ዮሀንስ 5

1ሴከመዬ ፓሌተ ኦረ አይሁድእ ቸ፤ ዬሱስከ ዬሩሰሌምፐ ኣኔ። 2ዬሩሰሌምይ ሃርተ ተከ አፈ እፕረውትን ፔቴሰይደ «ፔቴሰይደ» ክደምቶ ከ፥ አሻከ ኬን ከፐ ቻኔ ቸ፤ ኻረ ተከ ኻረ ከህረ ክደሞ ኔፎከ ከፐዬ ቸው። 3ፓቆለየ ሌከየ እሾ ኦረ እልደን ቀፕንን ከ ኦረ ሄኬሎ እሾ ቶጰየከ፥ ሻከሴኔ ኬለ ሙኬን፥ [ከ ሀከ ፕሸሴኔ ሌሌህናን ከረኤ አሰን። 4አውተ ዴሞዬ ኤርከምፐቶተ ዋቀ እዴን ከ ፕሸሴኔ ኦፐ ሌሌህን። ኦቶ ፕሸሴኔ ኦልኬለን ሌሌሀን ከመዬ፥ ነመ ፐዮተ፥ ሃርተሴ ኦፖፐ ኸተ ሌከዶ ዴሳድ ፕሰ ኬለ ድን።] 5ስትይ ነመ ተከ ፐረ ኩንደ ሴሰ ሴቴ ፓቄከ ኤዬ ቸ። 6ዬሱስከ እሸ ኤዬ ሙኬ አኬ፥ ከ አከ ኸተው ፓቆፐኤ ፐረ ሌከየ ጨሬ ኡፕናዴ፥ ከ እሽ ክዴ፥ «ድነ እሄንታ?» 7ፓቆለይተሴከ ክዴ፥ «ፖቀለይ፥ ኦ ፕሸ ሌሌህናኔዬ፥ ነመ ሃርቶሴ ኦፖፐ ኸተ አነ ሌክሾ አንቀፖ፤ ኦን ኸተ ሌከተ ኪኖዬ፥ ነመ ፕለኤ አነ ቀትን ከ ኦፖፐ ሌከን።» 8ዬሱስከ እሽ ክዴ፥ «ኼ፥ ከ ቆላት ኸይሰዶ ከ ኣኔ።» 9ኣፐሴከ ኤኖው ድኔ ከ ቆላድ ቀፐዴ ከ አንተ ፐዬ። ኩያቶሴ ኔፎ ኩያተ አሰምፐተ አኦረ አይሁድ። 10ሴመለ ኦረ አይሁድከ ኣፐሴ ድኔት ኪን፥ «አዌ ሌተ ሰምፐተይ፥ ቆለ ሃደተ ኬኤን ፈቀተሜ።» 11እሸ ኡፍ እእሾነ ክዴ፥ «ኣፐ አነ ድንሼ አነ ክዴ፥ ‹ቆላት ኸይሰዶ ከ ኣኔ።› » 12እሾነከ እሸ ካሰዴን ከ ክዴኔ፥ «አኬ ክዴ፥ ‹ቆላት ኸይሰዶ ከ ኣኔ› አይኖ?» 13ኣፐሴ ድኔ ኾር፥ ቆተ ኦረ ኤፐ ኩት መለ፥ ዬሱስከ ፖረሴ ኦፐዬ ፖረ ፕለ ኦፐ ኣኔ መለ፥ ነመ እሸ ድንሼ አይኖ አክመ ኮዴ እንኡፕናኔ። 14ሴከመ ዬሱስ ትከ ቁልቁሎተ ኬለኤ ኣፐሴ አኬ ከ እሽ ክዴ፥ «አመ ኦር እድንቴይ፥ ወ ሴ ቀረ ቀፐ አከ ኬ ቀረኤን ዴንንእ፥ አመ ዴሰ ጩፖተን ኮደን።» 15ኣፐሴከ ኣኔ ከ ነመሴ እሸ ድንሼ አክመን ዬሱስ፥ ሳረ ፒተ አይሁድት ሌሌ። 16ቆተ ዬሱስ ኮዶሴ ኩያተ ሰምፐተት ኮዴ መለ፥ ሳረሴኔ አኦረ አይሁድ ዬሱስ ረከቺሰ ፐዬን። 