1 Corinthiens 12

1Gɛnaamgen ɗoobm al‑Masi ki, ɓɔrse maam m'je m'asen tɛrl do mɛtn taar naab kɛn Nirl Raa ɛɗ jeege tu se. Maam m'je m'asen kɔn̰ naase aki kiŋg do dɛrlse ki eyo. 2Do dɔkin̰, kɛn naase 'jeelkiro te Raa mal ey se, kaaɗ kɛn naane se, nakŋ ɔk tɔɔgɔ dose ki se 'tɔɔɗ ɔlseno gɔtn raasege tun ɔŋ taaɗ taar ey se, ɔɔ naase lɛ ɔŋ aasin̰kiro gɛn ɗaar tɔɔg eyo. 3Taa naan̰ se ɓo, 'booyki m'asen taaɗa: debm jaay taaɗ ɔɔ: ɔn̰ Raa 'naam Isa se, debm bin se naan̰ ɔk Nirl Raa maakin̰ ki eyo. Ɔɔ debm taaɗ ɔɔ: Isa se Mɛljege se, debm bin se ɔk Nirl Salal maakin̰ ki. 4Nirl Salal se, naan̰ kalaŋ sum, naɓo nakgen kɛn naan̰ ɛɗ jeege tu se, dɔɔlin̰ dɛna. 5Mɛljege se kic naan̰ kalaŋ sum, naɓo naabm kɛn naan̰ ɛɗ jeege tu se, dɔɔlin̰ dɛna. 6Raa kɛn tɛɗn naaba maakŋ jeege tu paac se, naan̰ kalaŋ sum, naɓo ɗoobm kɛn naan̰ ɛɗo gɛn tɛɗn naabin̰ se, dɔɔlin̰ dɛna. 7Naŋa naŋa kic ɓo Raa ɛɗin̰ Nirl Salal maakin̰ ki se, taa an tɛɗn naabm kɛn 'noogŋ jee Raage paac. 8Deb kalaŋ se, Nirl Raa ɛɗin̰ jeel‑taara gɛn taaɗn taar jeege tu ɔɔ deb kuuy se, Nirl Raa ese sum ɓo ɛɗin̰ jeele gɛn jeel naka. 9Nirl Raa ese sum ɓo, tɛɗ deb kalaŋ aal maakin̰ do Isa ki cir gɛn jeegen kuuy se ɔɔ deb kuuy se, naan̰ ɛɗin̰ tɔɔgɔ gɛn kɛɗn lapia jee kɔɔn̰ge tu. 10Deb kuuy lɛ, Nirl Raa ɛɗin̰ tɔɔgŋ gɛn tɛɗn nakŋ‑kɔɔɓge, deb kɛn kuuy naan̰ ɛɗin̰ tɔɔgŋ gɛn taaɗn taar teeco taar Raa ki. Ɔɔ deb kɛn kuuy se, naan̰ ɛɗin̰ tɔɔgŋ kɛn an jeel nakgen kɛn iin̰o gɔtn Nirl Salal ki ey lɛ gɔtn sitange tu. Ɔɔ deb kɛn kuuy se, naan̰ ɛɗin̰ tɔɔgŋ gɛn jeel taaɗn taar naaŋgen jeege jeel eyo. Ɔɔ tɛr deb kɛn kuuy lɛ, naan̰ ɛɗin̰ tɔɔgŋ gɛn jeel taaɗn tɔɔkŋ mɛtn taar naaŋgen jeege jeel ey se. 11Ɔɔ kɛse Nirl Raa kalaŋ ese sum ɓo tɛɗin̰ nakgen se paac ɔɔ naŋa naŋa kic ɓo naan̰ ɛɗin̰ naabin̰ naabin̰ aan gɔɔ kɛn naan̰ maakin̰ jen ro ki. 12Aakki tu: ro debkilimi se, naan̰ kalaŋ sum, naɓo tɔp kaam dɛna. Ute tɔpm kɛn naan̰ tɔp kaam dɛn se kic ɓo tum tɛɗ ro kalaŋ. Jeegen kɛn dɔɔkga ute al‑Masi se kic ɓo tec bini. 13Ɔɔ naajege paacki se kɛn Yaudge ey lɛ Grɛkge, ɓulge ey lɛ ɓulge eyo, k'batizjekiro ute Nirl Salal kalaŋ ese sum ɔɔ k'tum k'tɛɗkiga aan gɔɔ ro kalaŋ. Ɔɔ Raa ɛɗjekiga Nirlin̰ se maakjege tu. 14Bin ɓo ro debkilimi se naan̰ kaam kalaŋ sum eyo, naɓo naan̰ tɔp kaam dɛna. 15Jɛ se 'kɔŋ taaɗn ɔɔ: «Maam lɛ m'ji ey se, m'kɔŋ tɛɗn maakŋ ro ki eyo.» Anum kɛn naan̰ taaɗ bin sum ɓo, 'kɔŋ tɛɗn maakŋ ro debkilim ki ey ne? 16Bi se 'kɔŋ taaɗn ɔɔ: «Maam lɛ m'kaama ey se, m'kɔŋ tɛɗn