1 Corinthiens 14

1'Jeki maak‑jea ɔɔ 'dɔŋki naabm kɛn Nirl Salal ɛɗ jeege tu ɔɔ kɛn tap ki se, 'jeki ɗoobm gɛn taaɗn taargen teeco taar Raa ki. 2Taa debm kɛn taaɗ taar naaŋ kɛn jeege jeel ey se, kɛse naan̰ taaɗ jikilimge tu eyo, num taaɗ Raa ki. Ɔɔ taar naaŋ kɛn naan̰ taaɗ se lɛ, nam jeel mɛtin̰ eyo. Ute tɔɔgŋ Nirl Salal se, naan̰ taaɗ nakgen deel doa kɛn jeege ɔnd ute mɛt kon̰ eyo. 3Num gaŋ debm kɛn taaɗ taar teeco taar Raa ki se, naan̰ taaɗ jikilimge tu, noogɗe gɛn ziiɗn ɓaa ute naanɗe, dɛjɗe ɔɔ ɛɗɗen kaay kaama. 4Debm taaɗ taar naaŋgen jeege jeel mɛtin̰ ey se, kɛse noogin̰ naan̰ mala gɛn ziiɗn ɓaa ute naanin̰a, gaŋ debm jaay taaɗ taar teeco taar Raa ki se, noog jee egliz ki taa ziiɗn ɓaa ute naanɗe. 5M'je se, naase paacki se, aki 'taaɗn taar naaŋgen jeege jeel eyo. Naɓo kɛn maam m'je cir paac paac se, m'je naase aki taaɗn taargen teeco taar Raa ki. Taa debm kɛn taaɗ taar naaŋgen jeege jeelin̰ ey se, ɔn̰ deb kalaŋ 'taaɗ tɔɔkŋ mɛtin̰ jee eglizge tu taa aɗen noogo naaɗe ziiɗn ɓaa ute naanɗe, kɛn bin ey num, debm taaɗ taar teeco taar Raa ki se cir debm kɛn taaɗ taar naaŋgen jeege jeelin̰ ey se. 6Bin ɓo, gɛnaamgen ɗoobm al‑Masi ki, aan gɔɔ ɓɔrse maam m'ɓaa gɔtse ki jaay m'taaɗsen ute taar naaŋgen kɛn naase 'jeelki ey se, taarumgen m'taaɗsen se lɛ ɔŋ taaɗsen mɛtn nakgen Raa taaɗum mɛtin̰ se eyo, ɛɗsen te jeel eyo, taaɗsen taar teeco taar Raa ki eyo ɔɔ dooysen ey se, kɛse asen kɔŋ noogŋ ɔɔ ɗi? 7Bin ɓo 'jeelki, silɛɛrɛ ute kurundu jaay ɓaa mɛtn kaa ki ey se, kaa se j'an̰ jeel j'ɔɔ ɗio? 8Num debm tuuy ɓɔrlɔ gɛn bɔɔrɔ se jaay tuuyin̰ mɛt ki ey se, jeege 'kɔŋ ɗaapm roɗe gɛn ɓaa bɔɔr ki ne? 9Gɛn naase kic ɓo tec bini. Kɛn naase 'taaɗki taar naaŋgen jeege booy ɔk mɛtin̰ ey se, taarsegen naase 'taaɗki se, jeege 'jeel kɔkŋ mɛtin̰ ɔɔ ɗi? Kɛn bin num, taar naase ulki se, ulki rɛn̰ɛ. 10Ɗeere, do naaŋ ki ara se, taar naaŋge naparin̰ dɛna ɔɔ maakɗe ki se, taar naaŋ kalaŋ jaay k'booy k'j'ɔkin̰ ey se, gɔtɔ. 11Kɛn deba jaay taaɗum ute taar naaŋin̰ jaay maam m'jeel ey se, debm se maam m'jeelin̰ naan̰ se mɛrtɛ. Ɔɔ maam kic lɛ naan̰ am jeelum maam se, mɛrtɛ. 12Aan gɔɔ naase 'lee 'dɔŋki naabm kɛn Nirl Salal ɛɗ jeege tu se, 'dɔŋki naabm kɛn 'noogŋ jee egliz ki 'ziiɗn ɓaa ute naanɗe. 