TAITESA 2

1Pii lare dupwa Anatunya mana pii palamo dupwana iki moko minyuo lapengele. 2Alemo dupwa biya malu nao enokwanyi nemba nao mona palenge ingyuo rangena suu pingi kame pyuo minyuo karena lamairi. Dokona ingyuo nakama Anatu kapa ingingi lao suu pingipi mona retenge yulupi dolapo pyuo karo randa eparamo dokopa porayapala karena lao mana lamaipi. 3Endemo nakama Imambu Poo Pyasinya yulu pingi endana yulu dopale pyuo petena lamairi. Mendali koo keta palyuo kingi isa nembalana suu pyao kyambo laa nao biya malu nao pisarami ingya nana lamairi. Yulu keyange dupwa mana lamaiyuo petena. 4Doko enda angi dupwame nakamana akalingi ikinyingipi rapu pyuo mona retarami dokona mana lamainya lamairi. 5Nakama suu pingi rangeme kame pyuo minyuo mondo lao piso anda dokona yulu au pyuo pyuo nakamana akalinginya pii soo petena. Dopa pirami ramo dokopa lapome Kurisene yulu kooŋo lao laa narami. 6Pii dokonako ingyuo akali parange dupwa suu pingi rangeme kame pyuo minyinya lao poralyuo mana lamairi. 7Embame range yulu keyange dokona nyiso pyuo wambu yango dupwa lasaka pingi ingyuo karare. Pii angi dupwa suu pyao mana lamaipala mee langa male lalya lana pyuo laa napipi. 8Pii angi dokonako larenepa akali dupwame pii dokona koo mende koto nyii nana lao karape. Dopa pirinyipa embena nyisu petenge dupwame namwa keta koo lao lalana saka napala elyuo karenale. 9Yulu pingi akali dupwame nakamana yulu pyakamingi akali dupwana pii minyuo nakama rae mainyi pyambuo karena. Nakamame kamba pii laope waa mende nyakamiwape pii nana. Dopa pilyamano lao dokopa nakama mondo lao keyange pyuo karalu karena. Dopa pyuo pirami ramo dokopa nakamana yulu peparaeme namwana Lete Wal Pyao Nyingi Anatunya mana pii dokona ketae pyambuo piramisa pira. 11Anatu banya mona keyange palyuo ipingi wakasa dokome akali peparae lete wal pyao nyelana piya doko nyuo paneya. 12Banya mona keyange palyuo ipingi dokome dopa lao mana langingi. Nakama dae karo Satanena kata yaki nyepala yulu koo dupwana mona andanyi nemba nao suu pingi rangeme kame pyuo minyuo rolae pyuo Imambunya kata dupwana karalapape lao langingi. 13Namwa yuu gii elyape keta pisarami lao namwana Anatu kamame wakasa dee Lete Wal Pyao Nyingi Yesu Koraisapa neta renge ingyuo panarambi doko iso karamano. 14Koraisame baa namwana koo dupwana kumuo jepala namwa baa rangena wambu kipungi poo pyasi inginyi pyambuo kiiramo nyiya dokome yulu keyange dupwa angingyuo pinya suu pyao pimana. 15Pii lasi dusipa nyuo mana lamaipi. Wambu embena pii serami dupwa poralnya renge dokome paleta mona poralnyi pyambuo pyalana pyuo lare. Mendeme emba kando ketae nemba nana.

will be added

X\