1 Corinthiens 1

1Kɛn ara maam Pɔl ɓo m'raaŋsen maktubm se ute gɛnaajege Sostɛn. Maam se Raa ɓo daŋumo gɛn tɛɗn debm kaan̰ naabm Isa al‑Masi aan gɔɔ kɛn naan̰ maakin̰ jen ro ki. 2Maktubm se, maam m'raaŋsesin̰ naase jee egliz kɛn gɛn Raa kɛn maakŋ gɛgɛr kɛn Kɔrint ki. Ute ɗoobm Isa al‑Masi se, Raa tɛɗsenga tɛɗkiga jee salal. Ɔɔ Raa daŋseno se, taa aki tɛɗn jee naan̰ge ute jee gɔtn ɓaa se paacn̰ kɛn lee eem ro Mɛljege Isa al‑Masi. Isa se naan̰ ɓo Mɛlɗe ɔɔ Mɛl naajege kici. 3Ɔn̰ Bubjege Raa ute Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 4Daayum maam m'tɔɔm Raa taa naase, taa bɛɛ kɛn naan̰ tɛɗseni ute ɗoobm Isa al‑Masi se. 5Ɗeere, dɔɔkŋ kɛn naase 'dɔɔkkiga tɛɗkiga kalaŋ ute al‑Masi se, Raa ɛɗsenga nakgen bɛɛ dɛn aak eyo, kɛn tap ki se tɛɗsenga 'jeelkiga taaɗn Taar Raa ɔɔ ɛɗsenga jeel nakge paac. 6Taar kɛn naaje k'taaɗsen gɛn al‑Masi jaay naase 'booyki sum se, naase ɔkin̰kiga maakse ki tɔɔgɔ. 7Bin ɓo, nakgen paacn̰ kɛn Raa ɛɗ jeen̰ge tu se, naase kic ɔŋkiga naasen kɛn iŋg aakki kaak kaam Mɛljege Isa al‑Masi kɛn utu aɗe teecn̰ naanse ki pirsil se. 8Raa se naan̰ ɓo debm kɛn asen kɛɗn tɔɔgɔ bini aki kaan do taar tɔɔlin̰ ki. Bin ɓo ɓii kɛn Mɛljege Isa al‑Masi aɗe ɓaa se, j'kɔŋ ne ɗim aak kus rose ki eyo. 9Ɗeere, Raa se naan̰ tuj ɔrmin̰ eyo, naan̰ ɓo debm kɛn daŋseno, taa aki tum tɛɗn kalaŋ ute Goonin̰ Isa al‑Masi kɛn Mɛljege se. 10Ɓɔrse gɛnaamge, ute ro Mɛljege Isa al‑Masi se, m'eemsen nɔɔ mɛtse ki m'ɔɔ: ɔn̰te 'tɔpki naapa, naɓo naase 'paacki ɔkki taarse kalaŋ. 'Tumki ute naapa, ɔn̰ki maakse 'tɛɗn kalaŋ ɔɔ saapse kic ɓo ɔn̰in̰ki 'tɛɗn kalaŋ. 11Ɗeere gɛnaamgen ɗoobm al‑Masi ki, jee maakŋ ɓee Klɔɛ ki ɓaaɗo taaɗum ɔɔ maakŋ kiŋgse ki se, naase se taarse ɔk mɛtn naap eyo. 12Num do taar kɛn se ɓo, maam m'je m'asen taaɗn mɛtin̰a: maakse ki se, deb kalaŋ taaɗ ɔɔ: maam se m'debm Pɔl, debm kuuy ɗeek ɔɔ: maam se m'debm Apɔlɔs, ɔɔ debm kuuy taaɗ ɔɔ: maam se m'debm Piɛr, ɔɔ debm kuuy kic ɗeek ɔɔ: maam se lɛ m'debm al‑Masi. 13'Saapki tu al‑Masi se, j'an̰ kɔŋ nigŋ ne? Maam Pɔl ɓo kɛn k'tup k'tɔɔlum ro kaag ki taa naase se la? Lɔ k'batizseno se ute ro maam m'Pɔl la? 14Maam m'tɔɔm Raa, taa maakse ki se, jeegen maam m'batizɗeno se, Krispus ute Gayus sum. 15Taa naan̰ se ɓo, nam maakse ki se 'kɔŋ ɗeekŋ ɔɔ naase se k'batizseno ute ro maam Pɔl. 16Waay, tɛɗumga dirigi. Ɗeere, maam m'batizoga jee maakŋ ɓee Stepanas ki kici. M'jeel ey jaay ey num m'batizo te nam kuuy ey sum. 17Taa al‑Masi se, ɔlumo gɛn batizn jeege eyo, num gɛn taaɗn Labarin̰ Jiga se ɓo jeege tu. Ɔɔ taarin̰ se, maam m'an̰ taaɗn ute taar nijim kɛn jeege booyin̰ aan gɔɔ gɛn debm jeel‑taar lee taaɗ se eyo, taa kɛn maam jaay taaɗ ute jeel‑taar gɛn jikilimge sum num kooy al‑Masi ro kaag ki se, 'tɛɗn nakŋ cɛrɛ. 18Ɗeere, jee iig kiig se, taar