13Taa naan̰ se ɓo, debm taaɗ taar naaŋgen jeege jeel ey se, n̰'tɔnd mɛtn Raa an̰ kɛɗn jeele gɛn tɛrl taar se jeege tu. 14Kɛn maam jaay m'eem Raa ute taar naaŋ jeege jeel ey se, ɗeere, maam m'eemin̰ ute maakum paac, naɓo taargen teec taarum ki se, saapum ɔnd ute mɛtin̰ eyo. 15Kɛn bin num m'tɛɗn m'ɔɔ ɗi? M'keem Raa ute maakum paac ute taar naaŋgen jeege jeel ey se naɓo maam m'je m'an̰ keemin̰ ute ɗoobm kɛn saapum kic ɓo jeel ɔk mɛtin̰a. M'je m'kaar kaa ute maakum paac ute taar naaŋgen jeege jeel ey se naɓo, m'je m'kaar kaa ute ɗoobm kɛn saapum kic ɓo jeel ɔk mɛtin̰a. 16Kɛn jeege tusga gɛn keem Raa jaay naai 'tɔɔm Raa ute saapi paac ute taar naaŋgen kɛn jeege jeel ey se, ɔɔ nam lee ɓaaɗo booy taar Raa sum jaay utu maakɗe ki se, naan̰ 'kɔŋ tookŋ amin ɔɔ ɗio, taa taari kɛn 'tɔɔm Raa se lɛ, naan̰ ɔnd ute mɛtin̰ eyo. 17Baat ey num, taari kɛn naai 'tɔɔm Raa se nijim aak eyo, naɓo debm iŋg booyi jaay jeel mɛtin̰ ey se, ɔŋ noogin̰ gɛn ziiɗn ɓaa ute naanin̰ eyo. 18Maam m'tɔɔm Raa taa maam se m'jeel taaɗn taar naaŋgen jeege jeel ey se m'cirsen, naasen kɛn iŋg 'ɓaaki se paac. 19Naɓo maakŋ egliz ki se, maam m'je m'taaɗn taarge mii sum kɛn jeege jeel mɛtin̰a taa aɗen dooyo, naan̰ se cir kɛn m'taaɗ taara dupu kando kando ute taar naaŋgen jeege jeel mɛtin̰ ey se. 20Gɛnaamge, ɔn̰te 'saapki aan gɔɔ gɛn gaan sɛɛmge, num 'saapki aan gɔɔ jee magalge. Num gaŋ gɛn tɛɗn kusin̰ num, 'tɛɗki rose aan gɔɔ gaangen sɛɛmɛ kɛn jeel tɛɗ kusin̰ ey ɓɔrt se. 21Taa naan̰ se ɓo maakŋ Ko Taar kɛn Raa ɛɗo Musa ki raaŋin̰ se Mɛljege Raa taaɗ ɔɔ: Jee se maam m'aɗen taaɗ ute taar naaŋgen kuuy ɔɔ m'aɗe kɔl jee kuuy ɓo utu aɗen taaɗn ute taar naaŋɗege. Ute naan̰ se kic ɓo naaɗe 'booy kuun taarum ey tap. 22Taar naaŋgen k'taaɗ jaay jeege jeel ey se, kɛse Raa ɓo taaɗ tɔɔgin̰ do jeege tun aal te maakɗe do Isa ki eyo. Num jee kɛn aalga kaal maakɗe do Isa ki se, taar naaŋgen jeege jeel ey se, taaɗ ute naaɗe eyo. Num gaŋ debm jaay taaɗ taar teeco taar Raa ki se, kɛse naan̰ taaɗ ute jee kɛn aalga kaal maakɗe do Isa ki ɔɔ jee aal te maakɗe do Isa ki ey se, taar se ɔlɗe naaɗe maak ki eyo. 23Kɛn aan gɔɔ egliz ute magalin̰ tus jaay jeege paac taaɗ taar naaŋgen jeege jeel eyo, jaay, jee lee ɓaaɗo booy taar Raa sum ey lɛ jee aal maakɗe do Isa ki eyo ɓaaɗo maakse ki se, asen taaɗn ɔɔ naase se jee dɛrlge ey ne? 24Num gaŋ kɛn naase 'paacki jaay 'taaɗki taar teeco taar Raa ki ute taar naaŋgen kɛn jeege jeelin̰ se, debm aal maakin̰ do Isa ki eyo, ey lɛ debm lee ɓaaɗo maakse ki gɛn booy taar Raa sum se, kɛn naan̰ booy taarsege se, an̰ kɛɗn saapa ɔɔ naan̰ 'jeel ron̰ ki naan̰ se debm kusin̰a, 25ɔɔ taar kɛn maakin̰ kɛn jeege jeel ey se lɛ, 'tooɗn tal. Gɔtn se naan̰ 'kɛrgŋ kɔnd naanin̰ naaŋ ki naan Raa ki ɔɔ an̰ keeme ɔɔ naan̰ 'taaɗn makɔn̰ ɔɔ: Ɗeer