Ɔɔ naaje se, naŋa naŋa kic ɓo tɛɗn naabm kɛn Mɛljege ɛɗin̰o kaam jin̰a. 6Anum maam se m'ɔɔco, Apɔlɔs debm ɔɔyin̰o maane, num gaŋ debm tɛɗin̰ teep se, naan̰ Raa. 7Bin ɓo debm ɔɔco ute debm kɔɔy maane se, naaɗe se paac ɔk nook eyo. Naɓo kɛn ɔk nooko cir paac se, Raa kɛn tɛɗin̰ teep se. 8Debm kɔɔcɔ ute debm kɔɔy maane se, naaɗe aas kaasa ɔɔ naŋa naŋa kic ɓo Raa utu an̰ kɔgŋ dal dubar naabin̰ kɛn naan̰ tɛɗa. 9Taa naaje se k'tɛɗn naaba tɛlɛ ute Raa ɔɔ naase ɓo 'tɛɗkiga aan gɔɔ maakŋ‑gɔtn gɛn Raa ɔɔ aan gɔɔ ɓee kɛn Raa utu iin̰in̰ kiin̰i. 10Ute bɛɛ kɛn Raa tɛɗum se, maam m'ɔndga mɛtn ɓea aan gɔɔ debm tirɗi. Ɔɔ debm kuuy se iin̰ do ki. Naɓo naŋa naŋa kic ɓo, ɔnd kɔndɔ ute raay kɛn naan̰ 'kiin̰ do ki se. 11Ɓɛrɛ, mɛtn ɓee se, j'uunga kuun mɛtin̰a. Ɔɔ nam ɔn̰te kuun mɛtn ɓee kuuy. Mɛtn ɓee kɛn maam m'taaɗsen se lɛ, Raa ɓo uuno mɛtin̰a ɔɔ mɛtn ɓee se, naan̰ ɓo Isa al‑Masi. 12Do ɓee kɛn j'uun mɛtin̰ se, jee mɛtin̰ge 'kiin̰ do ki ute daab, ute pudda ɔɔ ute kogen jiga jiga ɔɔ jeegen kuuy 'kiin̰ do ki ute kaagge, ute mumburu ɔɔ ute tɔɔyɔ. 13Num gaŋ ɓii kɛn Raa 'kɔjn̰ bɔɔrɔ do jeege tu se, naŋa naŋa kic ɓo naabin̰ kɛn naan̰ tɛɗ se utu 'tooɗn tal. Taa ɓii se 'tɛɗn aan gɔɔ pooɗn kɛn ɔɔy daab nakge se ɔɔ ɓii kɛn se ɓo naŋa naŋa kic ɓo 'kaakŋ jeel naabin̰ kɛn naan̰ tɛɗo. 14Debm jaay naabin̰ naan̰ tɛɗ se ɔŋ ɔs te pooɗ ey num, naan̰ se Raa an̰ kɔgŋ bɛɗin̰a. 15Num debm jaay naabin̰ naan̰ tɛɗ se ɔsga pooɗo num, naan̰ se 'kiin̰ ute jin̰a. Naan̰ malin̰ se 'kɔŋ kaaja naɓo aan gɔɔ debm kɛn k'naak k'j'ɔɔɗin̰ don̰ maakŋ pooɗ ki. 16'Jeelki, naase se ɓo 'ɓee gɛn Raa. Ɔɔ Nirl Raa se utu iŋg maakse ki. 17Ɓee Raa ese se jaay debm tɔɔkin̰ga num, naan̰ kic Raa an̰ kutu. Taa ɓee Raa se naan̰ salal ɔɔ ɓee Raa ese se, taaɗ ute naase. 18Bin se, nam ɔn̰te kaan̰ ron̰ dala. Maakse ki se jaay debm saap ɔɔ naan̰ debm jeel‑taara aan gɔɔ jee jeel‑taargen do duni ki ara num, bɛɛki se, n̰'tɛɗ ron̰ debm dɛrlɛ naan jeege tu ɔɔ bin jaay n̰'tɛɗn debm jeel‑taar mala mala. 19Taa jee jeel‑taargen do duni ki ara se, Raa aakɗen naanin̰ ki se aan gɔɔ jee dɛrlge. Taa naan̰ se ɓo Kitap taaɗ ɔɔ: Jee ɔk jeel‑taar do duni ki sum se, Raa tɔkɗe do mɛtɛkɗe ki. 20Tɛr Kitap taaɗ daala ɔɔ: Jee ɔk jeel‑taar do duni ki sum se, Mɛljege Raa jeel saapɗe ɔɔ saapm naaɗe se, naan̰ jeelin̰ saapm tɔɔl sɛr eyo. 21Bin num nam ɔn̰te tɔɔm ron̰ ute nakŋ kɛn jikilimge lee tɛɗa. Taa nakge paac se 'gɛn naase: 22maam Pɔli, Apɔlɔsi, Piɛri, duni ɓɔrse, nakŋ kɛn utu kaan do kiŋgjege tu ey lɛ do yojege tu ɔɔ nakgen 'kaan maakŋ kiŋgjege tun ɓɔrse ey lɛ kɛn 'tɛɗn naan ki se, nakgen se paac se 'gɛn naase. 23Taa naase se 'tɛɗkiga gɛn al‑Masi ɔɔ al‑Masi se lɛ naan̰ gɛn Raa.

will be added

X\