1 ከመ ዴሰው ዬሱስ እክዴ፥ «ኩረ ቴየ መለ ኮደ ዋቀ አኮንተን፥ አከ ፉለ ኦረ ቱሮፐ አሶክንንእ ቶይታደ። ታክት ኣፐሴ ኸይሽን ሞንቴ ከሎ ዌሴን አኮተኔ ከፔ ዌ ተከን ኔፎ እሽነኤን ዳሾይ። 2 ሴመለ ኦ ሂዬሰ ዌ ተከን ዳንቶዬ፥ አከመሴ አኦረ እስ ፔፕኖ ኩረ ቴየ መለ ፖሮፐ ከ ትከ ኦረ አይሁድ አቅንሴተ ኬለ ዳኖ ምነኤን ዳሸን። አንት ዱካተኔን እሽነ ኪን፥ ኦሮሴ ቆተ ዴቾኤው ወ ፈዴኔ ፕሰ አከዴን መለ፥ ዌ ተከን ኔፎ ዋቀ ከፐን አከደን። 3 - 4 አት ኡፍ ኦ ሂዬሰኤ ዳሰተ ዳንቶዬ፥ ዴኮተን ዳሼ። ወ ሀርከይት አአክተትን ዳንተ ሀርከይት አፕትተ ኔፎ እንኡፕናንን። ዋቀሴ ኸይት ወ ዴኮተን ኮንተ ቶይኖ፥ ኮደይት ከፐኤ ኬ ዳሸይ።» 5 ከመ ዴሰው ዬሱስ እክዴዌ፥ «ኦ ቅንሰንቶዬ፥ አከ ኦረሴ እስፔፕኖ ምነኤን ኮደን። እሾነ አከ ኦረ እሾነ ቶዮኤ፥ ፖረ ቁደ እሾ ትከሴኔ አኦረ አይሁድ አቅንሴተ ኬለ ቀቀአተ ከ ዋቀ ቅንሰተ ጫለንይ። አንት ዱካተኔን እሽነ ኪን፥ ኦሮሴ ቆተ ዴቾኤው ወ ፈደኔ ፕሰ አከዴን መለ፥ ዌ ተከን ኔፎ ዋቀ ከፐን አከደን። 6 አት ኡፍ፥ ኦ ዋቀ ቅንሰንቶዬ፥ ትከይት ኬሎፐ ኩሌ ከ ኻረይት እቱረ ዱፌ፥ ከ ዋቀሴ ኸይት ዴኮተን ቾ ቅንሰዶ። ዋቀሴ ኸይት ወ ዴኮተን ኮደሜ አክኖ ወ ኮቴ ከፐ እኬ ዳሸይ። 7 «እሽነ ኾር፥ ኦ ዋቀ ቅንሰንተኔዬ፥ አከ ኦረ ዋቀን ኡፕንን ምነ ወ ኪቴኔ ኦፔዌን ኦረን ከን ኛኘን። እሾነ ቅንሴተ ዴረሰን አዋቀ እሾነ ደከይኖ እሾነ ፐሀናንይ። 8 እሽነ ኾር፥ ወ እሽን ፐርፓችስነ ቆተ ዋቀ አእሽነ አቅንሰንን ቱረኔው ኡፖ መለ፥ አከ ኦረ ዋቀን ኡፕንን ምነኤን ኮደን። 9 ሴመለ ኦ ቅንሰንተኔዬ ክደ፦ ‹ኣፖ ኸኖ ኬ አሞንቴዬ ከሎ፥ መኸይት አቁልቁለዎ። 10 መንክስቴተይት አዴቶ። ወ ጫለንተ አከ ሞንተ ኮዴን ምነኤ፥ አፒተ ኮዴኔው። 11 ኩያተ ኩያተን ዋን ደመ እኖ ዳሼ። 12 አክመን ኦረ እኖ ምህኖ ዲንኖ ምነኤ፥ አት ምህስኖ እኖ ዲሼው። 13 ወ ኔቀ ኬለ እኖን ፐሄ ዲሼይ፥ ኦፖፐ እኖን ከልሸን። [መንክስቴተ ከ ሁፕነ ከ ኡልፌነ ኸይትው፥ ሀከ ፐረፐረትእ አሜን።]› 14 «ኦን ደፐ ኦረ እሽን ቀረ ኮዴ ኦረ ዲንተኔዬ፥ ኣፐሴ ኸይሽን አሞንተ አሴው ደፐይሽን እሽነ ዲሸ። 15 ከፐን ኦን ኦረ እሽን ምህሼኤ እሽነ አዲንአክንንይ፥ ኣፐሴ ኸይሽን አሞንተ አሴው ደፐይሽን እሽነኤን ዲንንይ።» 16 ከመ ዴሰው ዬሱስ እክዴ፥ «ኦ ደምተ ሙሰንተኔዬ፥ አከ ኦረሴ እስፔፕኖ ምነኤ ፕሰ ኘረሀተ እሽን ቀረኤን አካንን። እስፔፐምፐየሴኔ አክመ ኦረ እሾተ ክዶ ‹ደምተ ሙሰን› መለ ኦረ ኘረሀኖ ፐሀናንይ። አንት ዱካተኔን እሽነ ኪን፥ ኦሮሴ ቆተ ዴቾኤው ወ ፈደኔ ፕሰ አከዴን መለ፥ ዌ ተከን ኔፎ ዋቀ ከፐን አከደን። 