ዮሀንስ 17

1ዬሱስ ኤቴ ሴዴ ሃሰወዴ ከመዬ፥ ሞንተኔለ ቶየዴ ከ ክዴ፥ «ኣፖ ኸኖ፥ ሳቴተሴ እከይቴይ፥ አከ እናት ኬ ኡልፌሰኔኤ፥ አት እናት ኡልፌሴ። 2ወ መለ እሸ ኡልፌስተ ኔፎ፥ ኦረሴ አአት እሽ ዳሴ ፕሰኤ አከ ቻተ ፐረፐረ ዳሾኤ ኦረ ፕሰ ቀረኤ ሁፕነ እሽን ኦረ ፕሰ ኡኩሞ እሽ ዳሴይ። 3ቻቶሴ አፐረፐረ ክዴተ፥ ኬ ዱኮለይተ ዋቀ ተከይተ እሾ እሰሴ አአት ኤርክቴ ዬሱስ ክርስቶስ ኡፕናተ ክዴተ። 4አንት ኮደሴ አአት አነ ዳሴ እንድክሼ ከ ፒተ ቀረ ኬ ኡልፌሴ። 5ሴመለ ኣፖ ኸኖ፥ አፒተን ኡመምን ቱረን፥ ኡልፌነሴ አንኬ ከፐ ቀፖኔ አምክ አነ ኡልፌሴ። 6«አንት ኦረሴ አአት ኦረ ፒተ ኦፐ ሬኸቴ ከ አነ ዳሴ አይኖ አክመ ኮድቴ እንእሾተ ኡፕነይሼ። እሾተ ኔፎ ቱረን ኦረይት፥ አትከ እሾተ አነ ዳሴ። እሾተ ኔፎከ ቃሌተይት ቶይቴን። 7እሾተ ኔፎ ወ አት አነ ዳሴ ፕሰ አክመ ኬ ከፐ ዴኤን እኡፕናዴን። 8አንት፥ ቃሌተሴ አአት አነ ዳሴ እንእሾተ ዳሼ። እሾተ ኔፎከ ቃሌሴ ቴየዴን። ከ አክመን አንት ዱካተን ኬ ከፐዬ ዴኤ ኔፎ ኡፕናዴን፥ ከ አከ አት አነ ኤርክቴ ኔፎ ዱከይሰዴን። 9«አንት ኦረሴ አአት አነ ዳሴ ቆተ ኸይት ኮዴን መለን እሾተኤ ቅንሰን ዲሼይ፥ ኦረ ፒተ መለ አንቅንሰንአንቾ። 10አኸዮ ኮዴ ፕሰ፥ ኸይት፤ አኸይት ኮዴ ፕሰ ከን ኸዮው። አንት ኔፎ እሾተኔን ኡልፌሰም። 11አመ አንት ኬ ከፖፐን ዴን፥ ኡመ አንፒሴ ቀረኤ አንጨሮ፤ መ እሾተ ፒሴ ቀረኤ ከላደኔይ፥ ኣፖ ቁልቁልቶ፥ ሴኔ አአነ ዳሴ፥ አክመ ኸኖ ምነ ተከ ኮደኔኤ፥ መኸሴ ኸይት አአነ ዳሴን እሾተ ቶይቴ። 12ሀከን ፒተ ቀረ እሾተ ኦል ቾ ከረኤ፥ መኾሴ ኸይት አአነ ዳሴኔን እሾተ ቶይቴ ከ እሾተ ስክሼ። አከ ሃሰ መታፈ ቁልቁሎተ ድከደኔኤ እሰሴ እነ ፐቴተ ኮዴ መልይ እሾቶፐ ነመ ተከ ኔፎ እንፐኔ። 13አመ ኦር ኬ ከፖፐን ዴን። ዋን መለ አንፒተ ቀረ ቾዬው ሴዴ ሃሰወዴ ኔፎ፥ አክመ ኸስዮ እሾተ ቀረ ኮፖ መለ። 14አንት ቃሌተይትን እሾተ ዳሼ። አክመን አንት ነመ ፒተ አንኮድንን፥ እሾተ ኔፎ አክሞሴ ምነኤዌን ኦረ ፒተኤን፥ ኦረ ፒተከ ሴመለ እሾተ ኔደን። 15አከ ወ ኔቀ ኬለዬ እሾተ ቶይትቶ መለን ኬ ቅንሰን ዲሼይ፥ አከ ፒቶፐዬ አሌ እሾተ ሶክሶ መለ አንቅንሰንአንቾ። 16አክመን አንት ነመ አፒተ አንኮድንን፥ እሾተ ኔፎ አሴዌን ኦረ አፒተኤን። 17ኣፖ፥ ዱካተይትን እሾተ ቁልቁለይሼ፤ ቃሌተይት ዱካተይ። 18አክመ አት ፒተ ቀሮፐ አነ ኤርክቴ ምነኤዌን፥ አንት ፒቶፖፐ እሾተ ኤርኬው። 19እሾተ አክመ ዱካተን ቁልቁሎወ ኮደኔኤ፥ አንት እሾተ መለን መትዮ ቁልቁለይሸ። 20«አንት እሾተ ፐተ መለ አንቅንሰንአንቾ መ፥ እሰሴኔ ቶራሶ ደከዬ ከ ሴመለ አነ አመኔ ኔፎ መለን ቅንሰን። 21ዋን ቅንሰነ ኔፎ፥ እሾተ ፕሰንት አክመ ተከ ኮደኔን ቅንሰን፤ ኣፖ ኸኖ፥ አክመ አት አነን ክቶ፥ አንትከ ኬን ቾ ምነኤ፥ አክመ እሾተ እኖን ቻደን፥ ኦረ ፒተ ኔፎከ አክመ አት አነ ኤርክቴ አመኖ መለን ኬ ቅንሰን። 22እኖ አክመን ተከ ኮድኔ ምነኤ፥ እሾተ ኔፎ አክመ ተከ ኮደኔኤ አንት ኡልፌነሴ አአት አነ ዳሴ እንእሾተ ዳሼ። 23አንት አክመን እሾተ ኦል ቾ፥ አትከ አነ ኦል ክቶ ምነኤ፥ አክመ እሾተ ከሱ ተከ ኮደን፥ ኦረ ፒተ ኔፎከ፥ አክመ አት አነ ጫለቴ ምነኤ፥ አክመ አሴው እሾተ ጫለቴ ከ፥ አክመ አነ ኤርክቴ አከ ኡፕናዶ መለን ኬ ቅንሰን። 24«ኣፖ ኸኖ፥ ሴኔ አአት አነ ዳሴ አክመ ፖረ አንአንት ኦፐ ከሎፐ አነ ኦልይ ከላደን ከ ኡልፌነሴ አአነ ዳሴ አከኔኤን ጫለን። ኡልፌኖሴ ኔፎ፥ ቆተ አፒተን ኡመምን ቱረን አነ ጫለቴ መለ አነ ዳሴ። 25ኣፖ ሀንቄለይቶ፥ ኦረ ፒተ ኬን ኡፕናኔ፥ አንት ኾር እንኬ ኡፕናዴ፤ ሴኔ አሬ ቸ ኔፎከ፥ አክመ አት አነ ኤርክቴ ኡፕናዴን። 26ጫለሎሴን አአት አነ ቀፕተ፥ እሾተ ኔፎ አከ ቀፕናደኔኤ፥ አንትከ እሾተ ኦል ቻዶኤ፥ አት አይኖ አክመ ኮድቴ እንእሾተ ኡፕነይሼይ፥ እቱሮፐ ኔፎ አሴዌን ኡፕነይሸ።»

will be added

X\