ዮሀንስ 2

1ሌተ ሴሰተት፥ ከተመ ተከን ፒተ ኬልለ ከረ ቸ ቃነ ኪናኔ ከረ ሄምተ ቸ። ኣያፐ ዬሱስ ኔፎ ትከሴ አሄምተት ክተ። 2ዬሱስ እሾ ተማሬዋድ ከሱ ሄምተሴ ኦፖፐ ሀላሜን። 3ኤቴ ተጬተ ወይኔተ ፕረምቴዬ፥ ኣያፐ ዬሱስ እዬሱስ ኪቴ፥ «ሀ ተጬተ ወይኔተ እንቀፐን።» 4ዬሱስከ እሼተ ክዴ፥ «አት አዬ፥ ማነኤ አነ ፐየህን? ክሴትዮ እንዴሀኔይ።» 5ኣያሶከ ኦርኸየ ኪቴ፥ «ወ እሽነ ክደ ኮደ።» 6ኦረ አይሁድ፥ ቆተ ኣተ ጨቀይሱመ አመንቴተይሾት ቀፐን መለ፥ ካኔወ አደከፐ ኮደሜ ሌህ ኤዬ ቸ። ካኔዎሴን «ካኔተ» ኔፎ እስምነኤ ኦክተ ፕሸ ለመይቴተ ለክ ለክ ቶክን ሴሰ ሴሰ ቀፕን። 7ዬሱስከ ኦርኸየሴኔት ክዴ፥ «ካኔዎሴኔፐ ፕሸ እመከ።» እከ እመኬን ከ አፋፐን ከከዬን። 8ዬሱስከ ክዴ፥ «ኦር ሙደ ከ ሀክተ ዳሸ።» እከ ዳሼን። 9እሸከ ፕሸሴኔ ተጬተ ወይኔተ ኦፐ ፑርሰሜ ሎከዴ፥ ኡመ ተጬሴ ፖረ እሽ ዴቴ እንኡፕናኔ፥ ኦርኸየ ፕሸሴኔ ሙዴ ኾር እኡፐን። ኤቴ ሎከዴዬ፥ ሀክተሴ ኣፐሴ አሄምተኤ ሀሌ ከ እሽ ክዴ፥ 10«ሀ ኦረ፥ ፐዮተ እቄን ከ ተጬተ ወይኔተ አፐኻረ ዴሀን ከ፥ ኦ ኦረሴ ደምተ ሀላሜ ማሾዶ ከመዬ ኩል፥ አኔቀ ዴሀን፥ አት ኾር ታጬተሴ አወይኔተ ፐኻረ ከመኔ ኦርሴ?» 11ዬሱስ ፒተ ኬልለት ከተመ ቃነ ከረ ወ ኦልሰ ፐሀ «ወ ኦልሰ ፐሆ» አፐዮተ ኮዴ ከ ኡልፌናድ አክሼ። ተማሬዋድ ኔፎከ እሸ ዱከይሰዴን። 12ሴከመዬ ዬሱስ ኣያሶ ከ ሄላሶ እሾ ተማሬዋድ ኦልይ ከተመ ቅፍርነሆም ኦፐ ኸተ ሌከዴ ከ ኤዬ ኩየወ ለመየ ጨሬ። 13ቆተ ፓሌተ ፋስከ አኦረ አይሁድ ኬለ ፎልሰቴ መለ፥ ዬሱስ ከተመ ዬሩሰሌም ኦፐ ኣኔ። 14ከ ኦረ ትከ ቁልቁሎተ ከረዬ ኾርመደ ከ ከሀረ ከ ኤሌለ ከተኖ እሾ ኦረ ኤዬ ኮደቴተ ፑርሰተ ቀኤ አኬ፥ 15ከ ቀጬተ ወተሮተ ሀርምሰዴ ከ ኦረሴ ፕሰ እሾ ከህረ ከ ኾርመደሴኔ ትከ ቁልቁሎተ ከረ ዳኔ። ከ ኦረሴ ኮደቴተ ፑርሰኖ ቱረ አሌ ኮደቴተ ፍዴ ከ ተረጴሰይሾ አሌ ከከርከልሼ። 16ከ ኦረ ኤሌለ ከተኖት ክዴ፥ «ሴኔን አሬ ከረ ሶከ ከ ትከ ኣፕኖ ኡርመለኤን ኮደን!» 17ስትይ ተማሬዋድ ኦር እሰሴ ታፈምቴ ከ ኪንቶ፥ «ቆተ ትከይትት ዴሰ ጫለለ አአፕተ ምነኤ ከርተ አነ ከረ ኩፕን» መቴ ኦርሰዴን። 18ሳረ ኦረ አይሁድ ኦር ዬሱስ ካሰዴን ከ ክዴኔ፥ «አክመ ሁፕነ ኡኩሜተ አሴ ኮዴተ ቀፕቶ፥ ምልክተ አማነኤ እኖ አክሰ?» 19ዬሱስከ እሾነ ክዴ፥ «እሽነ ትከሴ አቁልቁሎተ ቅትቅሸ፥ አንት ኩያተ ሴሰ ከረኤን ቁፐይ።» 20እሾነከ ክዴኔ፥ «ቁፔተ ትከሴት ፐረ ኩንደ አፉር ሌህ ኦረ ቀረ ቄቴይ፥ አት አተ ኩያተ ሴሰ ከረኤው ቁፕተ?» 21ዬሱስ ኡፍ ሴዴ አትከ ቁልቁሎተ ክዴ ቆተ ደክንታድት ዴሰ ሃሰወዴ። 22ሴመለ ተማሬዋድ አውተ ዬሱስ ቶቶፐ ኼኤዬ፥ ሴዴ መቴ ኦርሰዴን ከ ወ መታፎፐ ታፈሜ ከ ቃሌተ አዬሱስ ሃሰወዴ አመኔን። 23ቆተ ወ ኦልሰ ፐሀ አዬሱስ አውተ ፋስከት ከተመ ዬሩሰሌም ከረ ኮዴ አኬን መለ፥ ኦረ ሌከይተ ዬሱስ ዱከይሰዴ። 24ዬሱስ ኾር፥ ቆተ ከርተ ኦረ ፕሰ ከረን ኸተ ኡፖ መለ፥ እሾነን ዱከይሰኔ። 25እሸ ቆተ ወ ከርተ ነመ ከረ ቸ ፕሰ ኡፖ መለ፥ ቆተ ነመት ዴሰ እሽ ሌሌተ ፐርፓችስንንክቶ።

will be added

X\