1 ስትይ ሰመይተ ፒተ ፕሰ አከ ድከሞ ከ ታፈሞኤ፥ ኑቁሰሴ አፒተ ሮም አውክስቶስ ክደሞ አጨጬ። 2 ቄርኔዎስ ስትይ ፒተ ሶርየኤ ሙክን። ሴዴ ኔፎ ድኮተ ፐዮተ። 3 ሴመለ፥ ነመ ፕሰ መኻድ ታፈተኤ ፒተ ኦፐ ዴለዴፐ አን። 4 ዮሴፍ ኔፎ፥ ቆተ ሰኜተ ታውት ኮዴ መለ፥ ከተመሴኔ አናስሬት አውረቸ ኬልለ ኦፐ ቻትይ ኼ ከ፥ ፒተ ይሁደትይ ከተመሴኔ አኑቁሰሴ ታውት ክደሞ፥ ኸተ ከረ ዴለዴ፥ ፔቴሌሄም ክደመ፥ ኦፐ ኣኔ። 5 እሸ ኔፎ፥ ኤኔንተሴ ሄምተ እሽ ዳሰምቴ እነ ህቴ፥ ማርያም ክደምቶ፥ ኦልን ኣኔን። 6 ኤቴ ከተመሴኔ አፔቴሌሄም ከረ ቻኔዬ፥ ማርያም ሌየዳድ አኻየኤ ከይቴ። 7 እከ ኤዬ እናድ አኩተ ኸይቴ፥ ከ ኦሃተ ሸከይቴተን ቁደ መርቴ፥ ከ ቆተ ትከ ኸይክተትይ ፖረ ሙክተ ደፔን መለ፥ ሞነ ሎአለ ከረዬ ታማረ ከረ ሙክሴ። 8 ፒስትይ ከተመ ቱለዬ፥ ስክመየ ሎአለ ስክነ ከ ለኮፐዬ ሀልኬት ከፓ ሙክነኤ ቸ። 9 ኤርከምፐቶተ ዋቀከ እሾነ አካቴ። ኡልፌነ ዋቀከ እሾነ ለአዬ። እከ ሀርሞ ፉሬን። 10 ኤርከምፐቶተሴ ኾር እእሾነ ኪቴ፥ «ኦቶተ አሀርሞ ፐኻረ፥ አኦረ ፒሰ እሽን ኸሶዶን እሽነ ሌለይ፥ እንፉረን። 11 ሀ አዌ ከተመ ታውት ከረኤ ድንሸምፐይተ እሽነ ዴለዴ። እሸ ኔፎ ፖቀለ ክርስቶስ። 12 ሴዴ ኔፎ፥ ወ እሽን ኡፕናተኔ፥ እነ ኦሀተን መሬኔ ከ ሞነ ከረዬ ታማረ ሎአለ ከረ ሙክሼኔኤ አክተን።» 13 ኤኖው ኤርከምፐቶወ ሞንተ ሌከየከ ኤርከምፐቶተሴ ቁደ ፐደወሜን ከ ዋቀ ከለተይሰን ከ ኪን፥ 14 «ሞንተኤ፥ ዋቀ አኡልፌሰሞ፥ ፒተኤ፥ ኦረ አዋቀ እሾተ ጫለኖ ፕሰኤ ነከይተ አኮዶ።» 15 ኤርከምፐቶወሴኔ፥ ኤቴ ስክመየ ከፐዬ ሞንቶፐ ተዌኔዬ፥ ስክመየሴኔ እኦል ክዴኔ፥ «አመ ኦር ፔቴሌሄምፐ አነ ከ፥ ወ ኮዴ ከ ወ አዋቀ እኖ ሌሌ አነ ቶይነ።» 16 ከ ኤኖው ጨርጨርተን ኣኔን ከ፥ ማርያም ከ ዮሴፍ እሾ እነሴኔ ሞነ ከረዬ ታማረፐ ሙክሼኔ አኬን። 17 ከ ኤቴ አኬን ከመዬ፥ ቆተ እነሴኔት ዴሰ ወ እሾነ ሌለሜ ኦረ ኤዬ ቾ ፕሰ ቶሬን። 18 ኦረ ቶረሴኔ አስክመየ ደከዬ ፕሰከ ኦፐ ቀወዌ። 19 ማርያም ኾር ሴ ፕሰ ከርተ ከረኤው ቀፐቴ ከ ኦፐ ድከን። 20 ስክመየሴኔከ ኦር፥ አከ ኤርከምፐቶተ እሾነ ሌልቴ ምነኤ ቆተ ዌ ፕሰ ኮዴን፥ እከ አኬን ከ ደከዬን መለ፥ ዋቀ ከለተይሰተን ፖረይሾ ኦፐ ቲተዌን። 