ማትዮስ 11

1ዬሱስ ኤቴ ተማሬወሴኔ ኻድ ኩደንከ ለክ አጨጬ ከመዬ፥ ፖሮሴ ኦፐዬ ኼ ከ ኦቶተሴ አፈየ ቶሬተ ከ ኮልሰኤ ከተመዳሶ ከሮፐ ኣኔ። 2ዮሀንሴተሴ ፕሸን ኦረ ጨቅኖ አትከ ህደ ከረ ቾዬ፥ ኮደ ክርስቶስ ደከዬ ከ ተማሬዋድፐ ነመ ለመይተ ዬሱስ ከፖፐ ኤርኬ ከ ክዴ፥ «ኣነ ከ ዬሱስ ካሰደ ከ ክደ፦ 3ሄለ እሰሴ ኪናኔ ‹እዴአ› ኬም፥ ሞን አፕለኤን አሰና?» እከ ኣኔን ከ ካሰዴን። 4ዬሱስከ እሾተ ኦርሼ ከ ክዴ፥ «ኣነ ከ ዎሴን አደከይቴኔ ከ አአክቴኔ ዮሀንስ ቶረ፦ 5ሀ ኦረ እልደን ቀፕንን እፓተ አክን፥ ቶቶነየ ጭጵ ኪን ከ አን፥ ቆሾለየ እድን፥ ኦረ ደካዌ እፓተ ደከይን፥ ኦረ ሌኤ ቶቶፐ እኻን፥ ኦቶተሴ አፈየከ ቴኮለየ ቶረም። 6ነመ አነን ኬሀንንክንን፥ እኦሎዴ።» 7ተማሬወሴኔ አዮሀንስ ኤቴ ኤፐ ተዌኔዬ፥ ዬሱስ ኦር፥ ቆተ ዮሀንስ ዴሰ ኦረ ቶረ ፐዬ ከ ክዴ፥ «አተ ማነ ቶየኤ ኮመይቶፖፐ ኦሎፐ ሶክቴን? ሄለ ኻሸሴኔ አኸይኸይተ ሌሌህነ ቶየኤ ኤዬፐ ኦሎፐ ሶክቴኔ? 8ሞን ማነ ቶየኤ ኦሎፐ ሶክቴን? ሄለ ነመ ኦሀተ ኡልፌነ ኡውሰዴ ቶየኤ ኦሎፐ ሶክቴኔ? ኦረ ኦሀወ ኡልፌነ ኡውሰኖ ትከ ኑቁሰደ ከረዬ ቻን። 9ሞን ማነ ቶየኤ ኦሎፐ ሶክቴን? ሄለ ኹመምፐይተ ቶየኤ? ኣ፥ እንእሽነ ኪን፥ ሀ አኹመምፐይተ ኩል ቀረ ቀፖ ቶየኤ ኦሎፐ ሶክቴን። 10ሀ እሰሴ አኸተ ቆታድ ዴሰ ታፈምቴ ከ ኪንቶ፥ ‹ዋቀ እኪን፥ እን ኤርከምፐቶትዮ አንኬ ቱረን ዴሰ ኤርኮ፥ እከ ፖረ ኬ ቱረን ዴሰ ሀርምሶ።› ሀ ነሞሴ እሸ። 11ዱካተኔን እሽነ ኪን፥ ኦረ ፒሴ ቀረ ዴለዴ ፕሶፐዬ፥ ነመ ዮሀንሴተሴ ፕሸን ኦረ ጨቅኖ ቀረ ቀፖ፥ ተከ ኔፎ እንቾ። መ ኾር፥ መንክስቴተ ሞንተት፥ አነመ ፕሰ ኬሎፐ ኸተ ቾ እሸ ፕሰ ቀረ ጫል። 12ኼልተ ዮሀንሴተሴ ፕሸን ኦረ ጨቅኖት ፐየቴ ሀከ አዌትእ፥ መንክስቴተ ሞንተ እሚደም፤ «መንክስቴተ ሞንተ እሚደም» እሬለየከ ቀረ ኦልቀፕን። 13ኹመሴ አኹመምፐየ ፕሰ እሾ ሴረሴ አሙሴ፥ ሀከ ኼልተ ዮሀንስተሴ ከይንቶ ከረኤ ቶረሜን። 14ኦ ቴየተ ሄንተኔዬ፥ እሰሴ ኪናኔ ‹ኤልያስ ዴአ› ዮሀንስሴ አሬ ቾ እሸ። 15ነመ ነፐሀተ አደከይንቶ ቀፖ፥ አደከዮ። 