ዮሀንስ 6

1ሴከመዬ ዬሱስ ፐከቴተ አኬልለ አትፕረዶስ እሽ ኪነኔዬ አፈ ድስ ኦፐ ቱሌ። 2ኦረ ሌከይተከ፥ ቆተ ዬሱስ ፓቆለየ ድንሼ እከ ኮደዶሴን ኦልሰ ፐሀ አኬን መለ፥ ዬሱስ ከመ ኣኔን። 3ዬሱስከ እሮተ ቀሮፐ ፈየዴ ከ ተማሬዋድ ኦል ኤዬ ቃኤ። 4ስትይ ፓሌተ ፋስከ አይሁድ ኬለኤ ፎልሰቴ። 5ኦረ ሌከይተከ እሸ ከፖፐ ዴን፥ እከ ኤለ ክዴ ከ ሰመይተሴ እሸ ከፖፐ ዴኖ አኬ ከ ፍልፖስእ ክዴ፥ «አይሸዬን ደምተ ኦሮሴ ፕሰ ቀረ ከይቶ ፕድነ?» 6ዬሱስ እን አአሴ ክዴ ከ ሃሰወዴ ፍልፖስ ኤከይሰተኤ አሴ ክዴ ዲሼይ፥ ወ ኮደ መታድ እኡፐ። 7ፍልፖስከ ኦርሼ ከ ክዴ፥ «ከድ ፑኑ ፕሬተ «ፕሬተ» ድፐ ለክን ላቆተ ፕደን ከ ኦፐ ሞሰን ከ እሾነ ሸሸከይቴተ ቆተን ኔፎ፥ እሾነ ቀረን ከይቶ።» 8ተማሬዋድፐዬ እናፐ ስሞኔተሴ ፔትሮስ ክደሞት፥ እንትርያስ እክዴ፥ 9«ሀ እነ ላቆተ ፖርተ ኬን ከ ሙርኩጨ ለክ ቀፐኤ አሬ ቸ፥ መ ሴዴ ማነ ሰመይሴ ፕሰ ቀረ ኔስሰ?» 10ዬሱስከ ክዴ፥ «ሰመይሴ ፒቶፐ ኩቲሸ።» ፖሮሴ ኔፎፐዬ ማንተ እመኬ። ኦረሴ ኤዬ ቾ ኦፐዬ ሀምየ ነመ ኩመ ኬን ምነኤ ቻን። 11ሴ ከመዬ ዬሱስ ላቆተሴ ቄዴ ከ ቀረ ከለተይሰዴ ከ ኦረሴ ኩኩቴኤት ቆቴ። ከ አሴው ሙርኩጨሴ እሾነ ቆቴው። ነመ ፕሰከ አከ አሄኖ ምነ ክቶ አከዴ። 12ኤቴ ኦረ ፕሰ ደሜ ከ ዱተኔ ከመዬ፥ ዬሱስ እተማሬዋድ ክዴ፥ «ሞሶወ ኬለ ሀሴ አተከ ኔፎ ኬለዬን ሀስንን መል ኦሎፐ ፖሀ።» 13እሾነከ ላቆተሴ አፖርተ ኬን አኦረ ደሜ ኬለ ሞሶወ ሀሴ ኦሎፐ ቄዴን ከ፥ ሰተረ ኩደንከ ለክፐ እመኬን። 14ኦረሴ ኤቴ ዌሴን ኦልሰ ፐሀ አዬሱስ ኮዴ አኬዬ እክዴ፥ «እን ዱካተኔን ኹመምፐይተሴ ኪናኔ ፒተ ቀሮፐ ዴአ።» 15ኦረ እሬተኔ ዬሱስ ኑቁሰ ኮደ ፋን፥ እሸከ ሴዴ ኡፕናዴ ከ ኸዋት አሌ እሮተ ቀሮፐ ፈየዴ። 16ኤቴ ሌተ ሽሽጵቴዬ፥ ተማሬዋድ ፐከቴተ ኬልለ ኦፐ ኸተ ሌከዴን፥ 17ከ ኮንከፐ ቃኤን ከ ቅንደ ከተመ ቅፍርነሆም ኦፐ አንተ ኼን። ስትይ ሌተ ቱከንተ፥ ኡመ ዬሱስ አተ እሾተ ከፖፐን ዴኔ። 18ቆተ ፑፔተ ሀርሞ ኮፕቴ መለ፥ ፐከቴተሴ ኦልኬለኔ የቅየቅን። 19ተማሬወሴኔከ ኤቴ ኮንከን ክሎሜትሬተ አፉር ታክት ኬን ምነ ክቶ ፐከቴተሴ ቀረን ዴሰ ኣኔን ከመዬ፥ ዬሱስ አፕሸ ቀረን ዴሰ ሎቀን አኖ ከ ፐከቴተሴ ቀረን ዴሰ እሾነ ከፖፐ ዴኖ አኬን ከ ፉሬን። 