1 Corinthiens 15

1Gɛnaamgen ɗoobm al‑Masi ki, tɛr maam m'je m'asen taaɗa, taa naase aki saapm do Labar Jigan gɛn al‑Masi kɛn maam m'taaɗseno ɔɔ naase 'tookkiro do ki se ɔɔ ɓɔrse kic utu ɔkin̰ki ɔɔn̰ɔ. 2Ute Labar Jigan gɛn al‑Masi ese se ɓo, naase ɔŋkiga kaaja kɛn naase jaay iŋgki do ki aan gɔɔ kɛn maam m'taaɗseno se. Ey num, ɓɛrɛ, kaal maaksen do al‑Masi ki se, 'tɛɗn nakŋ cɛrɛ. 3Nakŋ cir paac paac jaay maam m'dooyseno deet deet se, taar maam mala m'ɔŋin̰o gɔtn al‑Masi kɛn ɔɔ: al‑Masi se ooyga taa kusin̰jege aan gɔɔ kɛn Kitap taaɗno. 4Naan̰ ooy se, j'ɔlin̰o maakŋ ɓaaɗ ki, ɓii k‑mɔtɔge tu se naan̰ duro daan yoge tu, aan gɔɔ kɛn Kitap taaɗno ro ki se kici. 5Kɛn naan̰ duro se, naan̰ teeco naan Piɛr ki ɔɔ tɛr naan̰ teeco naan jee kaan̰ naabin̰ge tun k'daŋɗe ute ro jee sik‑kaar‑di se. 6Tɛr naan̰ teeco naan gɛnaage tun ɗoobm Isa al‑Masi kɛn tus iŋg kiŋg taa naapki ɔɔ jee se cir kaar‑mii. Maakɗe ki se, jee dɛnin̰ utu zɛɛrɛ ɔɔ kɛngen mɛtin̰ge se, ooyga. 7Tɛr naan̰ teeco naan Jak ki ɔɔ tɛr naan̰ teeco naan jee kaan̰ naabin̰ge tu paac. 8Anum kaam mɔɔtn se, naan̰ teeco naan maam ki kici, maam kɛn aan gɔɔ goon kɛn j'oojin̰ laapin̰ aas te eyo. 9Ɗeere, maakŋ jee kaan̰ naabm Isa al‑Masige tu se, bɛɛki num, maam se ɓo debm kɛn k'kaal mum eyo. Taa maam se m'aas kɛn j'am daŋ debm kaan̰ naabm Isa al‑Masi eyo. Taa eglizn gɛn Raa se, maam m'dabarin̰oga. 10Num gaŋ Raa tɛɗumga bɛɛ ɔɔ ute bɛɛ naan̰ tɛɗum se maam m'tɛɗga aan gɔɔ kɛn ɓɔrse naase 'jeelumki se. Anum bɛɛ Raa kɛn tɛɗum maam ki se, tɛɗ te nakŋ cɛr eyo. Naɓo maakŋ jee kaan̰ naabm Isa al‑Masi ki paac se, maam m'tɛɗ naaba m'cirɗe. Num kɛn tɛɗ naabm se, maam eyo, naɓo bɛɛ Raa ese se ɓo ɔlum maam m'tɛɗ naabm se. 11Bin ɓo kɛn 'tɛɗn maama, lɔ naaɗe, kɛse ɓo taar kalaŋ kɛn naaje k'taaɗseni ɔɔ do taar kɛn se ɓo, naase 'took aalkiro maakse do ki se. 12Naaje k'taaɗsen j'ɔɔ al‑Masi se duroga daan yoge tu. Num gɛn ɗi jaay jee mɛtin̰gen maakse ki se, taaɗ ɔɔ jee ooyga kooy se, aɗe kɔŋ 'dur daan yoge tu ey se? 13Kɛn jeege jaay aɗe kɔŋ dur daan yoge tu ey num, al‑Masi kic ɓo duro utu te daan yoge tu eyo. 14Kɛn al‑Masi jaay duro te daan yoge tu ey se, taar naaje k'taaɗseno se, taar rɛn̰ɛ ɔɔ kaal maaksen do al‑Masi ki se kic lɛ, cɛrɛ. 15Ɗeere, kɛn jee ooyga kooy jaay aɗe kɔŋ dur daan yoge tu ey num, al‑Masi kic ɓo Raa durin̰o