1 Corinthiens 11

1Aan gɔɔ maam m'uun bɔlɔtn al‑Masi se, naase kic ɓo uunki bɔlɔtuma. 2Maam se m'tɔɔmse, taa naase se tɛɗga tak ɓo, naase 'saapki dom ki ɔɔ naase utu iŋg 'bɔɔbki taar kɛn maam m'dooyseno se. 3Naɓo maam m'je taar se, naase an̰ki jeel kɔkŋ jiga: gaabge paac se, al‑Masi ɓo doɗe ki ɔɔ mɛnda lɛ, gaaba ɓo don̰ ki ɔɔ al‑Masi lɛ, Raa ɓo don̰ ki. 4Kaaɗn keem Raa ki jaay ɓo gaabm kɛn taaɗ taar teeco taar Raa ki ey lɛ eem keem Raa jaay aal kala don̰ ki se, kɛse naan̰ ɔl al‑Masi ɓo maakŋ sɔkɔn̰ ki. 5Num gaŋ kɛn mɛnda jaay kaaɗn keem Raa ki, ɓaa taaɗn taar teeco taar Raa ki ey lɛ ɓaa keem Raa jaay aal te kala don̰ ki ey se, kɛse naan̰ ɔl gaabin̰ ɓo maakŋ sɔkɔn̰ ki ɔɔ mɛnd bin se tec aan gɔɔ mɛnd k'dɔsin̰ga dɔs don̰a kɛn ɔlin̰ sɔkɔn̰ tɔɔlin̰ se. 6Kɛn mɛnda jaay baate kaal kala don̰ ki se, bɛɛkin̰ se k'dɔsin̰sin̰ naatn. 'Jeelki, kɛn mɛnda jaay j'ɔj k'naŋin̰ga bɛɛkin̰ tak tak ey lɛ k'dɔsin̰sin̰ga se, tɛɗin̰ sɔkɔn̰ tɔɔlin̰a. Bin num ɔn̰ mɛnda tak ɓo kaal kala don̰ ki don̰ ki. 7Num kɛn gaaba jaay ɓaa keem Raa num, ɔn̰te kaal kala don̰ ki, taa gaaba se Raa aalin̰ tecin̰ naan̰a taa an̰ nooko. Gaŋ mɛnda lɛ, Raa aalin̰ se gɛn nookŋ gaabin̰a. 8Taa gaaba se teeco ro mɛnd ki eyo, num mɛnda ɓo teeco ro gaab ki. 9Gaaba se Raa aalin̰o taa mɛnd eyo, num mɛnda lɛ nookŋ gaabin̰a. 10Taa kɔɗn Raage se ɓo mɛnda se n̰'aal kala don̰ ki ɔɔ ute kal kɛn naan̰ aal don̰ ki se je taaɗn ɔɔ naan̰ se sook deb kɛn ɔk tɔɔgɔ don̰ ki se. 11Ute naan̰ se kic ɓo, naan Mɛljege tu se, mɛnda kalin̰ ki sum se kɔŋ kaan̰ kaam eyo ɔɔ gaaba kic lɛ kalin̰ ki sum se kɔŋ kaan̰ kaam ey kici. 12Aan gɔɔ mɛnda lɛ teeco ro gaab ki se, gaab kic lɛ mɛnda ɓo oojin̰a; num naaɗe paac se iin̰o gɔtn Raa ki. 13Naase malin̰ge aakin̰ki tu. Kɛn jeege tusga gɛn keem Raa jaay mɛnda aal te kala don̰ ki ey sum ɓo eem Raa se, dɔɔɗn ne? 14Kɛn j'aakin̰ kaak bin kic ɓo, gaaba jaay ul bɛɛkin̰ tɛɗ jɛrl se, sɔkɔn̰ ey ne? 15Gaŋ mɛnda jaay bɛɛkin̰ dɛn se, ɔkin̰a. Bɛɛkin̰ kɛn Raa ɛɗin̰ dɛn se, tɛɗin̰ tec aan gɔɔ mɛnd kɛn aalga kaal kala don̰ ki. 16Ɔɔ debm jaay je tookŋ do taarge tun maam m'taaɗsen ey se, maam ute eglizgen gɛn Raa se lɛ, kɛse ɓo nakŋ kɛn naaje k'lee k'tɛɗa. 17Do taarge tun maam m'je m'asen taaɗse, maam m'asen kɔŋ tɔɔm eyo. Taa kɛn naase jaay 'tuskiga gɛn keem Raa se, naase 'tɛɗki nakgen kusin̰ ɓo cir kɛn bɛɛ. 18Anum nakŋ deet deet se k'taaɗum j'ɔɔ: kɛn naase jaay 'tuskiga gɛn keem Raa num, naase 'lee 'gaaŋki ute naapa. Ɔɔ do taar kɛn se, m'jeelin̰ kɛngen mɛtin̰ge se, mɛt ki. 19Bin num maam m'jeele maakse ki se, jeege utu 'gaaŋ ute naapa, bin jaay ɓo j'kaakŋ jeel jee kɛn ɔk taar Raa ɔɔn̰ se. 20Kɛn naase 'tuskiga gɛn keem Raa jaay ɔski kɔs ute naapa se, kɛn maam m'aakin̰ ara ki num, aan gɔɔ kɔsn gɛn Mɛljege eyo. 21Taa kɛn naase jaay iŋgkiga gɔtn kɔs ki se, naŋa naŋa kic ɓo naar ɔs kɔsin̰ kɔsin̰ kɛn naan̰ ɓaano. Bin ɓo jee mɛtin̰ge lɛ, ɓo tɔɔlɗe tɔɔlɔ ɔɔ jeegen kuuy se lɛ, aay bini oon koono. 