20እሸ ኡፍ እእሾነ ክዴ፥ «አነይ፥ እንፉረን።» 21እሾነከ ኸሰን እሸ ቴየዴን ከ ኮንከ ከሮፐ እሸ ፈይሼን። ኮንከሴኔ አእሽን አናኔከ ኤኖው ፖረሴ አኦፐ አናን ኦፐ ከዬን። 22ፐረይታድይ ኦረሴ ፐከቴተ ከፐ አፈ ድስት ሀሴ፥ አክመ ኮንከ ተከን ፐተው ፐከቴተ ቀረ ቻኔ አኬን፥ ከ አክመ ተማሬወ ዬሱስ ኸዋት ኣኔን፥ ዬሱስከ እሾነ ኦል ኮንከ ከረን ክንን ኡፕናዴን። 23አኮድቶመ ኦረ ኮንከደን ፐሌተ ትፕረዶስት ዴሰ ኼ ከ፥ ፖረሴ አኦፐ ዬሱስ ቅንሴተ ከለተ ኮዴ ከ ኦረ ሌከይተከ ኦፐዬ ደምተ ደሜ ከፖፐ ዴ። 24ኦሮሴ ኤቴ ዬሱስ እሾ ተማሬዋድ ኤዬ ደፔኔዬ፥ ኮንከደሴኔትን ዬሱስ ፈደ ከመኤ ፒተ ቅፍርነሆም ኦፐ ኣኔን። 25ከ ኤቴ ፐከቴቴ አፈ ድስት እሸ አኬኔዬ፥ እእሽ ክዴኔ፥ «አተ ኮልሰምፐይቶ፥ አይተም አሬፐ ዴቴ?» 26ዬሱስከ እሾነ ኦርሼ ከ ክዴ፥ «አንት ዱካተኔን እሽነ ኪን፥ እሽነ ቆተ ላቆተ ደምቴን ከ ዱተንቴን መለ አነ ፖረ ፋንተን ዲሼይ፥ ቆተ ኮድዮ አኦልሰ ፐሆ እሽነ ከሌ መለን። 27እሽነ ደምተ አፐተ ፐንቶ መለን ያለን። ሴከፐዬ ደምተሴ ቻተ ፐረፐረ ዳንቶ መለ ያለ። ደምቶሴ ኔፎ እነ ነመ እእሽነ ዳሸን፥ ሴዴ ኔፎ፥ ቆተ ዋቀ ኣፐ ኮደ እናድ አከ ዱካተ ኮዴ አክሼ መለ።» 28ኦረሴከ እሽ ክዴ፥ «ኸው ኮደ ዋቀ ኮዴቴኤ ማነ ኮዴተ እኖ ፋን?» 29ዬሱስከ ኦርሼ ከ ክዴ፥ «ሀ ኮደ ዋቀ፥ እሰሴ አዋቀ እሸ ኤርኬ አመኔተ።» 30እሾነከ እሽ ክዴኔ፥ «አከን እኖ ኬ አመኖኤ፥ ኮደ ኦልሰ ፐሆ አአተ ፐሆ ኮተ ከ ማነ እኖ አክሰ? 31አክመ መታፈ ቁልቁሎተ ኦፐ ታፈምቴ ከ ኪንቶ ‹አከ ደመኔኤ ሞንቴ ኸተ እሾነ ላቆተ ዳሼ› ምነኤ፥ ኣፐዳኖ ኮመይቶፐ ደምተ ሜነ ኪናኔ ደሜን።» 32ዬሱስከ ክዴ፥ «አንት ዱካተኔን እሽነ ኪን፥ አሞንቴ ኸተ ደምተ ዱካተ እሽነ ዳሼ ሙሴን፥ መ አሞንቴ ኸተ ደምተ ዱካተ እሽነ ዳኖ ኣፕኖ። 33ደምተሴ አዋቀ ዳኖ ኔፎ፥ እሰሴ ሞንቴ ኸተ ዴንቶ ከ ኦረ ፒተት ቻተ ዳንቶ።» 34ሴመለ ኦር ኦረሴከ ኦርሼ ከ ክዴ፥ «ፖቀለይ፥ ደምተ አሴ ፐሀቶ አውተ ፕሰ እኖ ዳሼ።» 35ዬሱስከ እሾነ ክዴ፥ «ሀ ደምተ ቻተ አነ። ነመ አነ ከፖፐ ዴኖ ለመተ እንዶኾ፥ ኡመ ነመ አነ አመኖ ለመተ እንዴፖዶ። 36እሽነ ኡፍ እአነ አክቴን፥ መ አነ አአመኔን እሽነ ኪን። 