te daan yoge tu eyo. Bin se, naaje k'tɛɗga saaɗgen gɛn Raa kɛn taaɗ taar mɛt ki eyo taa naaje k'taaɗ jeege tu j'ɔɔ: Raa se duroga al‑Masi daan yoge tu se. 16Kɛn jee ooyga kooy jaay kɔŋ dur daan yoge tu ey num, al‑Masi kic ɓo, duro te daan yoge tu eyo. 17Anum kɛn al‑Masi jaay duro te daan yoge tu ey se, kaal maaksen do naan̰ ki kic ɓo, cɛrɛ. Ɔɔ ɓɔrse kic ɓo, naase utu iŋgki maakŋ kusin̰se ki. 18Kɛn bin num, jee ooyga kooy ɗoobm Isa al‑Masi ki se, utga. 19Kɛn naajege jaay k'j'ɔndki dojege do al‑Masi ki gɛn tiŋg do naaŋ ki ara sum num, maakŋ jikilimge tun do naaŋ ki ara se, ey num bɛɛki se, naajege sum ɓo kɛn jeege ajeki kɛɛjn̰ dojege tu cir kɛn jeegen ɓaa se paac paac. 20Num gaŋ ɗeere, al‑Masi se duroga daan yoge tu ɔɔ Raa jaay durin̰o deet deet se, jejeki taaɗn ɔɔ: jeegen ooyga kooy se naan̰ utu aɗen 'dur bin kici. 21Ute ɗoobm deb kalaŋ sum ɓo, yoa aan do jeege tu ɔɔ ute ɗoobm deb kalaŋ kuuy se, jeege utu aɗe 'dur daan yoge tu. 22Aan gɔɔ jikilimge paac teeco mɛtjil Adum ki se, naaɗe paac ooy aan gɔɔ naan̰a. Bin ɓo gɛn jeegen paacn̰ dɔɔk ute al‑Masi se, naaɗe paac utu 'kɔŋ kaaja ute naan̰ kici. 23Num Raa aɗe 'dur jeegen ooyga kooy se naan̰ aɗen rɛɛsn ute ɗoobin̰ ɗoobin̰a. Al‑Masi se naan̰ ɓo debm duro deet daan yoge tu jaay ɓo jee naan̰ge se utu aɗe 'dur daan yoge tu ɓii kɛn naan̰ aɗe ɓaa se. 24Num sitange, maragge ɔɔ nakgen ɔk tɔɔgɔ do jeege tu paac se, al‑Masi utu aɗen 'tɛɗn 'tɛɗn gɔtɔ, jaay ɓo duni se 'naŋa ɔɔ kaaɗ kɛn se sum ɓo al‑Masi 'kɔn̰ gaara kaam ji Bubin̰ Raa. 25Taa al‑Masi se 'kɔsn gaara bini jee taamooyin̰ge se Raa aɗen tɛɗn naan̰ ɓo kiŋg doɗe ki. 26Debm wɔɔy kaam mɔɔtn kɛn j'an̰ kutin̰ kap se, yoa. 27Tɛr Kitap taaɗga taaɗ ɔɔ al‑Masi se: Raa ɛɗin̰ga nakge paac kaam jin̰a. Kɛn Kitap jaay taaɗ ɔɔ nakge paac tɛɗga kaam jin̰ se, ɔɔp Raa sum ɓo kaam jin̰ eyo. Taa Raa se, naan̰ ɓo debm kɛn ɛɗin̰ nakge paac kaam jin̰a. 28Kɛn Raa jaay ɛɗga nakge paac kaam ji al‑Masi se, naan̰ Goonin̰ mala se, 'kɔɔpm kaam ji Raa kɛn ɛɗin̰ nakge paac kaam jin̰ se. Bin se jaay ɓo Raa utu 'kɔsn gaara do nakge tun ɓaa se paac. 29Jee kɛn je ɔɔ j'aɗe batizn taa jeegen ooyga kooy se tap ɓo, batɛm se aɗen tɛɗn ɗi naaɗe kɛn jee ooyga kooy se? Kɛn jeegen ooyga kooy jaay aɗe kɔŋ 'dur daan yoge tu ey num, gɛn ɗi naaɗe ɔn̰ roɗe k'batizɗe taa naaɗe se? 30Kɛn jeegen ooyga