21 ኩያተ ሴቴ ከመዬ ኣተሴኔ ደውረ ቀረ እነ ሙራኔኤ ከይቴ። አክመ ኤርከምፐቶተ አእሸኤን ህተምን ቱረኔው እሽ መኸ ኮቴ ምነኤ፥ መኻድከ ዬሱስ ክደሜ ከ ሀላሜ። 22 - 23 አክመ ሴረ ሙሴ ምነኤ፥ ኣተሴኔ አፕሸ ጨቀተ ከ ሶከኤ ከይቴ። ቆተ ሴረ ዋቀ ቀረ ኪንቶ «እነ ዲርተ አፐዮተ ዴለዴ ዋቀ ዳሰመ ከ ቁልቁለወ እሾነ ፋን» መለ፥ እነሴኔ ቄዴን ከ ዋቀ ዴሀሰኤ ዬሩሰሌምፐን ኣኔን። 24 ሴረሴ አዋቀ ኦፐዬ አጨጨ ኪኖ፥ «ኻሌወ ለክ አታክት ሄለ ኤሌለ ለክ ከልሶተ ዴሀሰ ፐርፓችስን» ኔፎ እቸው። 25 ስትይ ቅመይተ ተከ ስሞን ክደሞ ከተመ ዬሩሰሌምት ከለ። እሸ ኔፎ፥ ነሜዬ ሀንቄልተ ከ ቻታድ ፕሰ ዋቀ ዳሼ። ሀፑረ ዋቀ ኔፎከ እሸ ኦል ቸ፥ እከ ኸሰሴ አእስረኤል አድነ አሰን። 26 እሸ፥ ሀከ ድንሸምፐይተሴ አዋቀ ሬኸዴ እልዳድን አኮ መልይ፥ አክመን ቶንን፥ ሀፑረ ቁልቁሎተኤ እሽ ሌሌ። 27 ኩያሴትይ ሀፑረ ዋቀከ እሸ ኸኻሼ፥ እከ ትከ ቁልቁሎተ ኬሎፐ ኣኔ። ዮሴፍ እሾ ማርያም ኔፎ፥ ኣተሴኔ አሴረ ድክሰኤ፥ እነሴኔ ቄዴን ከ ትከ ቁልቁሎተ ኬሎፐን ኩሌን። 28 ስትይ ኦር ስሞን እነሴኔ ሀዱኔ፥ ከ ዋቀ ከለተይሰዴ ከ ክዴ፥ 29 «ፖቀለይ፥ ኸሰሴ አአነ ዳሴ ኦር እድከዴ። አመ ኦር አነ ኦርኸይተሴ ኸይት ቴየዶ፥ አንከ ኬ ከፐ ነከይተን ኔሰዶ። 30 - 31 ድነሴ ኸይት፥ አፉለ ሰመይተ ፕሰ ቱረ ሀርምሴ እልደዮኔን አኬይ። 32 እሸ ኔፎ፥ ኦረ ኬን ኡፕንንእ፥ አዱካተይት ኡፕነኖ ኮደይ፥ ከ ሰመይሴ ኸይት አእስረኤልት ኔፎ ኡልፌነ ኮደይ።» 33 ዮሴፍ እሾ ኣያሶ ማርያም ኾር፥ ቆተ እነሴኔት ዴሰ ሃሰ ክደሜ ፕሶፐኤ ቀወውን። 34 ስሞን ኤቴ እሾነ ሰኬ ከመዬ፥ ኸው ዴሰ ማርያም ኣያፐ እነሴኔትት ክዴ፥ «እኖሴን አሬ ቸ፥ ፒተ እስረኤል ኦፐዬ ኦረ ሌከይተ ፐሀነ ፐቴተኤ ኮደን፥ ከ ኦረ ሌከይተኤ ፐሀነ ድነ ኮደን፥ ኡመ ኦረ ፕሰ እሸን ቴየዶ። 35 ሴ ምነን ድከተ ኦረ ሌከይተ ከረ ዴከዴ ለኮፐ ሶክሸ። ከርተይት ኔፎ፥ ኮረቴተ ኘረሀተኤ ካአ ከ ኦፐን ተርፐ።» 36 አክሞሴ ምነኤው፥ ኹመምፐይቴተ ተከ አቅማተ፥ ሰኜተ አሴርፐ ዴለቴ፥ ኤኔንተ ፈኑኤል እሽ ኪነኔ ቸ። መኻድ ኔፎ ሀነ ክደም። እሼተ፥ አኤኔንቱመኔ ኣፓድፐ ሄመምቴ ከ ኦል ፐረ ተፐ ከላቴ ከመዬ፥ ኣፓድ ቀረዬ ቶኤ። 