አኬተ 16

1ከመ ዴሰው፥ ኔሰ ኩተይተ፥ አትከሴ አቁልቁሎተ ኬለ ዴሰ ኤርከምፐቶወሴኔ ተፐ ኪኖ፥ «ኣነ ከ ኩፐየደሴኔ ተፐ አሚረ ዋቀ ፒተ ቀሮፐ ቱቀ!» ሴዴን ደከዬ። 2ኤርከምፐቶተ አፐዮተከ አንቴ ከ፥ ኩፐያድ ፒተ ቀረ ቱቅቴ። ኦረ ምልክተ ፕነንተስት ቀፖ ከ ፐሀናድ ሰከተኖ ቁደኤ፥ ፈይከ ኔቀ አደክንተ ላነከ ዶዶኤን። 3ኤርከምፐቶተ ለመተከ ኩፐያድ ፐከቴተ ከሮፐ ቱቅቴው። ፐከቴተሴከ ዲከ አነመ ቶኤ ፐሀናቴ። ወ ፐከቴተ ከረ ከለ፥ አኔሰ ቀፐ ፕሰከ ፕረሜን። 4ኤርከምፐቶተ ሴሰተከ ኩፐያድ ክረደ እሾ ፓደ ፕሸ ቀረ ቱቅቴው። እከ ዲከ ኮዴን። 5ኤርከምፐቶተ ፕሸደ ኡኩምቶከ ኪቴ፥ «ቁልቁልቶ፥ ኬ አአመ ቾ ከ አኸተ ቾ፥ ቆተ ደፐ አሴ ፐሆ ሙርቴ መለ፥ አሀንቄለይተ። 6ማነ መለ፥ ኦረ ቆተ ዲከ አቁልቁሎወ እሾ አኹመምፐየ ቱቄ መለ፥ አት ከፔኤ ዲከ እሾተ እክሴ። ወ እሾተ ፐርፓችስነ ሴዴይ።» 7ፖረሴ አከልሶተ ኦፐዬ አንከ ኔሰ ደከዬ፥ እከ ኪን፥ «ኣ፥ ፖቀለይ፥ ዋቆ፥ ኬ አዌ ፕሰ ኤተንኖ፥ ደፐ አሙርቶ ሀንቄተ ከ ዱካተ።» 8ኤርከምፐቶተ አርፈተከ ኩፐያድ ሌተ ቀረ ቱቅቴው። አከ ሌተ ፎላድን ሀርሞኤ ኦረ ኩኩፕቶኤ፥ እከ እሽ ዳሰምቴ። 9ኦረከ ፎለሴ ድኬ ኮፔን ኩኩፐዴ፥ ከ መኸ አዋቀሴ ኤርከነዎሴን አሚረ ፕሰ ቀረ ሁፕነ ቀፖት ኦቴን። ኡመ ደፐይሾ ከመን ኦሬ ከ እሸን ኡልፌስኔ። 10ኤርከምፐቶተ ኬነተኤው፥ አልከሴኔ አፕነንተስት ቀረኤ ኩፐያድ ቱቅቴ። መንክስቴተ ፕነንተስትከ ቱከንተውቴ። ረኮተይሾ ቀረን ኻቴኤ፥ ኦረከ እስ ከረዬ አረፐይሾ ቆም። 11ከ ሱሩማሶ እሾ ፈይካሶ ቀረን ኻቴኤ፥ ዋቀሴ አሞንተ ኦቴን። ኡመ ኮደይሾ ከመዬን ኦሬ። 12ኤርከምፐቶተ ሌሀተኤው፥ ክረሴ ኩተ ኤፍረቲስ ክደሞ ቀረኤ ኩፐያድ ቱቅቴ። አከ ኑቁሰደ ቅንደ ፒርቶተትዬለ ዴነ ኦፐን ኣነኔኤ፥ ፕሸ ክረስትከ ኩኤን። 13አፈ ፖፈሴት እሾ አፕነንተስት ከ አኹመምፐይተሴ አደርተ ኦፐዬ ሀፑረ ኔኔቀ፥ አሙኮተ ፐፐሀ ሴሰከ ሶኬን፥ አንከ አኬ። 14እሾተ ሀፑረ ኦርየ፥ ከ ወ ኦልሰ ፐሀ ኮን። ከ ኑቁሰደ ፒተ ፕሰ ከፖፐ አን፥ ከ ኦረነሴ ኩያተሴ ኩተ አዋቀ፥ እሰሴ ዌ ፕሰ ኤተንኖት፥ ቅቶ ቱረኤ ኦረ ኦሎፐ ኻሰን። 15«አንት አኬረ ምነኤን ዴአይ፥ ነመ እምፐሶ ከ አከ ሉሌን አንንእ፥ ሳላድ ከን አካንንእ፥ ከ መሀዳድ ቶይተኖ፥ እኦሎዴ።» 16ሀፑረሴኔከ፥ ፖረሴ አፈ እፕረውትን አርመኬዶን ክደሞ ከፖፐ ኑቁሰደሴኔ ኦረነ ኻሼን። 17ኤርከምፐቶተሴ አተፐተኤው ኸይኸይቶፔኤ ኩፐያድ ቱቅቴ። ኔሰ ኩተይተከ አልከሴኔ ትከ ቁልቁሎተ ኬለ ቸ ቀረ ሶኬ ከ ኪን «እድከቴ።» 18ከመ ዴሰ ሀንካደ እሾ ኔሰ ከ ኽረረ ደካዴ። ፒተከ ልኬተ መል ሌሌሄቴ። ኡመ ሀከ ኦረ ፒተ ቀረ ኡመሜ ፐየቴ፥ ፒተ አፐር አሴን ሌሌሄኔ። 19ከተመሴኔ ኩተከ ፖረ ሴሰ ቅቴን። ከተመደ አፒተደ ፕሰከ ቅትቅቴን። ዋቀ፥ ፐፕሎኔተሴ ኩተኤ መቴ ኦርሰዴ፥ ከ አከ ኩፐየሴኔ፥ አሚረሴ ኻድ ድኬ ኮፔ እክቶ ኮዴ። 20ፒተደ ፐከቴተ ከረ ቸ ፕሰከ ፐቴን፥ እሮወከ ደፐዴን። 21አፕቴንተ ኪሎተ ኩንደ አፉር ምነ ክክቶከ ሞንቴዬ ኦረ ቀረ ሴሄቴ። ኤርከናተሴ አዋቀ፥ አፕቴንተ ሮፔተ ቀረን ኻቴኤ፥ ኦረከ ዋቀ ኦቴ። ማነ መለ፥ ኤርከናሴ ድኬ ኔቅይ።

will be added

X\