17 አት ኡፍ፥ ኦ ደምተ ሙሰንቶዬ፥ ሚንቶፐ ጨቀዶ ከ ዳተ ዳተዶ። 18 ስትይ ኦር አከ ደምተ ሙሰንቶ፥ ኣፐሴ ኸይሽን ዴኮተን ቾ መልይ ነመ ፕለ ተከ ኔፎ እንኡፕናዶይ። ኣፐሴ ኸይሽን ወ ዴኮተን ኮደኔ አክኖ፥ ወ ኮቴ ከፐኤ ኬ ዳሸይ።» 19 ከመ ዴሰው ዬሱስ እክዴ «ፒሴ አአሬ ኦፐዬ እቴተ እሾ ጬልጬልቶተ ፓተ ኘፐልንቶ፥ ኬሬተከ ትከ ፖንቶ ከ ከረ ሀንቶ ቀረኤ፥ ኮደቴተይሽን ኦሎፐን ፖተደን። 20 መ ኾር፥ እል ሞንተኤ ፖረሴ አኦፐ እቴተ ከ ጬልጬልቶተ ፓተ ኘፐልንንክንን፥ ኬሬወከ ፓተ ፖቴተ ከ ሀተንተ ኤተንንንክንንፐ ኮደቴተይሽን ኦሎፐ ፖተደ። 21 ፖረ ኦፐ ኮደቴተይሽን ክቶ፥ ከርተይሽን ከሱ ኤዬው ቻይ።» 22 ከመ ዴሰው ዬሱስ እክዴ፥ «ለአይተ ደክንተይት፥ እልተይት። ሴመለ ኦ እልተይት ፈየ ቀፕቶዬ፥ ደክንተይት ፕሰ ለአይን። 23 ኦን ኾር እልተይት ፈየን ቀፕንንይ፥ ደክንተይት ፕሰ ቱከን። ሴመለ ኦ ለአይተሴ ኬ ቁደ ቾ ቱከኖ፥ ኦር ቱከንተ ዴሰ አተ ኔቅናተው።» 24 ከመ ዴሰው ዬሱስ እክዴ «ነመ ተከ ፖቀለደ ለክ ኬለ ኦርኹሜተን ኤተንሾ። ሴ ከፐዬ ፖቀለ ተከኔ ጫለን ከ ተከን ኔድን፤ ከ ተከን ኡልፌስን ከ ተከን ፑየን ዲሼይ። አክሞሴ ምነኤው እሽነ ኮደቴተ እሾ ዋቀ ኬለ ኦርኹሜተ አኤተንሰን። 25 ሴመለ እንእሽነ ኪኒ፥ ማነን ደመ ከ ማነ እክነ ከ ማነ ኡውሰን እንክደን ከ ከላተይሽን ኦፔን ረከደን። ቻተ ደምተ ቀረን ቀፖ? ደክንተ ኔፎ ሜሀደ ከልሰናኔ ቀረን ቀፕቶ? 26 ኸምፕረ ሞንተ ቶየ! እሾነ አይለንንቻን ኡመ ፌረንንቻን ከ ኮሰፐ ከልሰንንቻን፥ መ ኣፐሴ ኸይሽነ አሞንተኤ እሾተ ደምን። እሽነ ኸምፕረ ቀረዬ አቀፕተኔ? 27 ሄለመ እሽኖፐዬ አይኖ ድከተፐ ረከን ከ ፐራድ ቀረ ኩያተ ተከ ፐደወተ ኤተንን? «ፐራድ ቀረ ኩያተ ተከ» 28 ሜሀደ አከልሰናኔ መለ ማነኤ ረከንተን? ሜ ፕሰ ለኮፐን ኸተ አከ ፕስኖ ቶየይ። ያለን ቀፖ፥ ኡመ ፉቶተ ሽፐንንቾ። 29 ኡፍ አንት እንእሽነ ኪኒ፥ ኑቁሰሴ ሴሎሞን ኪናን ኔፎ ኡልፌናድፐዬ፥ ፕሶሴ ኦፐዬ አፕሰ ተከ ኔፎ ምነኤን ስረኔ። 30 ሴመለ፥ ኦ ዋቀ፥ ጨጰሴ ለኮፐን ኸተ አዌ ፕስኖ ከ ፐር ኮክኖ፥ ኦፍንከ ኩፐነፖፐ ከነን፥ አሴ ስሮዬ፥ እሽነ አአመንቴተ እሽነ ቀጨቴት፥ ኦ ዴሰ፥ አተ እሽን ስረው? 31 ሴመለ ‹ማነን ደመ ከ ማነ እክነ ከ ማነ ኡውሰነ› እንክደን ከ ኦፔኤን ረከደን። 32 ኦረ ዋቀን ኡፕንን ሴዴው ፋን ከ ሴፐኤው ረከንይ። ኣፐሴ ኸይሽን አሞንተ አክመ ዌሴን ፕሰ እሽን ፐርፓችስናን እኡፐይ። 33 መ ኾር፥ እሽነ ሴ ቱረን ቀትሸ ከ መንክስቴተ ዋቀ ከ ሀንቄሉማድ ፈደ። ዎሴን ፕሰ ቀረኤ እሽነ ፐደወመኔይ። 34 ቆተ ኩያተ ፐር መለ ድከተፐኤን ረከደን፤ ኩያተ ፐር ወ እሽን ፕርተኤ ቀፕተይ።»
