ማትዮስ 1

1ሴዴ፥ ኼልተ አኣከዳፐ ዬሱስ ክርስቶስ፥ አእነሴኔ አታውት ከ አሰኜተ አፕረሃም። 2አፕረሃም ይሳቅ ኻዬ። ይሳቅከ የይቆፕ ኻዬ። የይቆፕከ ይሁደ ከ ሄለ ኦፐ ይሁደ ኩል ኻዬ። 3ይሁደከ እስከቴተ ተከ ትእማር ክደምቶፐዬ ፋሬስ እሾ ሴረህ ኻዬ። ፋሬስከ ሄስሮን ኻዬ። ሄስሮንከ ረምን ኻዬ። 4ረምንከ አምነታፕ ኻዬ። አምነታፕከ ነአሶን ኻዬ። ነአሶንከ ሰልሞን ኻዬ። 5ሰልሞንከ እስከቴተ ተከ ረአፕ ክደምቶፐዬ ፖኣስ ኻዬ። ፖኣስከ እስከቴተ ተከ ሩት ክደምቶፐዬ እዮፔድ ኻዬ። እዮፔድከ እሴይ ኻዬ። 6እሴይከ ኑቁሰሴ ታውት ኪነን ኻዬ። ኑቁሰሴ ታውት ኪነንከ እስከቴተ ኦርዮንፐዬ ሴሎሞን ኻዬ። 7ሴሎሞንከ ሮፐኣም ኻዬ። ሮፐኣምከ አፕየ ኻዬ። አፕየከ አሳፍ ኻዬ። 8አሳፍከ እዮሰፊት ኻዬ። እዮሰፊትከ እዮረም ኻዬ። እዮረምከ እዮስኣን ኻዬ። 9እዮስኣንከ እዮተም ኻዬ። እዮተምከ አካስ ኻዬ። አካስከ ህስቅያስ ኻዬ። 10ህስቅያስከ ምናስ ኻዬ። ምናስከ አሞስ ኻዬ። አሞስከ እዮስያስ ኻዬ። 11እዮስያስከ ኼልተሴ አሄለ እስረኤል ፒተ ፓፕሎን ኦፐ ፖጨሜኔዬ፥ ዮአኪን ከ ሄለ ኦፐ ዮአኪን ኩል ኻዬ። 12ፒተ ፓፕሎን ኦፐ ፖጨሜተ ከመዬ፥ ዮአካን ሴለትያል ኻዬ። ሴለትያልከ ሴሩፓፔል ኻዬ። 13ሴሩፓፔልከ አፕዩተ ኻዬ። አፕዩተከ ኤልያክም ኻዬ። ኤልያክምከ አሶር ኻዬ 14አሶርከ ሰቶቅ ኻዬ። ሰቶቅከ አክም ኻዬ። አክምከ ኤልዮት ኻዬ። 15ኤልዮትከ ኤልአሳር ኻዬ። ኤልአሳርከ መታን ኻዬ። መታንከ የይቆፕ ኻዬ። 16የይቆፕከ ዮሴፍ ኻዬ። ዮሴፍ ኔፎ፥ ማርያሜተሴ ዬሱሴተሴ ክርስቶስ «ክርስቶስ» ኪነን ኸይቴ፥ እሽእ ሄምተ ዳሰምቴ። 17ሴመለ ኼልተ አአፕረሃም ፐየቴ ሀከ ኼልተ ታውትእ ኼልተ ኩደንከ አፉር። ኼልተ አታውት ፐየቴው ሀከ ፒተ ፓፕሎን ኦፐ ፖጨሜተትእ ኼልተ ኩደንከ አፉር። ኼልተ ኦፐ ፒተ ፓፕሎን ኦፐ ፖጨሜኔት ፐየቴው ሀከ ኼልተ ክርስቶስእ ኼልተ ኩደንከ አፉር። 18ዬሱስ ክርስቶስ ፖረ እሽን ዴለዴ፦ ኣያሶ (አሀተይሾ) ማርያም አዮሴፍፐ ሄምተ ዳሰምቴዬ፥ አኦሎፐን ሄመምን ቱረኔ ሀፑረ ቁልቁሎተትን እነ ህቴ። 19ዮሴፍሴ አእሽ ሄምተ ዳሰምቴ ኾር፥ ቆተ ነመ ፈየ ኮዴ መለ፥ ኦረ ቱረ እሼተ ጬርሰን ፋኔ መ፥ ዴኮተን አሌ እሼተ ዲሰተ ድከዴ። 20እሸ አሴዴ ድከተፐ ቾዬ፥ ኤርከምፐቶተ አፖቀለከ ኦልሰን እሸ አካቴ ከ ኪቴ፥ «እነ ታውት ዮሴፍ፥ ማርያሜተሴ ኬ ዳሰምቴ ሀፑረ ቁልቁሎተትን እነ ህቴይ፥ እሼተ ሄሜተን ፉረን። 21እሼተ እነ ዲርተኤ ኸይተ፤ እሸ ኔፎ ቆተ ጩፖቶፐ ኦራድ ድንሾ መለ፥ መኻድ ዬሱስ ኪተ ከ ሀሌተ።» 22ሴዴ ፕሰ ወ መለ አሴ ኮድቴ፥ ኹመሴ አፖቀለ አፈ ኹመምፐይተ ኦፐ ሃሰወዴ ከ ክዴ፥ 23«ሀ ኤኔንተ እስን ክቶ እነ ዲርተኤ ህተ ከ ኻይተ። መኻድ ኔፎከ አመኑኤል ክደመ።» አከ ድከዶ መለ። አመኑኤል ክዴተ፥ ዋቀ እኖ ኦል ቸ ክዴተ። 24ዮሴፍከ ሙክተፐ እምፐሴ ከ፥ አከ ኤርከምፐቶተሴ አፖቀለ እሸ አጨጭቴ ምነ፥ ማርያሜተሴ ሄምተ እሽ ዳሰምቴ ትካድፐ ቴየዴ። 25አኮድቶመ ሀከ እነሴኔ ኻድ አፐዮተ ኸይንቶኤ ኦልን ሙክኔ። ኤቴ እነሴኔ ዴለዴን ከመዬ፥ መኻድ ዬሱስ ክዴ ከ ሀሌ።

will be added

X\