አኬተ 8

1ኤቴ ለሀሴ መሀይተመሴ አተፐተ ፉሬዬ፥ ሀከ አሳቴተ ቁደ አፐከ ምነ ክቶኤ፥ ሞንተ ከ ኦልን ጨው ኪቴ። 2ከመ ዴሰው አንከ ኤርከምፐቶወሴኔ ተፐ አፉለ ዋቀ ቱረ ቀአነ አኬ። ካሰ ደወመ ተፐከ እሾተ ዳሰሜ። 3ኤርከምፐቶተ አፕለከ ዴቴው ከ፥ ወ ኦፐ ተንከሬተ ኸይናኔ፥ አወርቄቶፐ ኮደሜ ቀፐቴ፥ ከ ፖረ ከልሶተ ቱረ እሽን ቀአቴ። ከ አከ ቅንሴተ ቁልቁሎወ ፕሰ ኦልን ከልሶተ ከልሶኤ፥ ተንከሬተ ኩተይቴተከ እሽ ዳሰምቴ። ፖረሴ አከልሶተ ወርቄተፐ ኮደሜ ኔፎ፥ አልከሴኔ ቱረ ቸ። 4ሀርከ ኤርከምፐቶተስት ኦፐዬ፥ ቀየ ተንከሬተስትከ፥ ቅንሴተሴ አቁልቁሎወ ኦልን፥ ፉለ ዋቀ ቱረ ሞንቶፐ ኼ። 5ሴከመ ኤርከምፐቶተሴ ወሴኔ አቀረ ተንከሬተ ኸይናኔኤ ቄቴ ከ፥ ፖረሴ አከልሶተ ቀረዬ ኦፐ አፕተ እመክቴ፥ ከ ፒተ ቀሮፐ ኸፕትቴ። ኽረረ እሾ ኔሰደ ከ ሀንካደ ከ ሌሌሀይተ ፒተከ ኮዴ። 6አመ ኦር፥ ኤርከምፐቶወሴኔ ተፐ ካሰ ተፐ ቀፐ፥ ካሰሴኔ ደወኤ ሀርምሰዴን። 7ኤርከምፐቶተ ፐዮተከ ካሳድ ደውቴ ከመ ዴሰ፥ አፕቴንተ እሾ አፕተ ዲከ ኦሎፐ ለሄከ ፒተ ቀረ ፕኤ። ፒተ ቁደዬ፥ ሀርከ ሴሰፐ ሀርከ ተከከ ኩፐዴ። ቆረ ቁደዬው፥ ሀርከ ሴሰፐ ተከከ ኩፐዴ። ጨጰ እላወ ፕሰከ ኩፐዴ። 8ኤርከምፐቶተ ለመተከ ካሳድ ደውቴው። ወ እሮተ ኩተ ፐሀ ከ አፕተን ኩፐነከ ፐከቴተ ከሮፐ ፕኤን። 9ፐከቴተ ቁደዬ፥ ሀርከ ሴሰፐ ሀርከ ተከከ ዲከ ኮዴ። ፕናነ ፐከቴተ ከረ ከለ ኦፐዬ ሀርከ ሴሰፐ ሀርከ ተከከ ፕረሜ። መርከፐደ ቁደዬ ሀርከ ሴሰፐ ሀርከ ተከከ ፕረሜ። 10ኤርከምፐቶተ ሴሰተከ ካሳድ ደውቴው። ህክቴተ ኩተይቴተ አእለ ምነ ኩፐንቶከ ሞንቴ ፒቴ፥ ከ ክረደ ቁደዬ ሀርከ ሴሰፐ ሀርከ ተከ እሾ ኤለ ፕሸ ቀረ ፒቴ። 11ህክቴቶሴ ኔፎ፥ መኻድ አርከይቶ። ፕሸ ቁደዬ ሀርከ ሴሰፐ ሀርከ ተከከ ሀደዌን። ቆተ ሀደውናን መለ ኦረ ሌከይተከ ሌኤ። 12ኤርከምፐቶተ አረፈተከ ካሳድ ደውቴው። ፒርቶተ እሾ ሌየ ከ ህከ ቁደዬው፥ ሀርከ ሴሰፐ ሀርከ ተከከ ደይሰሜ። ለአይተይሾ ቁደዬ፥ ሀርከ ሴሰፐ ሀርከ ተከከ ሴ ምነን ቱከኔ። ኩያተ ቁደዬ ሀርከ ሴሰፐ ሀርከ ተከ እሾ ሀልኬተ ቁደዬ ሀርከ ሴሰፐ ሀርከ ተከከ ለአይተ ደፔ። 13ከመ ዴሰ እንቶየዴ ከ፥ ሴየ ሞንተ ቁደ ኬሮ ከ ኔሰ ኩተን ኡሉፕኖን ደከዬ። እከ ኪን፥ «ካሰሴኔ አተ ሀሴ፥ አኤርከምፐቶወሴኔ አታከኔ ደወኔ መለ፥ ኦረ ፒተ ቀረ ከሎ፥ ኦ እሾተ ክዶ! ኦ እሾተ ክዶ! ኦ እሾተ ክዶ!»

will be added

X\