አኬተ 6

1ሴከመዬ፥ አለሀሴ መሀይተመደሴኔ ተፐፐዬ ተከ ፉሮን አኬ። ኡመተደሴኔ ኦፐዬ ተከከ፥ ኔሰ አኽረረ ፐሆን ኪን «ኾዬ!» አንከ ደከዬ። 2ከ ፈርተ አተ አኬው። አፈርተሴ ቀረ አኖ ፓንተ ቀፐ። ኩሌተ ኡልፌነ ኩልከ እሽ ዳሰምቴ። እከ አኦረነፐዬ ፑኖ ቁደኤ ፑቴተን ተዌ። 3ኤቴ ለሀሴ መሀይተመ ለመተ ፉሬዬ፥ አኡመተ ለመተ «ኾዬ!» ኪኖን ደከዬ። 4ፈርተ ፕለ አቲመከ ሶክቴ። አፈርቶሴ ቀረ አኖ፥ አክመ ፒተ ቀረ አሌ ነከይተ ፐሾኤ፥ ከ አከ ኦረ ኦል ሌይሾኤ፥ ሁፕነ እሽ ዳሰሜ። ኮረቴተ ዴረይቴተከ እሽ ዳሰምቴ። 5ኤቴ መሀይተመ ሴሰተ ፉሬዬው፥ አኡመተሴ አሴሰተ «ኾዬ!» ኪኖን ደከዬው፥ ከ ፈርተ ፖረ አኬ። አፈርተሴ ቀረ አኖ፥ ታረ ኩረኤ ሀርኮፐ ቀፐ። 6ኡመተደሴኔ አፉር ኦተንቶፐዬ አንከ ወ ኔሰ ፐሀ ደከዬ፥ እከ ኪን፥ «ከፐ ታረ ተከ፥ ወ ነመ ኩያቶፐ አከነ ምነ፤ ፖርተ ታረ ሴሰው፥ ወ ነመ ኩያቶፐ አከነ ምነ። መ ኾር ሰይቴተ እሾ ወይኔተ እንሚደን።» 7ኤቴ መሀይተመሴ አአርፈተ ፉሬዬ፥ አኔሰ ኡመተሴ አአረፈተ «ኾዬ!» ኪኖን ደከዬ። 8ከ ፈርተ አውለ አኬ። አፈርተሴ ቀረ አንቶ መኻድ ቶተ። ስኦልከ እሼተ ከመ ቀቴ። አከ ኦረ ፒተ ቁደዬ ሀርከ አፉርፐ ሀርከ ተከ፥ ኮረቴተን ከ ሎተን ከ ፓቀ እሾ ፕናነ ኮመይተትን ፕረኔኤ ሁፕነከ እሾተ ዳሰሜ። 9ኤቴ መሀይተመ አኬነተ ፉሬዬ፥ ነፕሴወ፥ አኦረሴ ቆተ ቃሌተ ዋቀ እሾ ቆተ ማኩመይሾት መለ ሌይሼኔኤን ፖረ ከልሶተ ኬለ አኬ። 10እከ ኔሰ ኩተን ኡሉፕን ከ ኪን፥ «ኬ አፕሰ ቀረ ቀፖ፥ ቁልቁልቶ ከ ዱኮለይቶ ፖቀላኖ፥ ሀከ አይተምትእ ኦረ ፒተ ቀረ ከሎ ቀረ ደፐ አሙርን ከ ቆተ ዲክኖ መለ እሾተ ቀረዬ ሃሎተ አፖይንን?» 11ኦሀተ አተከ እሾተ ፕሰ ምነ ዳሰምቴ፥ ከ ሀከ ድኮተ አኦረሴ አኦልን ኦርኸየ ዋቀ ኮዴኔ እሾ አሄለሴኔ ኸይሾ አክርስታነ፥ እሰሴኔ ኸይሾ ምነ ሌተ እሾተ ቀረ ክተ እመካንቶ ከረኤ፥ አከ ሸከይቴተ ኔሰደኔኤ እሾተ ሌለምቴ። 12ኤቴ መሀይተመ አሌሀተ ፐኔዬ፥ እንቶየዴ ከ ፒተከ ልኬተ መል ሌሌሄቴ። ሌተከ አከ ኦሀተ ፖረ ምነ ፖርናቴ፥ ሌየ ፕሰከ አከ ዲከ ምነ ቲምናዴ። 13አክመ ፑፔተ ቆይረሴ ፔሌስ ክደሞ ሌሌህንቶ፥ ቃምፔተከ ቀረዬ ሴህንቶ ምነኤ፥ ህከከ ሞንቴዬ ፒቶፐ ሴሄን። 14ሞንተከ አከ ኮለተ ምነ ኦሎፐ መረምቴ ከ ፐቴ። እሮወ እሾ ፒተደ ኦተንተ ፐከቴተ ከረ ቸ ፕሰከ፥ ፖረይሾ ኦፐ አሌ ቄደሜን። 15ኑቁሰደ ፒተ እሾ ኡኩመምፐየ፥ ከ ሳረ አኦረ ኦረነ እሾ ቴየንቶለየ፥ ከ እሬለየ፥ ከ ከርፕቸደ እሾ ፖቀለደ ፕሰከ ቃወ እሾ ሽለለ እሮወ ከረ ዴዴከዴን። 16ከ እሮወ ሀሌን ከ እሾተ ኪን፥ «እኖ ቀረ ፕፕአ ከ እልደ አእሰሴ አልከ ቀረ ኩቴኤ እሾ ሚረ ለሀስት ቱረዬ እኖ ዴከ። 17ኩያተሴ ኩተ አሚረይሾት እከይቴይ፥ አይኖ ቱረ ቀአተ ኤተንሸ?»

will be added

X\