kooy jaay 'dur daan yoge tu ey num, gɛn ɗi jaay naajege daayum k'lee k'ɓaa gɔtn ɔɔn̰ kɛn j'an kutn koje ro ki se? 31Gɛnaamgen ɗoobm al‑Masi ki, daayum maam se m'lee nirl yo ki. Kɛse taar mɛt ki, ɔɔ aan gɔɔ gɔtn Mɛljege Isa al‑Masi ki se, maam m'tɔɔm roma taa naase se, taar se mɛt ki kici. 32Gɛnaamge, maakŋ gɛgɛr kɛn Ɛpɛz ki se, maam m'ɗoɗega ute jeegen aan gɔɔ daa gaabge se. Kɛn jaay gɛn nakgen do duni ki sum num, maam tap ɓo m'kɔŋ ɗi ro ki? Kɛn jeegen ooyga kooy jaay aɗe kɔŋ dur daan yoge tu ey num: J'ɔski ɔɔ j'aayki ute maraadjege, taa naajege se lɛ, mɛtbeeki j'aki 'kooyo. 33Ɔn̰ten 'kaan̰ki rose dala, ɓɛrɛ: Mɛɗgen jig ey se ɓo kɛn tuj kiŋg bɛɛ jeege. 34'Tɛrlki saapse ɔɔ ɔn̰te 'tɛɗki kusin̰a! Maam m'aak jee mɛtin̰ge maakse ki se jeel Raa eyo; maam m'taaɗsen bin se taa sɔkɔn̰ asen tɔɔlɔ. 35Nam 'kɔŋ tɔnd mɛta ɔɔ: jeegen ooyga kooy se tap ɓo aɗe 'dur ɔɔ ɗi daan yoge tu? Ɔɔ roɗe tap ɓo 'tecn̰ ɔɔ ɗi? 36Kalɛ, debm dɛrlɛ! Kaam nakŋ naai ɔɔcin̰ga se, ruumga jaay teec ey la? 37Naai 'lee ɔɔc se, ɔɔc kaam teen̰e ey lɛ kaam ne ɗim kuuy, num naai 'lee ɔɔc garɗin̰ eyo. 38Kɛn naai jaay ɔɔcga se, Raa teecin̰a ɔɔ teep tɛɗn magala aan gɔɔ kɛn naan̰ maakin̰ jen ro ki. Kupm kaam naka tak ɓo tecn̰ naparin̰ kalin̰ ki kalin̰ ki. 39Nakgen oo ko se paac roɗe se tec naap eyo. Gɛn jikilimge lɛ tec kalin̰ ki, gɛn daage lɛ kalin̰ ki, gɛn yeelge kic lɛ kalin̰ ki ɔɔ gɛn kɛn̰jge kic kalin̰ ki. 40Aan gɔɔ nakgen do naaŋ ki ɔk roge se, kɛngen maakŋ raa ki se ɔk kici. Naɓo kaakŋ bɛɛɗege se, tec te naap eyo. 41Kaaɗa wɔɔrin̰ tec kalin̰ ki ɔɔ laapa kic kalin̰ ki ɔɔ k‑dijge kic ɓo wɔɔrɗe tec kalɗe ki. Ɔɔ tɛr k‑dijge ute naapa kic wɔɔrɗe tec kalaŋ eyo. 42Bin ɓo ɓii kɛn jeege aɗe dur daan yoge tu se, 'tɛɗn bin kici. Debkilimi jaay ooy j'ɔlin̰ga maakŋ ɓaaɗ ki se, ruum naatn. Num gaŋ ɓii kɛn naan̰ aɗe 'dur daan yoge tu se, ro kɛn Raa an̰ kɛɗ se 'kɔŋ ruum ey sum. 43Ro debkilim ooy jaay j'ɔlin̰ga maakŋ ɓaaɗ ki se, naan̰ tɛɗ aak kusu. Num ɓii kɛn naan̰ aɗe 'dur daan yoge tu se, Raa an̰ kɛɗn ro aak bɛɛ. Ro debkilim ooy jaay j'ɔlin̰ga maakŋ ɓaaɗ ki se, naan̰ ɔk tɔɔg eyo. Num ɓii kɛn naan̰ aɗe 'dur daan yoge tu se, Raa an̰ kɛɗn ro kɛn ɔk tɔɔgɔ. 