22Kɛn bin num, ɔski ɔɔ aayki ɓeesege tu. Lɔ naase ɔkki ɓeege ey ne? Kɛn naase jaay 'tɛɗki bin se, naase uum aalki kaal egliz gɛn Raa se ɓo naaŋ ki ɔɔ gɛnaagen ɔk ɗim ey se lɛ, naase aakɗeki kaakŋ mɛtɗe. Anum do taarge tun ese se, naase 'jeki m'asen taaɗn m'ɔɔ ɗi? M'asenga tɔɔm la? Gɔtɔ. Do nakge tun naase 'tɛɗki se, maam m'asen kɔŋ tɔɔm eyo. 23'Booyki! Kɛse ɓo taar kɛn Mɛljege dooyumo ɔɔ maam kic m'dooyseno m'ɔɔ: maakŋ nɔɔr kɛn j'an kɔkŋ Mɛljege Isa se, naan̰ uun mappa jin̰ ki, 24ɔɔ kɛn naan̰ jaay tɔɔm Raa aas se, naan̰ dupin̰a ɔɔ ɗeek ɔɔ: «Kɛse ɓo roma kɛn m'ɛɗin̰ sɛrkɛ taa naase. Nakŋ se 'lee 'tɛɗin̰ki bini ɔɔ 'saapki dom ki.» 25Kɛn naaɗe jaay ɔs aas se, Mɛljege uun kɔɔpm ɗooc ute tɔtn koojn̰ bin̰ se ɔɔ tɛɗin̰ bin kici, taaɗɗen ɔɔ: «Tɔtn koojn̰ bin̰ kɛn maakŋ kɔɔp kɛn ese se je taaɗn ute moosum 'kɔɔy se, kɛse je taaɗn ɔɔ: Raa dɔɔkga kiji ute naase. Daayum kɛn naase 'ɓaaki ɓaa kaaye se, 'tɛɗin̰ki bini ɔɔ 'saapki dom ki.» 26Daayum kɛn naase jaay 'tuskiga gɛn kɔsn mappan ese se ɔɔ gɛn kaay tɔtn koojn̰ bin̰ kɛn maakŋ kɔɔp kɛn ese se, kɛse naase 'taaɗki mɛtn taar kooy Mɛljege bini, ɓii kɛn naan̰ aɗe tɛrl ro ki. 27Taa naan̰ se ɓo, debm ɔs mappa gɛn Mɛljege ɔɔ aay tɔtn koojn̰ bin̰ kɛn maakŋ kɔɔp Mɛljege tu ute ɗoobin̰ ey se, bɔɔrɔ utu koocn̰ don̰ ki taa daa ro Mɛljege ute moosin̰ se, naan̰ aalɗen te maak ki eyo. 28Taa naan̰ se ɓo naŋa naŋa kic kɛn ɓaa ɓaa kɔsn mappm ese se ɔɔ ɓaa 'kaay tɔtn koojn̰ bin̰ kɛn maakŋ kɔɔp kɛn ese, n̰'saap do ron̰ ki jaay 'kɔsɔ ɔɔ 'kaaye. 29Anum debm jaay ɔs mappan se ɔɔ aay tɔtn koojn̰ bin̰ kɛn maakŋ kɔɔp ki se, saap te do ro Mɛljege tu eyo jaay ɔsɔ ɔɔ aay se, kɛse naan̰ malin̰ ɓo tɛɗ bɔɔrɔ ooc don̰ ki. 30Taa naan̰ se ɓo maakse ki se jeege dɛna tɛɗga kɔɔn̰ɔ, jeege dɛna kɔɔn̰ɔ tujɗenga ɔɔ jee mɛtin̰ge ooyga. 31Kɛn naajege jaay k'jeelki kɔjn̰ bɔɔrɔ do naaje malin̰ge tu se, Raa ajeki kɔjn̰ bɔɔrɔ dojege tu eyo. 32Anum kɛn Mɛljege jaay ɔjjeki bɔɔrɔ dojege tu se, kɛse naan̰ dɛjjeki dɛjje. Taa ɓii kɛn naan̰ 'kɔjn̰ bɔɔrɔ do duni ki se, bɔɔrɔ 'koocn̰ dojege tu ey sum. 33Bin ɓo gɛnaamgen ɗoobm al‑Masi ki, kɛn 'tuskiga gɛn kɔsn, kɔsn Mɛljege se, 'booyki naapa. 34Kɛn debm jaay ɓo tɔɔlin̰ lɛ, n̰'ɔs ɓeen̰ ki. Bin ɓo kɛn naase 'tuskiga se, bɔɔrɔ 'koocn̰ dose ki eyo. Taargen ɔɔp se, kɛn maam m'ɓaaga gɔtse ki jaay ɓo, m'asen ɓaa taaɗn naŋ mɛtin̰a.

will be added

X\