1 Corinthiens 16

1M'je m'asen taaɗa taa gursn kɛn aki tiir gɛn noogŋ jee Raagen Jeruzalɛm ki se: maam m'taaɗɗega taaɗ mɛtin̰ eglizge tun taa naaŋ Galat ki. Anum naase 'tɛɗin̰ki bin kici. 2Ɓii dumas ki tak ɓo, naŋa naŋa kic ɓo do naabin̰ kɛn naan̰ tɛɗ jaay ɔŋo se, maak ki se n̰'ɔɔɗ n̰'ɔmbin̰ gɛn don̰a taa an noogŋ gɛnaagen ɗoobm al‑Masi kɛn Jeruzalɛm ki. Bin se, naase aki kɔŋ booy ɓiin kɛn maam m'aanga jaay aki tiir ey sum. 3Kɛn maam jaay m'ɓaa m'aanga gɔtse ki num, jee kɛn naase 'bɛɛr 'tɔɔɗɗeki se, maam m'aɗe kɛɗn maktub ute nakŋ kɛn naase 'tiir 'tusin̰ki jiɗe ki se. Ɔɔ maam m'aɗe kɔl naaɗe aan ɓaa ute nakgen se, Jeruzalɛm ki. 4Kɛn aakin̰ki bɛɛ jaay maam mala ɓo m'ɓaa kic lɛ, naaɗe 'ɓaa ute maama. 5Kɛn maam m'utu m'ɓaa gɔtse ki se, maam m'kaal teecn̰ taa naaŋ Masedoan ki, taa maam m'kaal ute ɗoobm ese. 6Kɛn maam jaay m'aanga gɔtse ki se, baat ey num maam m'tiŋg cɔkɔ ute naase, lɔɓu kaaɗn kuulu se kic daan m'an̰ deel gɔtse ki jaay ɓo sɔm naase amki je nakŋ kɛn am noogŋ gɛn tɛɗn mɛrtum naan ki. 7Anum kɛn ɓɔrse m'ɓaa ɓaa gɔtse ki se, m'je m'asen kaakŋ ute do jɛm sum eyo, naɓo kɛn Mɛljege jaay ɔɔɗumga ɗoobo num, maam m'je m'kiŋg ute naase cɔkɔ. 8Num gaŋ ɓɔrse maam se m'tiŋg maakŋ gɛgɛr kɛn Ɛpɛz ki se, bini m'kaan kaaɗn laa Pantekɔt ki. 9Taa gɔtn ese se, maam m'ɔŋga ɗoobm gɛn tɛɗn naaba Raa ki dɛn aak eyo naɓo jee wɔɔyge kic ɓo dɛna utu gɔtn ese. 10Kɛn Timote jaay aanga gɔtse ki num, aakin̰ki don̰ ki. Bin jaay ɓo naan̰ kic nirlin̰ an̰ kaay eyo; taa naan̰ kic lɛ tɛɗn naabm Mɛljege aan gɔɔ maama. 11Ɓɛrɛ, Timote se, nam ɔn̰te kuum kaalin̰ naaŋ ki, num ɛɗin̰ki nakŋ noogo kɛn naan̰ aɗe kɔkŋ tɛrl gɔtum ki ute lapia. Taa maam m'ute gɛnaagen gɔtn ara se, j'utu j'iŋg j'aak kaamin̰a. 12Gɛnaajege Apɔlɔs se, ey num maam m'ɛɗin̰ga kaay kaam aak eyo m'ɔɔ ute gɛnaage se, n̰'ɓaa gɔtse ki, naɓo naan̰ took eyo gɛn ɓaa gɔtse ki ɓɔrse se. Anum kɛn naan̰ ɔŋga jin̰ jaay sɔm utu 'ɓaa gɔtse ki. 13Daayum iŋgki zɛɛrɛ, kaal maaksen do Raa ki se ɔkin̰ki tɔɔgɔ. 'Tɛɗki jee mɛc ɔɔ 'ɗaarki tɔɔgɔ. 14Ɔɔ nakŋ naase aki 'tɛɗ paac se, 'tɛɗin̰ki ute maak‑jea. 15Gɛnaamge, 'booyki m'asen taaɗ daala: 'jeelki Stepanas ute jee maakŋ ɓeen̰ ki se, naaɗe ɓo jee kɛn took aal maakɗe deet do al‑Masi ki taa naaŋ Akayi ki se ɔɔ naaɗe se ɓo, jee ɔn̰ roɗe gɛn tɛɗn naabm Raa maakŋ jee Raage tu. 16Jee bin se ɓo, 'tookki taarɗe ɔɔ jee kɛn lee dabar tɛɗ naaba ute naaɗe se kic ɓo, 'tookɗeki taarɗe kici. 17Kɛn Stepanas, Portunatus ute Akaykus ɓaaɗo aakum se, maam maakum raap aak eyo; gɔɔ naase ki se, naaɗe ɓaaɗo noogumga. 18Taa naaɗe se tɛɗum maakum tɔɔɗga kaam kalaŋ aan gɔɔ naaɗe tɛɗsen naase ki se kici. Bin num jee bin se, ɔkɗeki ɔɔn̰ɔ. 19Eglizgen taa naaŋ Azi ki se, tɛɗsen tɔɔsɛ. Akilas ute Priska ɔɔ ute egliz kɛn lee tus ɓeeɗe ki se kic tɛɗsen tɔɔsɛ dɛn aak eyo ute ro Mɛljege. 20Gɛnaagen ɗoobm Isa al‑Masi kɛn gɔtn ara se, tɛɗsen tɔɔsɛ paac. 'Tɛɗki tɔɔsɛ naapge tu ɔɔ 'baam 'tɔkki naapa ɔɔ aayki ciil naapge aan gɔɔ gɛnaa naapge. 21Gɔtn ara se, kɛse maam Pɔl ɓo m'raaŋsen tɔɔsn se ute jim mala. 22Debm jaay je Mɛljege ey se, ɔn̰ Raa an̰ naama. Maranaata! (Kɛse je ɗeekŋ ɔɔ: ɔn̰ Mɛljege se n̰'ɓaaɗo.) 23Ɔn̰ Mɛljege Isa asen tɛɗn bɛɛn̰a. 24Maam se m'jese paac taa naajege k'dɔɔk k'tɛɗkiga kalaŋ ute Isa al‑Masi.

will be added

X\