ዮሀንስ 9

1ዬሱስ ኤቴ አኖዬ፥ ኣፐ ተከ አዴለዴ ዴሰ እልደን ቀፕንን አኬ። 2ተማሬወ ዬሱስከ ዬሱስ ካሰዴን ከ ክዴኔ፥ «ሄለ ኮልሰምፐይቶ፥ ኣፖሴ አዴለዴ ዴሰ እልደን ቀፕንን፥ ጩፖተ አይኖ ምነኔ አሴ ኮዴ? ጩፖተ መታድ ምነኔም ሞን አቶለይሾት ምነኔ?» 3ዬሱስከ እሾተ ኦርሼ ከ ክዴ፥ «ኣፐሴ ጩፖተ መታድ ታክ አቶለይሾት መለ እልደን ደፕኔ መ፥ አከ ኮደ ዋቀ እሸ ቀረ አካዶ መለ። 4አሌተ ኩያቴ ክቶፐኔው፥ ኮደሴ አእሰሴ አነ ኤርኬት ኮዴተ አነ ፋን፤ ማነ መለ፥ ሀልኬተ አኦፐዬ ነመ ተከ ኔፎ ኮደ ኮዴተን ኤተንንን ዴአይ። 5አንት አንፒተ ቀረ ቾዬ፥ አንለአይተ ፒተ።» 6ከ ኤቴ አሴ ክዴ ከመዬ፥ ፒቶፐ ሀንጩፍተ ቱፌ ከ፥ ፒተ እሾ ሀንጩፍተ ኦልን ለሄ፥ ከ ዶቄተሴትን እልደሴኔ አኣፐሴት ኦፐን ዳቴ። 7ከ ክዴ፥ «ኣኔ ከ ሃርተ ሴሌሆም ኪናኔፐ ጨቀዶ» (ሴሌሆም ክዴሴ ኔፎ አኤርከሜ ክዴተ።) ሴመለ ኣፐሴከ ኣኔ ከ ጨቀዴ ከ ፓተ አኬተ ፐዬ ከ ቲተዌ። 8ከንታድ እሾ ኦረሴ አዴዮ ቅንሰኖዬ እሸ አኬ እክዴ፥ «ኣፐሴ ኤዬ ኩቲኖ ከ ፖረ ፓተ ቅንሰኖ እሸኔ?» 9ኦረ ዴሞከ ኪን፥ «እሸ።» አዴሞከ ኪን፥ «እሸ ፐሀ መ እሸን።» እሸከ ክዴ፥ «አነ አሱ።» 10ኦረሴከ ኪን፥ «አተ ኸው አተ ፓተ አከ ኤተንሴ?» 11እሸከ እሾነ ኦርሼ ከ ክዴ፥ «ኣፐ ተከ ዬሱስ ኪነኔ፥ ዶቄተ ፖርጬ ከ እልዳፐ አነ ዳቴ፥ ከ አነ ክዴ፥ ‹ኣኔ ከ ሃርተ ሴሌሆም ኦፐ ጨቀዶ› አንከ ኣኔ ከ ጨቀዴ ከ ፓተ አኬተ ኤተንሼ።» 12እሾነከ እሽ ክዴኔዌ፥ «ኣፖሴ አመ አይሸዬ ቸ?» እሸከ ክዴ፥ «ፖረ ኦፐ ቾ አንት አንኡፖ።» 13ሴ ከመ ዴሰ ኦረሴከ ኦር ኣፐሴ እልደን ቀፕንን ፌሬሰዌወ ቱሮፐን ኣኔ። 14ኩያተሴ አኦፐዬ ዬሱስ ዶቄተ ፖርጬ ከ እልደ ኣፐስት ድንሼ ኩያተ ሰምፐተ አኦረ አይሁድ። 15ፌሬሰዌወ ከሱከ ኣፐሴ ካሰዴን ከ ክዴኔ፥ «አተ ፓተ አኬተ ኤተንሴ?» እሸከ ክዴ፥ «እልዳፐኤ አነ ዶቄተ ዳቴ፥ አንከ ጨቀዴ ከ ሴዴን ፓተ አኬተ ኤተንሼ።» 16ስትይ ፌሬሰዌወፐዬ ኦረ ዴሞ እኪን፥ «ኣፖሴ ሰምፐተ ኡልፌስንንቾይ፥ ነመ ዋቀ ከፐ ዴኤን።» ኦረ ዴሞከ ኪንው፥ «ከ ኩል ነመ ጩፖለይተ ኮዴ አተ ኮደዶስን ኦልሰ ፐሀ ኮዴተ ኤተንሸ?» ከ ሴመለ ለክእ ኦል ቅቴን። 17ከ ሴመለ አመ ኦሬኔው ከ ኣፐሴ ቱረን እልደን ቀፕንን ካሰዴኔው ከ ክዴኔ፥ «አት ኣፖሴ አኪንቶኤ እልደዮ አነ ድንሼ፥ ቆታድ ዴሰ ማነ ኪን?» እሸከ ክዴ፥ «አንት ኹመምፐይተን እሽ ኪን።» 18ሳረሴኔ አኦረ አይሁድ አክመ ኣፐሴ ዴዮ ቱረን እልዳን ቀፕንን፥ እልዳድከ ኩል እሽ ፐነሜን እንአመኔ። ከ ሴመለ ቶለይሾ ሀሌን ከ ካሰዴን 19ከ ክዴኔ፥ «ሄለ እኖሴን ኸይሽን አኪንተኔ ‹አዴለዴኔ ዴሰ እልደን ቀፕንን› ሴኔ እሾታ? አመ ኸው አተ ፓተ አኬተ ኤተንሼን?» 