ቲቶ 3

1ኦረ ፕሰ አከ ኡኩመምፐየ እሾ ሳረ ፒተት ፕደሞ ከ አፈ ደከዮ ከ፥ አኮደ ፐኻረ ፕሰ ኮዴተ ሀርምሰዴ ኮዶኤ መቴ እሾተ ኦርሸ፤ 2ከ አከ ነመን ሃሰውንን፥ ከ ፖረ ፔቀን ፔቅንን ከ፥ ናሉመ ከ ኦረ ፕሰ ሾሮኮተ ኮደኔኤ እሾተ ዴሃሜ። 3ማነ መለ፥ እኖ ኔፎ ኸተ አሴዌን አንኤፐ ኦረ ከ፥ አኦረ ደከይንንክንን ከ፥ አሳንተ ከላተ ከመ ደፔ ከ፥ አኸጬልተ እሾ ኸሰ ኔኔቀ ሌከይተ ኬለ ከርፕሹሜ ከ፥ አኔቁምተ እሾ ዮተን ከላነ፥ ከ አኔደተሜ ከ እኖ ኔፎ ኦል ኔድንነኤይ። 4መ ኾር፥ ሾሮኩመ አድንሸምፐይተሴ ኸኖ አዋቀ እሾ ነመ ጫለታድ ኤቴ እኖ አካዴዬ፥ 5አከ ሱረይሰታድ ምነኤ፥ ዴሎተሴ ሃረየ አንእሽን ጨቀሜ ከ ሀፑረ ቁልቁሎተትን ሃረየ እኖ ኮዴተኔ እኖ ድንሼ ዲሼይ፥ ቆተን እኖ ኮደ ፐኻረ ኮኔ መለ እኖን ድንኔ። 6ዋቀ፥ ድንሸምፐይተሴ ኸኖ ዬሱስ ክርስቶስ ቁደኔ፥ ሀፑራድ ኩትሼ ከ እኖ ቀረ ቱቄ። 7ሴዴ ኔፎ ወ መለ አሴ ኮዴ፥ አከ ዳሰተሴ ኻድን ሀንቄለየ እኖ ኮዴ ከ ቻተሴ አፐረፐረ፥ አንኸሰን አሰንኖ፥ ሌሃኖ መለ። 8ቃሌሴ፥ ቃሌተ አመነምቴ። ኦረ ዋቀ አመኔ አከ ኮደ ፐኻረ ኮደ ጨፓዶኤ፥ ዌሴን አንኬ ሌሌ ፕሰ አከ ኦረ ዴሀምቶ ከ ኮኮናሶን ኬ ቀረ ፋን። ሴዴ ወ ፐኻረ ከ ኦረ ኬለኤይ። 9መ ኾር ሺሸ ኤፑመ እሾ መኸደ አኣከደ ኸተ ድኬተ ከ ፔቀ እሾ ቶረ ሴረ ሙሴ ቀረ ኻነ ከፐ ሴካዶ፤ ሴኔ ወ ቶክተን ቀፕንን ከ አፓተ ፐተኤይ። 10ነመ ኦልኬለን ኦረ ደፕኖ፥ ኦ ተከ እሾ ለክን ዴሀምቶ ከመዬ፥ ከፐ ሴካዶ። 11ነመ አሴ ፐሆ አክመ ምሄ ከ ጩፖተ ኮዴተን እስ ቀረ ደፐ ሙሬ ኡፕናዶ። 12ኦን አንት አርቴማስ ታክ ትክቆስ ኬ ከፖፐ ኤርኮዬ፥ አት ከተመ ንቆፖልዮን ኦፐ አነ ከፖፐ ዴነ ጨፓዶ። አንት ኤዬ ሶሮረ ተርፕሰኤን ፒሰዴይ። 13ታኘሴኔ ሴናስ ኪናኔ እሾ አፕሎስ አከ ዴመ ኸአኔኤ እሾተ ኮዴ ከ፥ አከ ዌ ተከ ኔፎ እሾተኤን ቀጭንንእ፥ ዌ ፕሰ እሾተ እመኬ ከ እሾተ ቃርቃሬ። 14ኦርኖው አከ ከላተ ፓተ ፐተኤን ከላንን፥ ከ ወ እሾተ ፐርፓችስነ አከደኔኤ፥ አኮደ ፐኻረ ኮደ ኮለዴን። 15ኦረ አነ ኦል ቾ ፕሰ ነከይተ ኬ ዴሀን። ኦረ አመንቴተ ምነን እኖ ጫለኖኤ ነከይትኖ ሌለ። ዳሰተ ዋቀ አእሽን ፕሰ ኦል ቻቶ።

will be added

X\