37ነመ አኣፕኖ አነ ዳሼ ፕሰ አነ ከፖፐ ዴን፥ ኡመ ነመ አነ ከፖፐ ዴኖ አንአሌ እስከፐ ለኮፐ አንዳኖ። 38ማነ መለ፥ ወ ኣፕኖ ጫለነ ቀረ ኮዴተ መለን ሞንቴ ኸተ ሌከዴ ዲሼይ፥ ኸዮ ቀረ ኮዴተ መለን። 39እሰሴ አነ ኤርኬ ኔፎ፥ አከን እሰሴኔ አእሸ አነ ዳሼ ኦፐ ተከ ኔፎ አንፐትንን ከ፥ ፕረንፕረ ቀረዬ ኔፎ አከን ቶቶፐ እሾነ ኻሾ ጫለን። 40ኣፕኖ፥ ነመ እናድፐ ቶየኖ ከ እኖሴን ኻድ አመኖ፥ አከ ቻተ ፐረፐረ አከዶ ጫለንይ፥ አንት ኔፎ ኩያተ ፕረምፕረትይ ቶቶፐ እንእሸ ኻሸ።» 41ሴመለ ዬሱስ ሴዴ አክዴ፥ «ደምተ ሞንቴ ኸተ ዴቴ፥ አነ» መለ ኦረ አይሁድ እሸ ኬለ ቆጭቆጬ 42ከ ክዴ፥ «እን እነ ዮሴፍ ዬሱስይ፥ አንከ ኣፐይሾ ከ ኣያሶ ኡፕነይ፥ አተ ኪን፥ ‹አንት ሞንቴ ኸተን ዴኤ›?» 43ዬሱስከ እሾነ ኦርሼ ከ ክዴ፥ «ኦልቀረን ቆጭቆጨን። 44ነመ፥ ኣፐሴ ኸኖ አነ ከፖፐ ኤርኮ መልይ፥ ነመ አነ ከፖፐ ዴነ ኤተንሾ ተከ ኔፎ እንቾ፤ ነመ አነ ከፖፐ ዴኖ ኔፎ፥ አንት ኩያተ ፕረምፕረትይ ቶቶፐን እሸ ኻሸ። 45መታፈ ኹመምፐየ ኦፐ እታፈምቴ ከ ኪን፥ ‹ኦረ ፕሰ ዋቀ ከፐ ተማሬተ ኮለደ።› ሴመለ ነመ ዋቀ ኣፐ ቀረ ደከዬ ከ ኮለዴ ፕሰ አነ ከፖፐ ዴን። 46ሴ ክዴሴ ኔፎ፥ ነመ ዋቀ ኣፐ አኬ ቸ ክዴተኔ መ፥ አዋቀ ኣፐ ከፐ ዴ ፐተው እሸ አኬ። 47አንት ዱካተኔን እሽነ ኪን፥ ነመ አነ አመኖ ቻተ ፐረፐረኤ ቀፐ። 48አንት አንደምተ ቻተ። 49ኣፐዳስን ኮመይቶፐዬ ሜነ ደሜኔ መ እሌኤን። 50መ ኾር ነመ ደምቶሴ አሬ ክቶ ደሞ፥ ለመተ እንቶ። ደምቶሴ ኔፎ፥ ደምተ ሞንቴ ኸተ ዴቴ። 51ደምተ አቻተ አሞንቴ ኸተ ዴቴ፥ አነ፤ ነመ ደምቶሴ ኦፐ ደሞ ፕሰ ሀከ ፐረፐረት ከላደ። ደምቶሴ አንኦረ ዳሾ ኔፎ ሶአዮ፥ አንቻተ ኦረ ፒተ መለ ዳሾ።» 52ስትይ ኦረ አይሁድ ኦል ሺሸ ፐዬ ከ ኪን፥ «ነመሴ አተ ሶአድ እኖ ዳሰተ ኤተንሸ፥ አንከ ደመ?» 53ሴመለ ዬሱስከ እሾነ ክዴ፥ «አንት ዱካተኔን እሽነ ኪን፥ እሽነ ኦን ሶአሴኔ (አክርስቶሴተሴ) አእነ ነመኤ አደምንይ፥ ከ ዲካድ አእክንንይ፥ እሽነ ፐከነ ቻተ አቀፕናተን። 54ነመ ሶአዮ ደሞ ከ ዲከዮ እክኖ ፕሰ ቻተ ፐረፐረኤ ቀፕናደ። አንት ኔፎከ ኩያተ ፕረምፕረት ቶቶፐን እሸ ኻሸ። 55ማነ መለ፥ ሶአዮ ደምተ አዱካተ፥ ዲክዮ ኔፎከን እከይተ አዱካተኤይ። 