16አተ ማነ ከፐኤን ኦረ ኼልቶስት ኤከይሸ? ሄለ ሞረፐ ቃኤኤ ፐሀን። ሄሎሴን ኔፎ እኼልያሶ ሀሌን ከ ኪን፥ 17‹ኬሀይተን እሽነ ደውኔ፥ ኡመ እሽነ አዲኔ፤ አንከ ሳረ ፖይተ እሽነ ሳርኔ፥ ኡመ እሽነ አፖይኔ› 18ዮሀንሴተሴ ፕሸን ኦረ ጨቅኖ ኤቴ ደምተ ከ ታዴተ ወይኔተ እከይተ ዲሼ ከ ሙሰዴዬ፥ እእሽ ኪቴኔ፥ ‹ኦርተ ቀፐ።› 19እነ ነመኤው ኤቴ ወ ኦረ ደመ ፕሰ ኦረ ኦል ደማን ከ እከይተ ኔፎ እክናኔዬ፥ እእሽ ኪቴኔ፥ ‹ከርቶለይተ እሾ እከምፐይተ ታዴተ ወይኔተ፥ ከ ሞተ ኦረ ቀረተ ቀረትኖት እሾ ሞተ ጩፖለየ።› ሀ ኦኩመ ኮደድንው አክመ ዱካተ ኮዴ ኡፕነይሰም።» 20ስትይ ከተመደሴኔ አኮደደ ኦረ ቀወነ ኩቱምተን ከረ ኮዴኔ፥ ቆተ ጩፖቶፐን ኦርን መለ፥ ዬሱስ እሾተ ሀመተ ፐዬ ከ ክዴ፥ 21«ኦ ኬ ክዶ ኮረስን፥ ኦ ኬ ክዶ ፔቴሰይደ! ከትን ኮደደሴን ኦልሰ ፐሀ እሽን ከረ ኮደሜኤ፥ ትሮስ እሾ ስቶነ ከረ ኮዴ ኪቴዬ፥ ኦረይሾ ሄለን ኤሴ ኸተው ኦሀተ ደፕቴተ ኡውሰን ሄኔን ከ፥ ተረ እስቀረኔለ ፑለን ሄኔን ከ፥ ኤሴ ኸተው ጩፖተይሾ ኦፐ ኦር ሄኔን። 22መ ኾር እንእሽነ ኪን፥ ኩያተ ደፐ ከ ዱካተ ሙረሞዬ፥ አውሴ እሽን ከፐዬ ዋቀ ኦረ ትሮስ እሾ አስቶነትእ ኾረ ሸክሸ። 23አት ቅፍርነሆም፥ ሄለ ሞንተን ሌለ ኩተቴ? ሀ ስኦል ከሮፐ ሌከተ። ኮደሴ ኦልሰ ፐሆ ኬ ከረ ኮደሜ፥ ከትን ሶቶም ከረኤ ኮደሜ ኪቴዬ፥ ሄለን ሀከ አዌት ቻን ሄንቴ። 24መ ኾር እንኬ ኪን፥ ኩያተ ደፐ ከ ዱካተ ሙረሞዬ፥ አውሴ ኬ ከፐዬ ዋቀ ፒተ ሶቶምት ኾረ ሸክሸ።» 25ስትይ ዬሱስ እክዴ፥ «ፖቀለ አፒተ እሾ አሞንተ ኣፖ ኸኖ፥ ቆተ ኦከ እሾ ኡፕነምፐየ ቱረ ሴዴ ጩቴ ከ ኦረ ዌኤን ኡፕንን ኡፕነሴ መለ፥ እንኬ ከለተይሰን። 26ኣ፥ ኣፖ ኸኖ፥ አት አከ ጫለላት ምነኤ ሴ ፕሰ ኮቴ። 27«ዌ ፕሰ ኣፕኖ ከፐ አነ ዳሰሜን። ዋቀ ኣፐ መል ነመ እነ ዋቀ ኡፕናኖ እንቾ፥ ኡመ እነ ዋቀ መልይው ነመ ዋቀ ኣፐ ኡፕናኖ እንቾ። ታክ ነመ እነ ዋቀ እሸ ሬኸዴን ከ እሸ ኡፕነይሸን መል፥ ነመ ዋቀ ኣፐ ኡፕናኖ እንቾ። 28እሽነ ከከፈዴ፥ ሃዴተከ እሽን ቀረ ኡልሰቴት፥ ፕሰንት አነ ከፖፐ ኾየ፥ አንት እንእሽን ኔስሸይ። 29ቀንፐርዮ ኸይሰደ ከ አነ ኬለ ኮለደ፤ አንት አንሱረይሰተምፐይተ ከ አናለይተይ፥ ነፕሴተይሽነ ኔሱመ አከተኔይ። 30ቀንፐርዮ ቆኦናን ቀፖ፤ ሃዴትዮ ኔፎ እሾለእይ።»

will be added

X\