አኬተ 10

1ሴከመዬ፥ ኤርከምፐቶተ ኮኮከ አፕለ፥ አሞንቴ ኸተ ሌከንቶን አኬ። እከ ኡረተ ኡውሰቴ፥ ከ ፐንከለተ መተ ቀረ ቀፕተ፥ ፉላድ ፒርቶተ ፐሀ። ሎቃድ ኔፎ ቱደ አአፕተኤ ፐፐሀን። 2ኤርከምፐቶተሴ፥ መታፈ አፐነሜ ሸከይተ ሀርኮፐ ቀፕተ። ከ ሎቅታድ አአክተ ፐከቴተ ቀረ ኻየቴ፥ ከ ሎቅታድ አፕትተ ፒተ ቀረ ኻየቴ። 3ከ ኔሰ ኩተይተ፥ አዳትተ ከርመ ፐሆን ኡሉፕቴ። ኤቴ ኡሉፕቴዬ፥ ቀቀወደሴኔ ተፐከ ኬኬሄን ከ ኦልኬለን ሃሰወዴን። 4ኤቴ ቀቀወዶሴን ኬኬሄን ከ ኦልኬለን ሃሰወናኔዬ፥ አንት አሉ ታፈን ሄናዴ መ፥ ኔሰን ሞንቴ ኸተ ደከዬ፤ እከ ኪን፥ «ወ ቀቀወደሴኔ ተፐ ሃሰወዴኔ አሌ ጩቴ ዲሼይ፥ እንታፈን።» 5ኤርከምፐቶተሴ ፐከቴተ እሾ ፒተ ቀረ ቀአቴ አንከ አኬ፥ ሀርካድ አአክተኤ ሞንቶፐ ኸእሴ፥ 6ከ መኸ አዋቀሴ ሀከ ፐረፐረት ከላኖ፥ አእሰሴ ሞንተ እሾ ፒተ ከ ፐከቴተ እሾ ወ እሾተ ከረ ቸ ፕሰ ኡሜትን ኸኸቴ ከ ኪቴ፥ «አሬ ኩልፓተ እንጨርቶ። 7መ ኾር፥ ኩየወ አኦፐዬ ኤርከምፐቶተሴ አተፐተ ካሳድ ደውንተትይ፥ ዋቀ አክመ ኦርኸያድ እሾ ኹመምፐያድ ኡፕነይሼ ምነኤ፥ ሃሳድ አጩተሜ ድክሸ።» 8ከመ ዴሰው፥ ኔሰሴ አንቱረን ሞንቴ ኸተ ደከዬ ከ፥ ለመተ አነ ሃሰወዴው ከ ኪን፥ «ኣኔ ከ መታፈሴ ፐነሜ፥ አኤርከምፐቶተሴ ፐከቴተ እሾ ፒተ ቀረ ቃቴ ሀርኮፐ ቀፕቶ ቄዴ።» 9አንከ ኤርከምፐቶተሴ ከፖፐ ኣኔ ከ እሽ ክዴ፥ «መታፎሴ ሸከ አነ ዳሼ።» እከ አነ ኪቴ፥ «ቄደዶ ከ ደሜ። አፈፐዬ አክመ ተክመ ምነኤ ኬ ሜአውተ መ፥ ከርተ ከረዬ ኬ ሀደውተ።» 10አንከ ሀርከ ኤርከምፐቶተስት ኦፐዬ መታፎሴ ሸከ ቴየዴ ከ ደሜ፥ እከ አፈፐዬ አክመ ተክመ ምነ አነ ሜአውቴ። መ ኾር፥ ኤቴን ደሜ ከመዬ፥ ከርተ ከረዬ አነ ሀደውቴ። 11ሴከመዬ እከ አነ ክደምቴ፥ «ቆተ ኦረ ሌከይተት ዴሰ፥ ከ ቆተ ፒተዳት ዴሰ፥ ከ ቆተ ኦረ አፈ ሌከየ ሃሰወኖት ዴሰ፥ ከ ቆተ ኑቁሰዳት ዴሰ ለመተ ኹመ ሃሰወተ ኬ ቀረ ቸ።»

will be added

X\