56ነመ ሶአዮ ደሞ ከ ዲክዮ እክኖ ፕሰ፥ አነ ኦል ከላደ፥ አንት ኔፎከ እሸ ኦል ከላደ። 57አክመ ዋቀ ኣፐ፥ እሰሴ ቻተምፐይተ ኮዴ አነ ኤርኬ፥ አንትከ እሽን ቻተ ቀፖ ምነኤ፥ ነመ ሶአዮ ደሞ ፕሰ ቻተ አነን ቀፕናደ። 58ሴመለ ኦር ደምቶሴ ሞንቴ ኸተ ዴቴ እን እሼተ፥ ኡመ ደምቶሴ አኣፐዳስን ደሜን ምነን ፐሀቶ። ማነ መለ፥ ኦረ ደምተ አኣፐዳስን ደሜን ደሜ እሌ፥ መ ኾር ነመ ደምቶሴ አሬ ክቶ ደሞ፥ ሀከ ፐረፐረት ከላደ።» 59ዬሱስ አፒተ ቅፍርነሆምት ትከሴ አኦረ አይሁድ አቅንሴተ ኬለ ኮልኖዬ፥ ዌሴን ሃሰወዴ። 60ተማሬዋድፐዬ፥ ኦረ ሌከ ኤቴ ዎሴን ደከዬኔዬ፥ እክዴኔ፥ «ሃሶሴን እኮኮክይ፥ አይኖ ኤተንሸ?» 61ዬሱስ ኔፎ አክመ ተማሬዋድ ሃሶሴን መለ ቆጭቆጬኔ ኡፕናዴ ከ እሾነ ክዴ፥ «ሄለ ሃሶሴን ቀረ ቁመቴኔ? 62ሄለ አውተ እነ ነመ ፖረ አኸተ ኦፐ ከለኔፐ ኦረን ከ ሞንቶፐ ፈየነን አከ አክተኔዬ፥ አተ ኪተኔው? 63አቻተ ነመ ዳኖ ሀፑረ ዋቀ ዲሼይ፥ ሁፕነ ነመ ዌ ኮደ ኤተንንንቾ፤ ቃሌቶሴ አንአንት እሽነ ሌሎ፥ አሀፑረ ቻተ ዳንቶ። 64መ ኾር እሽኖፐዬ ኦረ ዴሞ አሴዴ ዱከይሰንንክንንእ ቸ።» ዬሱስ ወ መለ ሴዴ ሃሰወዴ፥ ኦረ አኻሜ አክመ እሸ አመንንክንን ከ ነመ አኻሜ አክመ ቶተ እሸ ተርፕሾ ከ እሸ ዳሾ ቆተ ፐዮተ ቀረዬው ኡፖ መለ አሴ ሃሰወዴ። 65ሴከመዬ ዬሱስ እክዴ፥ «ሴመለን ቱረኔው እሽነ ሌሌ ከ ክዴ፥ ‹ነመ አዋቀ ኣፐ አነ ከፖፐ እሸ ኤርኮ መል፥ ነመ ተከ ኔፎ አነ ከፖፐ ዴነ እንኤተንሾ።› » 66ሴ ምነን ተማሬዋድፐ ኦረ ሌከይተከ አሌ እሸ ከመ ቲተዌ ከ አውስት ዴሰ እሸ ኦል አንተ ዲሼ። 67ዬሱስከ ሴመለ ተማሬወሴኔ ኻድ ኩደንከ ለክ ክዴ፥ «ሄለ እሽነ ኔፎ አንተ እሄንተኔዌ?» 68ስትይ ስሞኔተሴ ፔትሮስ ክደሞከ ክዴ፥ «አተ ፖቀለይ፥ እኖ አይኖ ከፖፐን አነ? ሀ አት ቃሌተ አቻተ ፐረፐረ ዳንቶ ቀፕተ። 69እኖከ አክመ አት እሰሴ ቁልቁልተ አዋቀ ኮዴ ኮድቴ ኔፎ ኡፕናኔ ከ አመኔ።» 70ዬሱስከ እሾነ ኦርሼ ከ ክዴ፥ «አንት እሽን ኩደንከ ለክን ሬኸዴኔ? መ እሽኖፐዬ ነመ ተከ ሴተነ።» 71ሴዴ ኔፎ ቆተ እነሴኔ አስሞን አስቆሮተውተሴ ይሁደ ክደሞ ዴሰ ሃሰወዴ። ይሁደ ከድፑኑ ተማሬዎሴን ኩደንከ ለክፐዬ ተከ ኮዴ ኔፎዬ፥ አኩል ዬሱስ ተርፕሾ ከ ቶተ ዳሾ እሸ።

will be added

X\