17ዬሱስከ እሾነ ኦርሼ ከ ክዴ፥ «አኣፕኖ አውተ ፕሰ ኮደ ኮኖ መለ፥ አንት ኔፎ አሴዌን ኮን።» 18ሴዴ አዬሱስ አሴ ክዴ፥ ሳረሴኔ አፒተ አይሁድ አኩተት አከ ዬሱስ እሸኔ ኼን። ሴዴ ኔፎ፥ ቆተ ሴረ ሰምፐተይሾት ከመ ደፔ ፐተ መለኔ መ፥ ቆተ ዋቀ «ኣፕኖ» ክዴ ከ ዋቀ ከፐኤ እስ ድኬ መለ። 19ዬሱስከ እሾነ ኦርሼ ከ ክዴ፥ «አንት ዱካተኔን እሽነ ኪን፥ እነ ዋቀ፥ ወ ዋቀ ኣፐ ኮኖዬ አኬኔ ኮዴተ መል ሁፕነይሾትን እስን ዌ ተከ ኔፎ ኮንንቻን። ወ ዋቀ ኣፐ ኮነ እነ ዋቀ ኔፎ ሴኔው ኮን። 20ማነ መለ፥ ዋቀ ኣፐ እናድ ጫለን ከ ወ ኮነ ፕሰ እሽ አክንይ፥ ከ አከ እሽን ቀወሶኤ ዋቀ ኮደ ሴ ቀሮፐ ቀፖ እናድ አክሸ። 21ዋቀ ኣፐ አክመ ኦረ ሌኤ ቶቶፐ ኽእኖ ከ ቻኖ ምነኤ፥ እነ ዋቀ አክሞሴ ምነኤው ኦረ አሄኖ ቻተ ዳሸ። 22ዋቀ ኣፐ ነመ ተከ ኔፎ ቀረ ደፐ ሙርንቾ፥ መ ሁፕነ ኦረ ቀረ ደፐ ሙሬተ ፕሰ እናድእ ዳሼ። 23ሴ ኔፎ ወ መለ አሴ ኮዴ፥ ኦረ ፕሰ፥ አክመ ዋቀ ኣፐ ኡልፌስኖ ምነኤ፥ አክመ እነ ዋቀ ኡልፌሶ መለ። ነመ እነ ዋቀ ኡልፌስንንክንን፥ ዋቀ ኣፐ፥ እሰሴ እናድ ኤርኬ ኔፎ ኡልፌስንንቾ። 24«አንት ዱካተኔን እሽነ ኪን፥ ነመ ቃሌትዮ ደከይኖ ከ እሰሴ አነ ኤርኬ አመኖ ቻተ ፐረፐረኤ ቀፐ፥ ከ ቶቶፐ ዴሰ ቻተፖፐ ቱሌይ፥ ደፐ እሸ ቀረኤን ሙረሞ። 25አንት ዱካተኔን እሽነ ኪን፥ ክሴተ አኦፐዬ ኦረ ሌኤ ኔሰ እነ ዋቀ ደከዮ ዴአ። ክሴሴ ኔፎ አመይ፥ ኦረ እሸ ደከይኖ ፕሰከ ቻተ ቀፐ። 26ማነ መለ፥ ዋቀ ኣፐ አክመ መታድ ፓደ ቻተ ኮዴ ምነኤ፥ አሴ እናድ ፓደ ቻተት ኮዴ። 27ከ ቆተ እነ ነመ «እነ ነመ» ኮዴ መለ፥ አከ ደፐ ከ ዱካተ ሙሮኤ ሁፕነ ኡኩሜተ እሽ ዳሼ። 28ሴዴ እሽነን ቀወንን። ማነ መለ፥ ሳቴተ አኦፐዬ ኦረ ሀውለ ከረ ቾ ፕሰ ኔሳድ ደከዮ ዴአይ፤ 29ኦረ ኮደ ፈየ ኮዴከ ቶቶፐዬ ኸ ከ ቻደ፤ ኦረ ኮደ አኔቀ ኮዴ ኾር፥ ቶቶፐ ኸ ከ ደፐከ እሾነ ቀረ ሙረመ።» 