1 Corinthiens 2

1Gɛnaamge, kɛn maam jaay m'iŋgo gɔtse ki taa m'asen taaɗn nakŋ kɛn Raa ɔyin̰ga kɔy taaɗ te mɛtin̰ jeege tu ey se, maakŋ taarumge tu se, maam m'taaɗsen te taargen ɔɔn̰ɔ ɔɔn̰ eyo ɔɔ ute jeel taargen deel do eyo. 2Num maakse ki se, maam m'uunoga doa m'je jeel ɗim kuuy eyo, nakŋ kɛn maam m'je jeel se, Isa al‑Masi ɔɔ Isa al‑Masi se ɓo k'tup k'tɔɔlin̰ ro kaag ki se. 3Kɛn maam m'iŋgo gɔtse ki se, maam m'naam m'ɔk rom se tɔɔgum baata, maam m'ɓeere ɔkuma ɔɔ rom ook marga jɛg jɛg. 4Taar kɛn maam m'taaɗseni ute dooy kɛn maam m'dooyseno se, m'taaɗsesin̰o se ute jeel‑taara kɛn jikilimge lee taaɗin̰ nijim se eyo, num gaŋ maakŋ taar kɛn maam m'taaɗsen se, kɛse Nirl Raa ɓo taaɗ tɔɔgin̰a. 5Bin ɓo, kaal maakŋ naase aalki se, 'tɛɗn do jeel‑taar jikilimge tu eyo, num do tɔɔgŋ Raa ki. 6Anum kɛse ɓo jeel‑taar kɛn naaje k'dooy jee al‑Masigen kɛn jeel ɔkga kɔk ɗoobm Mɛljege. Jeel‑taar ese se gɛn do duni ara ute jeegen ɔk tɔɔgŋ iŋg do jeege tun do duni ki ara ki eyo, naaɗe se ɓo kɛn utu 'kut se. 7Naaje k'dooy jeege ute jeel‑taar Raa ese se kɛn jikilimge jeel mɛtin̰ eyo taa taar se Raa ɔyɗesin̰oga kɔyo. Ey num Raa se kaaɗ kɛn naan̰ aalo te do naaŋ ey ɓɔrt se ɓo, naan̰ uunoga kuun doa taa ajeki kɛɗn jeel‑taarin̰a gɛn kɛnd maakŋ nookin̰ ki. 8Ɔɔ jeel‑taar se maakŋ magalge tun iŋg do jeege tu se nam kalaŋ tap ɓo booy ɔk te mɛtin̰ eyo. Ey num kɛn naaɗe jaay booy ɔkoga kɔk mɛtin̰ num, Mɛljegen k'nookin̰ se, naaɗe an̰ kɔŋ tupm tɔɔl ro kaag ki eyo. 9Num gaŋ aan gɔɔ kɛn Kitap taaɗa: Nakŋ se nam ɓii kalaŋ aakin̰ te ute kaamin̰ eyo ɔɔ booyin̰ te ute bin̰ eyo ɔɔ nam saap aan te do ki ey kici, nakgen se Raa tɔnd ɗaapin̰oga ɗaap jeege tun jen̰a. 10Ɗeere, nakgen se te ɗoobm Nirl Raa se, Raa taaɗjekiga mɛtin̰ tooɗga tal. Taa Nirl Salal se jeel naŋ nakge paac bini nakŋ maakŋ maak‑saap Raa ki kici. 11Saapm debkilimi se tap ɓo, naŋa jeele? Gɔtɔ! Kɛn jeel saapm debkilimi se, naan̰ malin̰ sum. Ɔɔ Raa kic ɓo nam jeel saapin̰ eyo; kɛn jeel saapin̰ se, Nirl naan̰ malin̰ sum. 12Anum Nirl naajege k'j'ɔkki se gɛn do duni ara ki eyo, num Nirl kɛn naajege k'j'ɔkki se iin̰o gɔtn Raa ki. Ute naan̰ se ɓo naajege k'jeelki bɛɛ kɛn Raa tɛɗjeki ute maraadin̰ se. 13Taargen naaje k'taaɗ jeege tu se, ute jeel‑taar kɛn jikilimge lee dooy jeege se eyo, naɓo naaje se k'dooy jeege ute jeel‑taar kɛn Nirl Raa ɛɗjeni. Naaje k'taaɗ mɛtn nakgen iin̰o gɔtn Nirl Raa ki jeege tun kɛn ɔk Nirl ese se. 14Goon debkilim ɔnd don̰ do saapm naan̰ malin̰ ki sum se, 'kɔŋ tookŋ do nak kɛn iin̰o gɔtn Nirl Raa ki eyo. Naan̰ aakin̰ aan gɔɔ nakŋ jee dɛrlge ɔɔ naan̰ lɛ, ɔŋ aasin̰ gɛn booy kɔkŋ mɛtin̰ eyo, taa nakgen bin se, Nirl Raa kalin̰ ki sum ɓo 'taaɗn tɔɔkŋ mɛtin̰ jeege tu. 15Num gaŋ debm ɔk Nirl Raa se, naan̰ aak ɔk mɛtn nakge paac. Ɔɔ naan̰ malin̰ lɛ, nam kuuy an̰ kɔŋ kɔjn̰ bɔɔrɔ don̰ ki eyo. 16Aan gɔɔ Kitap taaɗ ɔɔ: Saapm Mɛljege se tap ɓo naŋa jeele ɔɔ naŋa tap ɓo dɛjin̰oga? Anum naajege se j'ɔkki saapm gɛn al‑Masi se maakjege tu.

will be added

X\