1 Corinthiens 13

1Kɛn maam ɓo m'jeel taaɗn taar naaŋ jeege paac ɔɔ kɛn m'jeel taar kɔɗn Raage kic ɓo, naɓo kɛn maam m'ɔk maak‑je ey se, kɛse maam m'tec aan gɔɔ gaŋga ey lɛ aan gɔɔ mɛndɛ kɛn j'ɔndin̰ga num eem tɔkŋ bi kiric se. 2Kɛn maam ɓo m'taaɗ taar teeco taar Raa ki jeege tu, ɔɔ kɛn m'jeel nakgen paacn̰ jeege jeel mɛtin̰ eyo ɔɔ m'jeel mɛtn nakge paac, ɔɔ kɛn maam ɓo m'aal maakum paac do Raa ki jaay m'taaɗ koge tu m'ɔɔ j'iin̰ k'ɗɛɛtɛ j'ɔn̰ gɔtn se jaay naaɗe took taarum kic ɓo, num kɛn maam jaay m'je jeege ey se, maam m'debm tɔɔl sɛr eyo. 3Kɛn maam ɓo m'nig maalum paac jee daayge tu ɔɔ bini m'ɔn̰ rom k'tɔɔcin̰ pooɗn kic ɓo, anum kɛn maam jaay m'je jeege ey se, kɛse maam m'kɔŋ ɗi ro ki? 4Debm ɔk maakje do jeege tu se, naan̰ maakin̰ deere ɔɔ kɛrcɛlɛ. Naan̰ ɔk maak‑kilimi do nam ki eyo, naan̰ oon eyo ɔɔ magal ron̰ eyo; 5debm ɔk maak‑je do jeege tu se, naan̰ tɛɗ nakŋ sɔkɔn̰ eyo, naan̰ debm nakɔɔn̰ eyo, tɛɗ maak‑taar eyo, ɔk nam ute taar‑maak eyo; 6debm kɛn je jeege se, nakgen ute ɗoobin̰ ey se, naan̰ maakin̰ raap do ki eyo, num naan̰ maakin̰ raap do taar kɛn mɛt ki. 7Debm ɔk maak‑je se, kɛn k'tɛɗin̰ kusin̰ kic ɓo, naan̰ an ɗim eyo. Daayum naan̰ tuj ɔrmin̰ ute jeege eyo, ɔnd don̰ paac do Raa ki ɔɔ ɔŋ sɛrk nakge paac. 8Maak‑je se naan̰ 'kɔŋ naŋ eyo. Taargen k'taaɗin̰ kɛn teeco taar Raa ki se lɛ, kaaɗin̰ utu 'deele. Ɔɔ taar naaŋgen jeege jeel ey se utu 'naŋa ɔɔ jeel nakge se lɛ, kaaɗin̰ utu 'deel kici. 9Taa jeel naajege se jeel naŋ mɛtn nakge paac eyo. Ɔɔ taargen k'taaɗin̰ kɛn teeco taar Raa ki se lɛ, ɔŋ aas ute gɛn Raa mal eyo. 10Anum nakgen mala mala jaay aɗe ɓaa se, nakgen paacn̰ kɛn aas te ute ɗoobin̰ ey se, kaaɗin̰ utu 'deele. 11Kaaɗ kɛn maam m'utu m'baat se, napar taaɗn taaruma, saapuma ɔɔ booy kɔkuma, paac se, aan gɔɔ gɛn gaan sɛɛmge; anum kɛn maam jaay m'aas gaaba sum se, nakŋ gaan sɛɛmge se maam m'rɛsin̰ga naatn. 12Ɓɔrse se, naajege j'aakki nakge naɓo j'aak j'ɔkki mɛtɗe eyo aan gɔɔ debm aak daan kaamin̰ maakŋ kaam‑kaay‑naaŋ kɛn aak ɔɔɗ ey se. Num ɓii kalaŋ se, j'utu j'an̰ kaakin̰ 'tooɗn tal. Ɓɔrse se, maam m'jeel m'ɔk mɛtn nakge paac eyo, naɓo ɓii kalaŋ m'utu m'jeel kɔkŋ mɛtn nakge se mala mala aan gɔɔ kɛn Raa jeelum maam se. 13Ɓɔrse nakgen kɛn 'kɔɔpm 'tiŋg se: kaal maakŋ do Raa ki, kɔnd do kɛn j'ɔndki do Raa ki ɔɔ maak‑jea. Ɔɔ maakŋ naaɗe kɛn mɔtɔ se, kɛn cirɗe paac se, maak‑jea.

will be added

X\