37 ሴከመዬ ድኬ ቅምቴ ከ ሀከ ፐራድ ኩንደ ሴቴት አፉር ከይኖኤ አትከ ቁልቁሎተ ኬለ አፐርፐ ኪንንክንን መልይ፥ ቅንሴተ ከ ደምተ ሙሰተን ሀልኬተ ከ ኩያተ ኮደ ዋቀ ኮን። 38 ኦር ስትይ፥ እሼተ ኔፎ እዴቴው፥ ከ ዋቀ ከለተይሰተ ፐይቴ፥ ከ ቆተ እነሴኔት ዴሰ ኦረ ፒተ ዬሩሰሌም ኦፐዬ ኸሰሴ አድነ አሰኖ ፕሰ ቶርቴ። 39 ኤቴ ኣተሴኔ አሴረ ዋቀ ኦፐ ሌለሜ ፕሰ ድክሼን ከመዬ፥ ከተመሴኔ ኸይሾ አከላተ፥ ፒተ ኬልለ ከረ ቸ ኦፐ፥ ናስሬትፐ ቲተዌን። 40 እነሴኔከ ኮኮናዴን ከ ኩተዴን፥ ከ ኦኩመን እመካዴን። ዳሰተ ዋቀ ኔፎከ እሾተ ኦልይ ክተ። 41 ዮሴፍ እሾ ማርያም ፐረፐሮፐኤ ፓሌተ ፋስከ ኡልፌሰ ዬሩሰሌምፐ አን። 42 ዬሱስ ኤቴ ፐራድ ኩደንከ ለክ ከዬዬ፥ አከ ኣታሶ ምነኤ፥ ቶለይሾ ኬለዬ ፓሌተሴ ኡልፌሰ ኣኔ። 43 ኤቴ ፓሌተሴ ድከቴ እከ ትኮፐ ከላኔዬ፥ እነሴኔ ዬሱስ ዬሩሰሌምእ ሀሴን። ማርያም እሾ ዮሴፍ ኡመ፥ አከ ዬሱስ ዬሩሰሌም ሀሴ እንኡፕናኔ። 44 አኦረ ፕለ ኦል ከሌ እሾነ ፐሀናቴ ከ፥ ኤቴ ኩያተ ኩመ አን ነከዬን ከመዬ፥ ኦረ ኡኡፐን እሾ ደልተያሶ ከፐ እሸ ቆረተ ፐዬን። 45 መ ኾር ቆተ እሸ ደፔን መለ፥ ፒተ ዬሩሰሌም ኦፐ ቲተዌን፥ ከ እስከሞፐ እሸ ፈደ ኦሬን። 46 ከ ኩያተ ሴሰ ከመዬ፥ እሸ አትከ ቁልቁሎተ ኬለዬ ኮልሰምፐየሴኔ አፒተ ይሁደ ከረ ቃኤ ከ ሃሳሶ ደከይሰኖ ከ ካሱመ ኔፎ እሾነ ካሰኖ አኬን። 47 ኦረ ኦኩማድ እሾ አከ ካሱመ ኦርኖ አኬ ፕሰከ ኦፐ ቀወዌ። 48 ቶለይሾ ኤቴ እሸ አኬዬ፥ ኦፔ ቀዋዌ። ኣያሶከ እሽ ኪቴ፥ «አተ እነዮ፥ ማነኤ አሴ እኖ ኮቴ? አነ እሾ ኣፐይሽንከ ኬ ፖረ ፈደ ኬለ ድኬ ፐየሀኔ።» 49 ዬሱስከ እሾነ ኦርሼ ከ ክዴ፥ «አተ ማነኤ ፖረ አነ ፋንተን? አክመ ትከ ኣፕኖት ከላተ አነ ፋንቶ፥ እሽነ አኡፕተን ከ ፖረ አነ ፋንተኔ?» 50 እሾነ ኡመ ሃሰ እሸ እሾነ ኦርሼ እንኡፕናኔ። 51 ሴከመዬ ዬሱስ እሾተ ኦልይ ፒተ ናስሬት ኦፐ ከሌ ከ እሾነ ኔፎ አፈ ደከይን። ኣያሶ ኾር፥ ሴዴ ፕሰ ከርተ ከረኤው ቀፐቴ ከ ኦፐ ድከን። 52 ዬሱስ ኔፎ፥ ፉለ ዋቀ ከ ፉለ ነመ ቱረ አጫለተሜ ኮዴ ከ ኦኩመ ከ ኩቱምተን ኣኔ።
