ማትዮስ 3

1ስትይ ዮሀንሴተሴ ፕሸን ኦረ ጨቅኖ ፒተ ይሁደት ኮመይቶፐ ኮልሰ ፐዬ ከ ክዴ፥ 2«ሀ ኼለ መንክስቴተ አሞንተ እዴሀቴይ፥ ጩፖተይሽን ኦፐዬ አሌ ኦረ!» 3ሴዴ ኔፎ እሰሴ አኹመምፐይተሴ እሰያስ ኪናን ኹሜ ከ ክዴ «ኔሰ ነመ ተከኤ ኮመይቶፐ ሴልን ከ ኪን፥ ‹ፖረ ፖቀለ ሀርምሸ ከ ሳንተ ኔፎ እሽ ቀጬልሸ።› » ከ ቆተ ዮሀንስ ዴሰ ሃሰወዴ፥ ሴዴ እሼተ። 4ሜሀደ አዮሀንስ ኡውሰነ ኝርፈ ካለ ኦፐ ኮደሜን፥ ሱራድፐን ዴሰ ሰልፐተ ኮለተኤ ህደን፥ ደምታድ ኔፎ ቶረይተ ከ ተክመ ቶለ። 5ስትይ ከተመደ ዬሩሰሌምትይ ከ ፒተ ይሁደ እሾ ፒተደ ክረ ዮርተኖስ ከፐን ዴሰ ቸ ኦፐዬ ኦረ ኩቱምተን ዮሀንስ ከፖፐ ኦሎፐ ዴን። 6ከ ጩፖተይሾ ዮሀንስ ሌል ከ ኦፐ ኦር፥ እከ ክረ ዮርተኖስ ኦፐ እሾነ ጨቅን። 7ዮሀንስ ኤቴ ፌሬሰዌወ ሌከየ ከ ሳዱቄወ ሌከየ ፕሸ ጨቀተ እሸ ከፖፐ ዴናን እከ አኬዬ፥ እእሾተ ክዴ፥ «እሽነ ሄለ ፑቶተት፥ ሚረሴ አዋቀ ዴኖ ኬለዬ አከ ቀሀተኔኤ አይኖ እሽነ ሌሌ? 8አኮድቶመ፥ አከ አጩፖተይሽን ኦፐ ኦርቴን ኮደን አክሸ ዲሼይ፥ 9‹እኖ አንሄለ አፕረሃም› እስእን ክደን ከ አፕረሃም እስቱረኤን ቀፐደን። ዋቀ ደከዶሴን አሬ ቸ ኦፐዬ፥ አፕረሃምእ ሄለ ኸእሰ እኤተንሸይ። 10ከ ዴሰ አመ ኤርከሀ ህትነፐን ዴሰ ቆረ ቁሬተ ቆረ ኬሎፐ ሄቄይ፥ ቆይረ ዴልተ ፈየ ደልንክንን ፕሰ አሌኤ ሙረመ ከ አፕቶፖፐ ከተመ። 11አንት አመ አከ ጩፖተይሽን ኦፐ ቲተውተኔኤን ፕሸን እሽን ጨቅን መ፥ ነመ ሀርሞ አነ ቀረ ጫሎ አነ ከመ ዴሰ ዴአ። አንት ነሞሴ ኬለዬ ኾፓድ ምከ ሃዴተ ምነኤ አንቀኔ። እሸ ኦ ዴኦዬ፥ ሀፑረ ቁልቁሎተ እሾ አፕተኔ ክርስትነ እሽን ኸአሸ። 12እሸ ኔፎ ኡንተ አውተፐ ክቶ ፕሰ ኸይሰኤ፥ ስማተ ሀርኮፐኤ ቀፐዴ። ኦ ኸይሾ ከመዬ፥ ሚለተ ኡንኩለፖፐ ቀአ ከ ኡከሸ አፕተ ልጵንንክንንፐኤ አሌ ኩፐ።» 13ስትይ ዬሱስ አከ ዮሀንስ ፕሸን እሸ ጨቆኤ ፒተ ኬልለት ዴሰ ክረ ዮርተኖስ ኦፐ ዴኤ። 14ዮሀንስ ኾር እሸ ደውርን ከ ኪን፥ «ሀ አንት ሀርከይትፐኤ ፕሸን ጨቀመ አነ ፐርፓችስን መ፥ አተ ኸው አት ማነኤ አነ ከፖፐ ዴን?» 15ዬሱስከ እሽ ኦርሼ ከ ክዴ፥ «እነይት፥ አመ ዲሼ ከ ኤርከኖሴን አሀንቄሉመ አዋቀ መለ እኖ ኤርኬ ድክነ።» ዮሀንስከ ኦውሰዴ ከ እሸ ጨቄ። 16ዬሱስ ኤቴ ፕሸሴኔ ጨቀዴ ከመዬ፥ ሶከ ፕሸፐ ሶኬኔ፥ ኤኖው ሞንተ ፐነምቴ። እከ ሀፑረ ዋቀ አኤሌለ ፐሀናዴ ከ እሸ ቀረ ሌከኖ አኬ። 17ከ ኤኖው ኔሰ አኪኖ «እን እነሴኔ ኸዮ አንጫለነ ከ ምክተ እሽን ኸሶነ ሴኔ።» ከ ሞንቴ ኸተ ደካዴ።

will be added

X\