EPASASA 3

1Dokona lao namba Pole nakama Juu daa rara wakale dupwana lao Koraisa Yesunya anjisi akali ingyuo karo. 2Anatu mona keyange palyuo ipyapala nambame nakama nyisareŋe lao yulu andake namba keta jiyamo doko siyami lao suu pilyu. 3Yalu pyuo palenge renge andake doko namba keta paneyamo siyu doko, (wambo pepana muu pyuo piyu kande. 4Pii pyasi doko yaka laparaminyi dokopa namba Koraisana yalu pingi renge doko kokorename kandeelyamo lao separami.) 5Doko wambu kyawa ingyuo kareyami dupwame soo kara nayami doko epapuli aposele yapasi dupwape poropeta akali dupwape banya Imambumi lamaiyuo panapyamo simi. 6Yalu pisi renge epapu panelyamo doko, Juu daa rara wakale dupwa waili pii keyange sepala Anatunya keyange dupwa Juu wambu pipya kapa kapa pyuo nyerami. Nakama namwapa yongo mendaki ingyapala Anatumi Koraisa Yesu keta keyange jeroŋo leyamo dupwa mokwa soo nyerami. 7Anatu mona keyange palyuo ipyapala banya poral renge namba mee jiyamo dokopa namba waili pii minyingi akali ingiya. 8Anatunya wambu yapasi menge dupwa peparaena namba kamame isale ingyuo karapunupape Koraisana kamongonge bange kapa pyuo soo nyii naramili dupwa namba keta epeya. Doko Juu daa rara wakale dupwa mana lamaiyuo karapenge dokona lao jiya. 9Anatu baa bange peparae wasiya dokome ama kal wamba mende piru lao suu pyapala yambe piya doko namba lao panaronopa wambu peparae serami. 10Dokona ingyuo Anatunya soo gisinginya renge peparae Elyambu Pingi keta lasaka piramopa yake dorena poralpi mupwa dupwapeme soo nyerami. 11Anatumi wambo mende pironya lao suu pyao karengenyili pyuo namwana Kamongo Koraisa Yesu keta pipiya. 12Yesu kapa ingingi lao suu pyao baa keta pyamaiyisi karo dokopa Anatu karamo dokona eŋa nembo mee kapa parama doko silyamano. 13Dokona ingyo nambame nakamana lao randa nao karo dokona mona nemba nalapape. Nakama kapa palirami dokona lao randa koo nao karo. 14Dokona ingyuo Rakange lao mona kando kingi lao karo. 15Baa keta piso yake panda isa pandape ree palu peparaena kingi lasi dupwa epeya. 16Kamongo Anatunya yanga paupau lenge renge jingi ingyuo lyuo karamo doko Imambu keta epo nakama maralyapala mona andarena poralnyi pyambunya lao ateŋa lakalyo. 17Anatu kapa ingingi lao suu piyami dokona Koraisa nakamana monarena palyuo yuuli andale lena. Nakamame mona retenge renge dokona pingi pyapala poral ingyaramo kararami. 18Koraisana mona rentengena makande doko kamame andake dokome, Yuu nanesa pao oto ruŋu paŋu lamo laope yuu ulu pao lepo pyuo lamo laope yuu ono komba ayanda pao lamo laope nakama Anatunya wambu peparae dupwamoo pipya, kando simili yaka lao ateŋa lakalyo. 19Kinyi Yesunya mona retenge renge wakasa isa wambumi soo ota paa nange doko soo nyeraminyi dokopa Anatu dokona mona retenge renge palyuo simbuo pelyamo doko makande minyuo nakama keta palyuo simbwara. 20Anatumi banya poral renge namwa keta silyamo dokome suu pyarama dupwape jinya larama dupwape kama konda pyuo yamarangunyi nembo jingi. 21Wambu wambowanape enakana dupwamepe Elyambu Pingi ketape Koraisa Yesu ketape Anatunya kingi doko ketae pyambuo puu parami.

will be added

X\