maakŋ ro debkilim ki eyo.» Anum kɛn naan̰ taaɗ bin sum ɓo, 'kɔŋ tɛɗn maakŋ ro debkilim ki ey ne? 17Kɛn ro debkilimi jaay kaam kalin̰ ki sum num, naan̰ tap ɓo 'booy ute ɗio? Ɔɔ kɛn ro paac ɓo bi kalin̰ ki sum num, naan̰ 'kootn ute ɗio? 18Ɗeere, ro debkilimi se, Raa tɔndin̰sin̰ga ute ɗoobin̰ tak tak aan gɔɔ kɛn naan̰ maakin̰ jen ro ki. 19Ro debkilim jaay ɔk ro kaam kalaŋ sum num, kɛse j'an̰ kɔŋ daŋ ro ute magalin̰ eyo. 20Ɗeere, ro debkilimi se tɔp kaam dɛna naɓo kɛn tumga se, tɛɗ ro kalaŋ. 21Kaama 'kɔŋ taaɗn ji ki ɔɔ: «Maam se m'an ɗim ute naai eyo.» Ɔɔ do lɛ 'kɔŋ taaɗn jɛge tu ɔɔ: «Maam se m'an ɗim ute naase eyo.» 22Num gaŋ roi kaam kalaŋ kɛn naai aakin̰ ɔɔ ɔk tɔɔg ey se, kɛn naan̰ jaay gɔtɔ num, kiŋgi se ai tɛɗn ɔɔn̰ɔ. 23Maakŋ ro ki se gɔtn kɛn kaam kalaŋ j'aalɗen maak ki ey se, naaɗe se ɓo kɛn k'lee k'j'ɔkɗeki ɔɔn̰ɔ. Ɔɔ kɛngen k'lee k'tɔyɗeki tɔy se ɓo, kɛn k'lee k'j'aakki doɗege tu ɗawal ɗawal, 24gaŋ kɛngen k'j'aakɗenki tal tal se je j'aɗen tɛɗn bin eyo. Anum ro kaam kalaŋ k'tɔyɗe tɔy se ɓo, Raa tɔndɗen se, taa j'aɗenki kɔkŋ ɔɔn̰ɔ. 25Ro jaay Raa tɛɗin̰ bin se, taa 'tɔpm naap eyo, num taa naaɗe 'kaakŋ do naapge tu. 26Kɛn ro kaam kalaŋ jaay ɔŋga dubara se, ro ute magalin̰ paac dabara. Ɔɔ kɛn ro kaam kalaŋ jaay ɓo tɛɗga nakŋ bɛɛ k'tɔɔmin̰ga lɛ, ro ute magalin̰ paac 'tɛɗ maak‑raapo. 27Aan gɔɔ ro debkilimi tɔp kaam dɛn jaay dɔɔk tum tɛɗ ro kalaŋ se, ɗeere, naase kic ɓo 'dɛnki, naɓo 'tum 'tɛɗkiga ro al‑Masi ɔɔ naŋa naŋa kic ɓo utu gɔtin̰ gɔtin̰a. 28Bin ɓo, maakŋ egliz ki se, deet deet se, Raa tɔnd jee kaan̰ naabm Isage. Gɛn k‑dige se, naan̰ bɛɛr tɔɔɗ jee kɛn taaɗ taar teeco taarin̰ ki. Gɛn k‑mɔtɔge tu se, naan̰ tɔnd jee dooy jeege. Ɔɔ mɛtn naaɗe ki se, naan̰ tɔnd jee tɛɗn nakŋ‑kɔɔɓge, tɛr naan̰ tɔnd jeegen ɛɗ lapi jee kɔɔn̰ge tu ɔɔ tɔnd jee mɛtin̰ge gɛn noogŋ jeege. Jee mɛtin̰ge naan̰ tɔndɗe jee kɛn 'tɔɔɗn jeege ute jee kɛn taaɗn taar naaŋgen jeege jeel eyo. 29Aakɗeki tu: naaɗe paac se lɛ jee kaan̰ naabm Isagen mɛtn‑jiki sum la? Paac naaɗe taaɗ taar teeco taar Raa ki sum la? Paac jee dooy jeege sum la? Paac jee tɛɗn nakŋ‑kɔɔɓge sum la? 30Naaɗe paac se jeegen kɛn ɛɗ lapi jee kɔɔn̰ge tu sum la? Paac se, jee kɛn taaɗ taar naaŋgen jeege jeel ey se sum la? Ɔɔ naaɗe paac se jeel taaɗn tɔɔkŋ taar naaŋgen jeege jeel ey se sum la? 31Bin num naabm jigan kɛn Nirl Raa nig jeege tu se, 'dɔŋki kɛn jiga cir paac. Ɓɔrse 'booyki, m'je m'asen taaɗn ɗoobm kɛn jiga cir paac paac kɛn anki lee do ki.

will be added

X\