IPURU 8

1Pii angi leto dupwana renge simuisa doko dakeŋe. Namwana purisi mupwa doko Anatu wakasa dokona kingi rolaerename yake panda dorena petamo. 2Baa panda poo pyasi dokona purisinya yulu pyuo karamo. Tembole anda doko isa wambumi pii nayaminyipa Kamongome anda angi doko rangeme pyuo wasiya. 3Purisi mupwa peparaeme Anatu bange maingi dupwa minyuo epo mena pyao kiso maiyuo pyuo karenge. Dopa pilyamo dokona lao namwana purisi mupwa opetaeko mende kiso mairamo doko kapa ingyuo para. 4Baa isa panda pyuo karapyali doko purisi angingyuo rombo palya nayamiii. Mee purisi dupwame Juu wambunya Lowa minyuo mena kiso Anatu maingi kandale. 5Doko nakama kulisa palyuo pii nao yake pandana yulu angi dupwa mee makande pyuo pyuo karenge. Mosesena yulu mendaki dopale ingyuo peya kande. Doko baame Anatunya tembole anda komaume wasisi pinya pyuo kareyamo dokopa Anatumi lao, Yuu kyaunya kareenepa lasaka piyu kande doko suu pyao kopetame pisarono kando lao angi rolae makande pyuo piri lao laokondali pyuo leto lamaiya. 6Doko Koraisana purisi yulu dokome purisi dolomana yulu isa palyiya. Doko suu pyao Yesu kanya akali ingyuo kareyamo dokome Anatupa namwa pipa enakana lalu lao leyamo doko renge kamame keyange nyerami dupwa suusa isa ingiyamosa wambo lalu lao leyamo doko pyalya pyalya paleya 7Wambo doko kapa paleyali doko kana minyuo lenge pii enenge doko epa nayali. 8Anatumi banya wambu dupwa rae mai napala dopa leya. Yuu mendepa nambana kana minyuo lala lao lenge pii doko Isaraele dee Juta rara pipape laronyaŋa leya. 9Kana minyingi pii dake nambame nakamana kauwanemoo pipa Isipi dokona neta nyiyu dokopa kii minyuo papala lao reteyo dopale daa. Lalu lao leyo pii doko yalo kareyamisa nakamba mata maiyuo kaeyo letamo Kamongome. 10Dokona lao lalu lao lenge pii enenge mende Isaraele wambu pipa laro letamo. Doko nambana lowa dupwa nakamana suu pingi dorena retaro. Nakamana mona anda dokona nambana lowa dupwa pepana ingyuo pyao retaro. Nambame nakamana Anatu angingyuo kararonopa nakama nambana wambu angingyuo parami. 11Nakamana andare dokona yango sukusa dopa pinya dopa pinya lao kara naramioko. Yangonge dupwa kandowape emba Kamongo doko soo nyinya lao laa naramioko. Yuu gii dokopa wambu kuki andakepe peparae namba soo nyerami. 12Nakama koo pirami dokopa nambame sakame kumuo karapala nakamana koo dupwa nyuo kame silya sana pyuo kaeyaro leya. 13Anatumi lalu lao lenge pii enenge retelyo leya doko wambarae doko isa pelyamo lao leyasa piya. Bange wambarae momo nelyamo dokopa mee isa penge kandale.

will be added

X\