20ቶለሴ ኸይሾከ ኦርሼ ከ ክዴ፥ «እሸ አክመን እናኖ ከ አዴለዴ ዴሰ እልደን ቀፕንን እንኡፕነ፥ 21መ ኾር አመ አተ አክመ ፓተ አክኖ ከ አይኖ አክመ እልዳድ እሽ ድንሼ አንኡፕኖይ፥ እሸ ካሰደ። እሸ ነመ ቅሜይ፥ ቆታድ ዴሰ ሃሰወተ እኤተንሸይ።» 22ቶለሴ ኸይሾ ወ መለ አሴ ክዴ፥ ቆተ ሳረሴኔ አኦረ አይሁድ ፉሬን መለ። ሴዴ ኔፎ ሳሮሴን፥ ነመ ዬሱስእ ክርስቶስ ኪኖ፥ አከ አሌ ትከሴ አኦረ አይሁድ አቅንሴተ ኬለ ዳነኔኤ ቆተ ኦል ከሌን መለ። 23ሴመለው ቶለይሾ ክዴኤ፥ «እሸ ነመ ቅሜይ፥ እሸ ካሰደ።» 24እከ ኦፐ ኦሬኔው ከ ሴ ምነን ኣፐሴ ዴዮ ቱረን እልዳን ቀፕንን ሀሌን ከ እሽ ክዴኔ፥ «አት ዱካተ ሃሰወዶ ከ ሴዴን ዋቀ ኡልፌሴ፥ ነሞሴ አክመ ጩፖለይተ ኮዴ እኖ እንኡፕነይ።» 25ኣፐሴከ ክዴ፥ «አንት ነሞሴ አክመ ጩፖለይተ ኮዴ አንኡፖ መ፥ አክመን አንት ዴዮ ቱረን እልደ አንቀፕንን ከ አመ ፓተ አኬተ ኤተንሼ፥ ሴዴ ፐተን ኡፐ።» 26እሾነከ እሽ ክዴኔ፥ «ማነ ኬ ክዴ ከ አተ እልዳት ኬ ድንሼ?» 27እሸከ እሾተ ክዴ፥ «ዴዮኤዌን እሽነ ሌሌ፥ እሽነከ አደከይንአክንን፥ ኸዌ ማነ መለ አመ ደከየ ፋንተኔው? ሄለ እሽነ ከሱ ተማሬዋድ ኮደ ሄንተኔ?» 28እሾነከ ሚሮዴን ከ እሸ ክዴኔ፥ «አትእው ተማርታድ ኮዴ፥ ኸኖ እኖ አንአሙሴይ። 29ዋቀ አክመ ሙሴ ኦል ሃሰወዴ እንኡፕነ፥ መ ነሞሴ አይሸዬ አክመ ዴ አንኡፕኖ።» 30ኣፐሴከ እሾተ ኦርሼ ከ ክዴ፥ «እሸ አይሸዬ አክመ ዴ ቆተ እሽነ አኡፕንን መለ ኦረ ቀወን፥ መ ነሞሴ እሸ እልደዮ ድንሼ። 31ዋቀ አክመ ጩፖለየ ደከይንንክንን እንኡፕነ። መ ኾር ዋቀ፥ ነመ እሸ ፉሮ ከ ኤርከናድ ኮኖ ኦን ቸዬ፥ አክመ እሸ ደከይኖ እንኡፕነ። 32ሀከ ፒተ ኡመምቴ ፐየቴዬ አአፐር ክዴኔ፥ ‹ሀ ነመ ነመ አዴለዴ ዴሰ እልደን ቀፕንን ድንሼ ቸ› ኪነን ኦፍንን ደከይኔ። 33ነሞሴ ከትን ዋቀ ከፐን ዴንን ኪቴ፥ ሀ ስለ ዌ ተከ ኔፎ ኮዴተ ኤተንንን ሄኔ።» 34እሾነከ እሽ ክዴኔ፥ «አት ኬ አጩፖተን ዴለዴ፥ ሄለ ኬ እኖ ኮልሻ?» ከ ኦር ትከሴ አኦረ አይሁድ አቅንሴተ ኬለዬ አሌ እሸ ዳኔን። 35አክመ ኣፐሴ ዳኔን ዬሱስ እደከዬ ከ፥ ኤቴ እሸ ፈዴ ከ አኬዬ፥ እሽ ክዴ፥ «አት እክርስቶሴተሴ እነ ነመ ኮዴ አመኒ?» 36እሸከ ክዴ፥ «አተ እሸ አይኖ? አነ ሌሌ፥ እንእሸ አመነይ።» 37ዬሱስከ እሽ ክዴ፥ «ዴዮኤዌ እሸ አክቴ፥ እን አመ አሬ ኬ ኦል ሃሰወኖ እሸ።» 38እሸከ ክዴ፥ «ፖቀለይ፥ እንአመኔ።» ከ እሽ ሰከተዴ። 39ዬሱስከ ክዴ፥ «ሀ አንት ኦረ ፓተ አክንንክንን አከ አኮ፥ አአክኖ ኔፎከ ጮሎኤን ፒሴ ቀሮፐ ሃሰ ሙረኤ ዴኤ።» 40ስትይ ፌሬሰዌወ አዬሱስ ከፐ ቾከ ዬሱስ ክዴ፥ «እኖ ኔፎ አንእልደን ቀፕኖ ፔከ?» 41ዬሱስከ እሾነ ኦርሼ ከ ክዴ፥ «ሀ ከትን አእልደ አቀፕንን ኪቴዬ፥ ጩፖተ እሽን ቀረ ኮድንን ሄኔ፤ ኡፍ አመ እሽነ እኪንተኔ ‹እንአክንነ› ከ ጩፖተይሽነን ሀስቴን።»

will be added

X\