kɛn k'taaɗn gɛn Isan ooy do kaag ki se, kɛse naaɗe aakin̰ aan gɔɔ taar jee dɛrlge. Num gaŋ naajegen j'aajki kaaj se lɛ, taar se ɓo kɛn taaɗjeki tɔɔgŋ Raa. 19Taa maakŋ Kitap ki se Raa taaɗ ɔɔ: Jee jeel‑taarge se, jeel‑taarɗe se maam m'utu m'an̰ ɗaara; ɔɔ mɛtɛkɗege se lɛ, maam m'utu m'an̰ tɛɗin̰ 'tɛɗn gɔtɔ. 20Bin num gɔtn se jee jeel‑taarge se, tap ɓo taaɗn ɔɔ ɗi? Ɔɔ jee jeel taaɗ tɔɔkŋ mɛtn Ko Taar Raage se kic ɓo taaɗn ɔɔ ɗi? Ɔɔ jee jeel ɗoobm taaɗn taargen maakŋ duni kɛn ɓɔrse se taaɗn ɔɔ ɗi daala? Taa Raa se, jeel‑taar gɛn jikilimgen ɔk se, naan̰ tɛɗin̰ tɛɗga nakŋ jee dɛrlge. 21Ɗeere, jikilimge, ute jeel‑taar kɛn naaɗe ɔk paac se kic ɓo, jeel‑taar Raa se naaɗe ɔŋ jeel ɔk te mɛtin̰ eyo. Taa naan̰ se ɓo, Raa uunoga doa gɛn kaajn̰ jee kɛn aal maakɗe do Labar Jigan kɛn k'lee k'taaɗɗen se ɔɔ taar se jee kuuy aakin̰ aan gɔɔ taar jee dɛrlge. 22Jeegen Yaudge se je kaakŋ nakŋ‑kɔɔɓgen iin̰o gɔtn Raa ki ɔɔ jee Grɛkge se lɛ, naaɗe je ɗoobm kɛn an jeel‑taara. 23Gaŋ naaje se, k'taaɗ jeege tu j'ɔɔ al‑Masi kɛn Raa taaɗn se ɓo k'tup k'tɔɔlin̰ ro kaag ki: kɛse ɓo taar kɛn tuj maakŋ Yaudge ɔɔ jeegen Yaudge ey se lɛ aakin̰ taar ese se, taar jee dɛrlge. 24Num gaŋ jee kɛn Raa daŋɗeno maakŋ Yaudge tu ey lɛ maakŋ Grɛkge tu se, gɛn naaɗe ki se, al‑Masi se naan̰ ɓo tɔɔgŋ Raa ɔɔ jeel‑taar gɛn Raa ki kici. 25Taa nakŋ kɛn Raa tɛɗ jaay jeege aakin̰ aan gɔɔ nakŋ jee dɛrlge se, ute naan̰ se kic ɓo, naan̰ jeel‑taara cir jeel‑taar jikilimge ɔɔ nakŋ Raa tɛɗ jaay jeege aakin̰ aan gɔɔ naan̰ ɔk tɔɔg ey se lɛ, naan̰ tɔɔg cir tɔɔgŋ jikilimge. 26Gɛnaamgen ɗoobm al‑Masi ki, 'saapki tu kaaɗ kɛn Raa daŋseno se kɛn gɛn jikilimge tu sum num, maakse ki se naase ɔkki jee jeel‑taarge se, dɛn eyo. Ɔɔ jee tɔɔg kic ɓo, naase ɔkki dɛn eyo. Ɔɔ jeegen k'jeel jeel gɔtɗe maakŋ ɓeeɗege tu kic ɓo naase ɔkki dɛn eyo. 27Anum Raa se bɛɛr tɔɔɗo jeegen kɛn jikilimge aakɗen aan gɔɔ jee dɛrlge se ɓo taa 'kɔl jee jeel‑taarge se, sɔkɔn̰ɔ aɗen tɔɔlɔ; ɔɔ jeegen kɛn jikilimge aakɗen aan gɔɔ jeegen ɔk tɔɔg ey se, Raa bɛɛr tɔɔɗɗeno se taa 'kɔl jeegen ɔk tɔɔgɔ se, sɔkɔn̰ɔ aɗen tɔɔlɔ. 28Raa bɛɛr tɔɔɗo jeegen kɛn jikilimge aakɗen jeegen tɔɔl sɛr eyo, j'aalɗen maak ki eyo ɔɔ j'aakɗen aan gɔɔ nakŋ gɔtɔ se, bin ɓo ute ɗoobm naaɗe se, jee kɛn tɛɗ roɗe magal magal se, Raa aɗen tɛɗn naaɗe se 'tɛɗn jee rɛn̰ rɛn̰. 29Raa tɛɗn naan̰ se taa nam nam 'kɔŋ tɔɔm ron̰ naanin̰ ki eyo. 30Ɗeere, naase se Raa dɔɔksenga ute Isa al‑Masi ɔɔ jeel‑taar naajegen kɛn iin̰o gɔtn Raa ki se, naan̰ ɓo al‑Masi se. Ɔɔ al‑Masi se naan̰ ɓo tɛɗjekiga k'tɛɗkiga jeegen aak bɛɛ naan Raa ki ɔɔ bɛɛr tɔɔɗjekiga k'tɛɗkiga jee naan̰ge ɔɔ naan̰ ɔɔɗjekiga dojege maakŋ kusin̰ ki. 31Taa naan̰ se ɓo Kitap taaɗ ɔɔ: Debm jaay je tɔɔm ron̰ num, n̰'tɔɔm ron̰ do nakge tun Mɛljege tɛɗa.

will be added

X\