30«አንት እስን ዌ ተከ ኔፎ ኮዴተ አንኤተንሾ። መ ኾር አከን ኣፕኖ ቀረ ደከዬ ምነኤን ደፐ ከ ዱካተ ሙረ። ቆተ አንኸዮ ቀረ አንኮንአንክንን ከ አኣፕኖ አአነ ኤርኬ ቀረ ኮኖ መለ፥ ሃሰን ሙረ ዱካተ። 31አንት ኦን ቆትዮ ዴሰ ማኩምይ፥ ማኩምዮ ዱካተን። 32መ ኾር አቆትዮ ዴሰ ማኩሞ ፕለይተ ቸ። ወ እሸ ቆትዮ ዴሰ ማኩመ አክመን ዱካተ አንት ኔፎ እንኡፐ። 33እሽነ ዮሀንስ ከፖፐ ኦረ ኤርክቴን፥ እሸከ ቆተ ዱካተት ዴሰ ማኩሜ። 34ሴ ኔፎ አክመ እሽነ ድንተን መለ ዲሼይ፥ ቆተ ማኩመ ነመ አነ ፐርፓችስኖ መለ አሴ አንኪኔ። 35ዮሀንስ አከ እፕሰ ኦፐይነ ከ ለአይነ ምነኤ ኮዴ፤ እሽነከ እፕሶሴን ኻድን ሸከይቴተ ኸሶተ ሄናቴን። 36አንት ኡፍ ማኩመ አዮሀንስ ቆትዮ ዴሰ ማኩሜ ቀረን ቀፖን ቀፐ፤ ሴ ኔፎ ኮደ ኣፕኖ አነ ዳሼ ከ ክዴኤ ‹ኮዴ› እሸን ማክትዮ፥ ከ አከን ኣፕኖ ከፐ ዴኤ አክን። 37ኣፐሴ ኸኖ አነ ኤርኬ፥ እሸ መታድ ቆትዮ ዴሰ ማኩሜ፤ እሽነ ኡመ አአፐር ኔሳድ አደከይኔ ከ አፐር እሸ አአክኔ። 38እሰሴ አእሸ ኤርኬ ቆተ እሽነ አአመንአክንን መለ፥ ቃሌታድ እሽን ከረን ክቶ። 39እሽነ ቆተ አመታፈ ቁልቁሎወትን ቻተ ፐረፐረ አከተን እሽነ ፐሀቶ መለ፥ መታፎሴኔፐዌ ቶይንተን። መታፎሴን ኤዬ ቸ ኔፎ፥ ቆትዮ ዴሰ ማኩም። 40አኮድቶመ፥ እሽነ አምክ ቻተ አከተኤ አነ ከፖፐ ዴነ አሄንተን። 41«አንት አን ነመ ቀረ አንኡልፌነ አንፋንአንቾ፥ 42መ ኾር አንት እንእሽን ኡፐ፥ ከ አሬኔው አክመ እሽነ ዋቀ አጫለንአክንን ኔፎ እንኡፐ። 43አንት መኸ ኣፕኖትንን ዴ መ፥ እሽነ አአነ አቴየኔ። መ ኾር፥ ነመ ፕለ አእሴታድን ዴኖ እቴየንተን። 44አተ እሽነ ኡልፌነ ኦልቀረዬ አከተ ፋነ ከ ኡልፌነ ዋቀ ተከይተ ከፐ አከኖ ቲቴ፥ አተ አነ አመኔተ ኤተንሰን? 45አንአንት ኣፕኖ ቱረ እሽን ኸሰሶ እሽነኤን ፐሀናንን። አእሽን ኸሰሶ ሙሴሴ አክፐንተኔይ። 46ሀ ከትን ሙሴ አመንቴን ኪቴዬ፥ እሸ ቆትዮ ዴሰ ታፌይ፥ አነ ኔፎ አመን ሄንቴን። 47ኦን ወ ሙሴ ታፌኤ አአመንአክንንይ፥ አተ ቃሌትዮ አመንተን?»

will be added

X\