44Debm jaay ooyga num kɛn j'ɔlin̰ga maakŋ ɓaaɗ ki se, kɛse j'ɔl daa ro sum. Num kɛn naan̰ jaay aɗe 'dur daan yoge tu se, aɗe teecn̰ ute ro kɛn Nirl Salal an̰ kɛɗa. Aan gɔɔ do naaŋ ki debkilim ɔk daa ro se, maakŋ raa ki kic ɓo Raa an̰ ɓaa kɛɗn ro kuuy. 45Kɛse ɓo Kitap taaɗ ɔɔ: debkilim deet deet se ron̰ Adum, naan̰ se ɔk daa roa ute koa. Adum kaam mɔɔtn se, naan̰ se Nirl kɛn ɛɗ kaaja jeege tu. 46Debm kɛn ɓaaɗo deet deet se, debm ɔk Nirl kɛn ɛɗ kaaja se eyo, num debm ɔk daa ro ɓo ɓaaɗo deete ɔɔ debm ɔk Nirl kɛn ɛɗ kaaja se, ɓaaɗo kaam mɔɔtn. 47Debm deet deet se naan̰ se j'ɔɓin̰ ute naaŋa. Debm k‑dige se, naan̰ se iin̰o maakŋ raa ki. 48Jeegen do naaŋ ki ara paac se, tec aan gɔɔ debm kɛn j'ɔɓin̰ ute naaŋa se. Ɔɔ jeegen maakŋ raa ki se lɛ, tec aan gɔɔ debm kɛn iin̰o maakŋ raa ki se kici. 49Aan gɔɔ ɓɔrse naajege k'tecki debm kɛn j'ɔɓin̰ ute naaŋa se, naajege k'j'utu j'aki tec debm kɛn iin̰o maakŋ raa ki se kici. 50'Booyki gɛnaamgen ɗoobm al‑Masi ki, m'asen taaɗa: ɓɛrɛ, debkilimi ute daa ron̰ ɔk mooso se 'kɔŋ ɓaa maakŋ Gaar Raa ki eyo. Ɔɔ daa ro se kɛn utu 'ruum se lɛ, naan̰ se 'kɔŋ tiŋg gɛn daayum eyo. 51Maam m'je m'asen taaɗ ute nakŋ kɛn jeege jeel mɛtin̰ ey se: 'Booyki! Naajege se j'aki kooy paac eyo. Anum naajege paacki se, Raa utu ajeki tɛrl rojege kaam kuuy. 52Ɓii kɛn pulu 'keem kaam mɔɔtn se, 'tɛɗ yɔkɔɗ aan gɔɔ debm ɔnd kaamin̰ sapac se, kaaɗ kɛn pulu 'keem se, jeegen ooyga kooy se utu 'duru ute ro kɛn 'kɔŋ ruum eyo. Ɔɔ naajegen j'utuki zɛɛr se lɛ, Raa utu ajeki tɛrl rojege kaam kuuy. 53Ro kɛn utu 'ruum se, tak ɓo j'utu j'an̰ kɛɗn ro kɛn 'kɔŋ ruum eyo ɔɔ ro kɔŋ kooy se lɛ, j'utu j'an̰ kɛɗn ro kɛn 'kɔŋ kooy ey sum. 54Kaaɗ kɛn ro kɛn utu 'ruum se, jaay utu tɛrl ro kɛn 'kɔŋ ruum eyo, ɔɔ ro kɛn 'kooy se lɛ j'utu j'an̰ tɛrlin̰ ute ro kɛn 'kɔŋ kooy ey se, bin ɓo taar kɛn Kitap taaɗ do dɔkin̰ se 'kaan ɗoobin̰ ki kɛn ɔɔ: Ɓɛrɛ, yo se Raa cirin̰ga naan̰ tɛɗga gɔtɔ. 55Naai yoa, tɔɔgi kɛn naai 'cir jeege se tap ɓo gay? Ɔɔ tɔɔgi kɛn naai lee tɔɔl jeege se tap ɓo gay? 56Tɔɔgŋ kɛn naai 'lee tɔɔl jeege se lɛ, kɛse kusin̰a. Ɔɔ kusin̰ lɛ, kɛn ɛɗin̰ tɔɔgɔ se, Ko Taar kɛn Raa ɛɗo Musa ki. 57Anum ute ɗoobm Mɛljege Isa al‑Masi se, k'tɔɔmki Raa kɛn ɛɗjeki tɔɔgɔ k'cirki nakgen ɔk tɔɔgɔ dojege tu! 58Bin ɓo, gɛnaa maak‑jemge, 'ɗaarki tɔɔgɔ. Ɔn̰te 'tɛrlki mɔɔtn! Naabm Mɛljege se ɔn̰te 'kɔn̰in̰ki, 'tɛɗ 'ɓaansin̰ki ute naanin̰a. 'Jeelki, naabm kɛn naase 'lee dabara 'tɛɗin̰ki Mɛljege tu se, cɛr eyo.

will be added

X\