ɗeer, naase se Raa utu daanse ki! 26Gɛnaamgen ɗoobm al‑Masi ki, bin se maam m'asen taaɗn m'ɔɔ ɗi? Kɛn 'tuskiga gɛn keem Raa se, naŋa naŋa kic ɓo kɛn ɓaa kaar kaa, dooy jeege, taaɗn mɛtn nakŋ kɛn Raa taaɗin̰o, taaɗn taar naaŋgen jeege jeel eyo, ey lɛ tɛrl taar naaŋ jeege jeel ey se, anum nakŋ naase aki tɛɗ paac se, 'tɛɗin̰ki taa 'noogŋ egliz 'ziiɗn ɓaa ute naanin̰a. 27Kɛn jeege baag taaɗn taar naaŋgen jeege jeel ey se, ɔn̰ jeege dio ɔɔ kɛn cirga lɛ jeege mɔtɔ sum. Kɛn aki taaɗ kic num, deb kalaŋ taaɗ aasga ram jaay ɓo deb kuuy 'taaɗa. Ɔɔ ɔn̰ nam kuuy an̰ tɛrlin̰ jeege tu. 28Kɛn debm kɛn an̰ tɛrlin̰ taar se jeege tu gɔtɔ num, gɛnaa kɛn taaɗ taar naaŋ kɛn jeege jeel ey se, n̰'ɔn̰te taaɗn naan jeege tu, num n̰'taaɗ ute maakin̰a ɔɔ n̰'taaɗ Raa ki. 29Num gɛn jee taaɗ taar teeco taar Raa ki se lɛ, ɔn̰ jeege dio ey lɛ mɔtɔ sum ɓo, 'taaɗa. Ɔɔ jee mɛtin̰ge se, k'booy k'j'ɔk mɛtn taar se jiga, taar se ɓaa ute mɛtn taar Raa lɔɓu gɔtɔ. 30Maakse ki se jaay deb kalaŋ Raa taaɗin̰ mɛtn nakŋ gam ɔɔ je taaɗn mɛtn nakŋ se jeege tu se, deb kuuy kɛn taaɗ taaɗ se n̰'doa ɔɔ n̰'ɔn̰ gɔtɔ deb kɛn se. 31Ɗeere, paacki se, ɔkki ɗoobo kɛn aki taaɗn taar teeco taar Raa ki, naɓo kɛn deb kalaŋ taaɗ aasga jaay ɓo kɔn̰ gɔtɔ naapin̰ ki. Bin se jeege paac, naase aɗeki dooyo ɔɔ aɗeki kɛɗn kaay kaama. 32Debm jaay taaɗ taar teeco taar Raa ki se, naan̰ bɔɔb ɔk taarin̰a. 33Nakŋ ute ɗoobin̰ ey se, Raa je eyo. Num Raa se je naase aki kiŋg ute lapia. Naase 'tɛɗki aan gɔɔ eglizgen gɛn jee Raagen ɓaa se paac, 34kɛn jee al‑Masige jaay tusga se, mɛndgen maakse ki se, k'doa. Aan gɔɔ kɛn Ko Taar kɛn Raa ɛɗo Musa ki taaɗa, maakŋ jee al‑Masige tun tusga se, mɛndge se ɔk ɗoobo gɛn taaɗn taar eyo num k'j'iŋg kaam kalaŋ. 35Kɛn naaɗe ɓo je tɔnd mɛta lɛ, k'ɓaa k'tɔnd mɛtn gaabɗege ɓeene. Ey num kɛn jee al‑Masige tusga num, mɛndge jaay 'taaɗn taara se dɔɔɗ eyo. 36Lɔɓu taar Raa se uuno mɛtin̰ gɔtse ki sum la? Ɔɔ taar se, naase kalse ki sum ɓo 'booyin̰kiro lɛ? 37Maakse ki debm jaay saap ɔɔ naan̰ ɔk Nirl Salal maakin̰ ki ey lɛ tɛɗga debm taaɗn taar teeco taar Raa ki se, n̰'jeele taar kɛn maam m'raaŋsen se, kɛse Mɛljege mala ɓo taaɗsen nakŋ gɛn tɛɗa. 38Anum taar kɛn maam m'raaŋsen se jaay debm baate tookŋ do ki se, debm bin se Raa kic ɓo, jeelin̰ eyo. 39Bin se, gɛnaamgen ɗoobm al‑Masi ki, 'dɔŋki gɛn taaɗn taar teeco taar Raa ki ɔɔ jeegen taaɗ taar naaŋgen jeege jeel ey se, ɔn̰te 'gaaski gɛn taaɗa. 40Naɓo nakŋ paacn̰ kɛn naase aki tɛɗ se, 'tɛɗin̰ki ute ɗoobin̰ tak tak.

will be added

X\