ሮም 4

1ሴመለ ኣፐሴ ኸኖ አፕረሃም ቆቶሴት ዴሰ ማነ አከዴን ኪነ? 2አፕረሃም ከትን ኮዳድን ሀንቄለዌ ኪቴዬ፥ ወ እሽን እስ ፔፐ ቀፕናን ሄኔ። መ ኾር ዋቀ ቱረ ፔፐተን ኤተንሾ። 3ማነ መለ፥ እታፈምቴ ከ ኪን፥ «አፕረሃም ዋቀ አመኔ፥ እከ ሀንቄሉመ እሽ ድከምቴ።» 4ነመ ኮደ ኮኖ ካጨ አአከነ፥ ያላድ ቱፐ አከን ዲሼይ፥ ዳሰተን። 5መ ኾር፥ ነመ ከድ ፑኑ ኮደ ፐኻረን ቀፕንንይ፥ ኦ ዋቀሴ ጩፖለየ ሀንቄለኖ አመኔዬ፥ አመንቴታድ ሀንቄሉመኤ እሽ ድከም። 6አክሞሴ ምነኤው ታውት፥ ነመ ኮደ ፐኻረን ቀፕንን፥ ዋቀከ ፐተ እሸ ሀንቄለይሼ፥ አክመን ነመ ኦሎዴ፥ እሃሰወን ከ ኪን፥ 7«ኦረ ደፐይሾ እሾተ ሀሴ፥ ጩፖተይሾከ እሾተ ቀረ ዴከምቴ፥ ኦሮሴ ኦረ ኦሎዴ። 8ነመ አዋቀ ፐከነ ጩፖታድ እሸ ቀረ ድክንንክንን አኦሎዴ።» 9ሄለ ኩል ኦሎቶሴ አታውት ሌሎ፥ አኦረ ደውረ ቀረ ሙረዴ ፐታ? ሞን አኦረ አንሙረንን ኩል? አኦረ አንሙረንን ኩል። ማነ መለ፥ እንኪንነ፥ «መታፈ ቁልቁሎተ እኪን፥ አፕረሃም ዋቀ አመኔ፥ እከ ሀንቄሉመ እሽ ድከምቴ።» 10ሄለ ኩል አአተ ክቶዬ እሽ ድከምቴ? ሄለ አደውረ ቀረ ሙረዴ ከመዬ እሽ ድከምቴም፥ ሞን አንሙረንን ቱረኔ እሽ ድከምቴ? አንሙረንን ቱረኔ እሽ ድከምቴ ዲሼይ፥ አሙረዴ ከመዬ እሽእን ድከሜ። 11እከ፥ አክመ አደውረ ቀረን ሙረንን ቱረን አመንቴታድ ሀንቄሉመኤ እሽ ድከምቴ፥ ምልክተኤ ደውረ ቀረ ሙረዴ። ሴመለ አፕረሃም፥ ኦረ ደውረ ቀረን ሙረንን፥ አአመንቴተይሾ ሀንቄሉመ እሾተ ድከምቶ ፕሰ ቀረዬ፥ ኣፐ። 12ኦረ ደውራሶ ቀረ ሙረዴ ኔፎ ቀረዬ ኣፐው፤ ማነ መለ፥ እሾተ፥ አደውረ ቀረ ሙረዴን መልይ፥ ቆተ አመንቴተሴ አእሸ ደውረ ቀረን ሙረንን ቱረን ቴየናን መለ። 13አፕረሃም እሾ ሰኜታድ አከ ፒተ ሌሃደኔኤ፥ ወ መለ ዋቀ ኸሰ እሾተ ዳሼ፥ ቆተ አፕረሃም ሴረ ቶይቴ መለን መ፥ ቆተ ዋቀ አመኔ፥ አመንቴታድከ ሀንቄሉመ እሽ ድከምቴ መለ። 14ከትን ኦረ ሴረ ቶይትኖ ኸሰ አዋቀ ከሌ ሌሀን ኪቴዬ፥ ሄለን አመንቴተ ፓተ ፐተ፥ ኸሰሴ ኔፎ እሀሰ ክዴተ። 15ማነ መለ፥ ሴረ ሚረ ዋቀኤ ኦረ ቀሮፐ ቄን። መ ኾር፥ ፖረ ኦፐ ሴረን ክንንፐዬ፥ እሽን ደፐይተ እንቾ። 16ኸሶሴ አዋቀ ኔፎ አመንቴተ ምነኔ ኮድን። ማነ መለ፥ አክመ ሰኜተ አፕረሃም ፕሰ ኸሶሴ ዳሰተ ዋቀትን አከቶ ኮኮናቶ መለ። ኡመ አሴረ ቶይትነ ፐተን መ፥ አአፕረሃም ምነ አመንቴተን ሀንቄለዌ ኩል። ማነ መለ፥ አፕረሃም፥ አመንቴተን ኣፖፐ እኖ ፕሰኤይ። 17ሴዴ ኔፎ አክመሴ አታፈምቴ ከ ኪንቶ፥ «ኣፖፐ ሌክነ ሌከይተትእን ኬ ኮደ።» ሴ ምነኔ አሴ ኮድቴ። ሴመለ ዋቀሴ አአፕረሃም አመኔ፥ እሰሴ ኦረ ሌ ቶቶፐ ኽእኖ፥ ከ ዋን ክንን አከ ቻደኔ ኮኖ፥ ፉላድ ቱረዬ ኸሶሴ እኮኮክ። 18አፕረሃም፥ ኤቴ ዋቀ እሽ ክዴ፥ «ሰኜተይት አሴ ሌካተዬ፥» ክሴተ አኦፐ ኸሰን ቀፕንንፐዬ፥ ኸሰ ቀፕናዴ፥ ከ አክመ ክደምቴ ምነ፥ አክመ ኣፖፐ ሌክነ ሌከይተ ኮዶ ዱከይሰዴ። 19ስትይ ፐራድ ድፐ ምነኤ ቸ ከ፥ ከድ ፑኑ አክመ ደክንታድ ኑኩላቴ ከ ኻየን ኤተንንን ኡፐዬ፥ ከ አክመ ሳረ ኔፎ ኬርቴ ከ አሬን ቱረን ኸይንንክንን ኡፐዬ፥ አመንቴታድንን ኑኩላኔ። 20ከ አመንቴታድን ጨፓዴ፥ ከ ዋቀ ኡልፌነ ዳሼ ዲሼይ፥ ኸሰሴ አዋቀ እሽ ዳሼ ዱከይሰተን መላሌ ከ ኦፐን ድከኔ። 21ማነ መለ፥ ቆተ ኸሶሴ አዋቀ ዳሼ አክመ ፉለን ከዮ ከ ድክሾ ቆተ ኡፕናዴ መለ። 22አፕረሃም፥ አመንቴታድ ሴመለ ሀንቄሉመ እሽ ድከምቴ። 23መ ኾር ሴዴ ኪንቶ «ሀንቄሉመኤ እሽ ድከምቴ፥» እሸ ፐተ መለን ታፈሜ መ፥ 24እኖ ኩል መለ ታፈምቴ። እኖ አዋቀሴ ፖቀላኖ ዬሱስ ክርስቶስ ቶቶፐ ኻሼ አመነ፥ አመንቴትኖ እኖ ኩልእ ሀንቄሉመ ድከምተ። 25ፖቀሎሴን ኸኖ ዬሱስ፥ እሸ ጩፖትኖ መለ ቶተ ዳሰሜ ከ እኖ ሀንቄለሰ መለ ቶቶፐ ኼ።

will be added

X\